ނޫމަޑި މައްސަލާގައި ރައީސުލްޖުމްހޫރިއްޔާއާ މަޝްވަރާކޮށްފައެއް ނުވާނެ: ސީޕީ ޝުޖާއު
-
ސީޕީ މިހެން ވިދާޅުވީ ސިޔާސީ ޕާޓީއެއްގެ ޖަލްސާއެއްގައި ފުލުހުންގެ ކުރީގެ ވެރިއަކު ދެއްކެވި ވާހަކައަކާއި ގުޅިގެން
ނޫމަޑި މައްސަލައާ ގުޅޭގޮތުން ރައީސުލްޖުމްހޫރިއްޔާ ޑރ.މުހައްމަދު މުޢިއްޒުއާ މަޝްވަރާކުރެއްވިކަމަށް ބުނެ ދައްކާ ވާހަކަތައް ކޮމިޝަނަރ އޮފް ޕޮލިސް ޢަލީ ޝުޖާޢު ދޮގުކުރައްވައިފިއެވެ.
ނޫމަޑި މައްްސަލައަކީ ހައުސިިން ޔުނިޓްތަކެއް އެޅުމަށް ނޫމަޑި ނަމަކަށް ކިޔާ ކުންފުންޏަކާއެކު ކުރީގެ ސަރުކާރަކުން ގާއިމްކުރި އެއްބަސްވުމަކާއި އެއްގޮތަށް މަސައްކަތް ކުރިއަށް ނުގެންގޮސް އެއްބަސްވުން ބާތިލުކޮށްގެން އުފެދުނު މައްސަލައެކެވެ.
ދާދިފަހުން ބޭއްވި ސިޔާސީ ޕާޓީއެއް ޖަލްސާއެއްގައި ވާހަކަ ދައްކަވަމުން ފުލުހުންގެ ކުރީގެ އިސް ވެރިޔަކު ވަނީ ނޫމަޑި މައްސަލާގައި ސީޕީ ޝުޖާޢު ރައީސުލްޖުމްހޫރިއްޔާ ޑރ. މުހައްމަދު މުޢިއްޒުއާ ބައްދަލުކުރެއްވިކަމަށް ބުނެ ވާހަކަ ދައްކާފައެވެ.
އެކަން ދޮގުކުރައްވާ ޕޮލިސް ކޮމިޝަނަރ ޝުޖާޢު ނެރުއްވި ބަޔާނުގައި ވިދާޅުވީ ނޫމަޑި މައްސަލާގައި މަޝްވަރާކުރުމަށް އެއްވެސް ފަރާތަކާއި އެއްވެސް ހައިސިއްޔަތަކުން ބައްދަލުކޮށްފައި ނުވާކަމަށެވެ. އަދި މިއީ އެއްވެސް ހަޤީޤަތެއް ނެތް ދޮގުވާހަކައެއް ކަމަށް ސީޕީ ވިދާޅުވިއެވެ.
ނޫމަޑީގެ އެއްބަސްވުން ބާތިލްކުރި މައްސަލައިގެ ބަދަލުގައި 155 މިލިއަން ޑޮލަރު ހޯދަން ނޫމަޑިން އާބިޓްރޭޝަނަށް ހުށަހެޅުމުން ސަރުކާރުން ވަނީ އާބިޓްރޭޝަނުން ބޭރުގައި މަޝްވަރާކޮށް، ބަދަލުގެ ގޮތުގައި 55 މިލިއަން ޑޮލަރު ނޫމަޑިއަށް ދީފައެވެ.