މީހުން ދިރިނޫޅެވޭވަރަށް ވެއްޓެން ކައިރިވެފައި ހުރި މ.ރަބީއުވިލާ ތަޅާލަނީ
-
ރަބީއުވިލާގައި މީހުން ދިރިނޫޅޭތާ ވަރަށް ގިނަ ދުވަސްވެފައިވޭ
-
ރަބީއުވިލާ ތަޅާލުމަށް ރައީސް ނިންމެވީ އާންމުންގެ ސަލާމަތާއި ރައްކާތެރިކަމަށްޓަކައި
މީހުން ދިރިނުޅޭވޭވަރަށް ބާވެ، ވެއްޓެން ކައިރިވެފައި ހުރި މ.ރަބީއުވިލާ ތަޅާލުމުގެ މަސައްކަތް ފަށައިފިއެވެ.
6 ފަންގިފިލާއަށް އުވައިން ހަދާފައި ހުރި މ.ރަބީއުވިލާއަކީ ގިނަ ދުވަސްވެފައިވާ ގެއެކެވެ.
މީހުން ދިރިނޫޅޭތާ އެތައް ޒަމާނެއް ވެފައި ހުރި މިގޭގައި އަލިފާނުގެ ހާދިސާތަކާއި މީހުން މަރުވުމުގެ ހާދިސާތައްވެސް ވަނީ ހިނގާފައެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާބެހޭ ވަޒީރުގެ ނައިބު އިބްރާހީމް ފަޔާޒް ވިދާޅުވީ ރަބީއުވިލާގައި މީހުން ދިރިނޫޅޭތާ ވަރަށް ގިނަ ދުވަސްވެފައިވާ ކަމަށެވެ. އަދި އެ ޢިމާރާތް މިހާރު ހުރީ ބާވެ، ވެއްޓެން ގާތްވެފައިކަމަށް ފަޔާޒް ވިދާޅުވިއެވެ. އެހެންކަމުން އިމާރާތް ހުންނަ ގޯޅިގަނޑުން ހިނގާ މީހުންނަށް ގެއްލުމެއް ލިބުމަކީ އެކަށީގެންވާކަމެއްކަން އޭނާ ފާހަގަކުރެއްވިއެވެ.
ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާބެހޭ ވުޒާރާއިން ވިދާޅުވީ ރަބީއުވިލާ ތަޅާލުމަށް އެގޭގެ ވެރިފަރާތުން ބޭނުންވި ނަމަވެސް ގެ ތަޅާލުމުގެ ޤާބިލްކަން ނެތުމުން ގޭގެ ވެރިފަރާތުން ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަރިހުން އެކަމަށް އެދިފައިވާކަމަށެވެ، އަދި އެގޭގެ ވެރިފަރާތުން އެދިފައިވާ ގޮތަށް ގެ ތަޅާލުމަށް ސަރުކާރުން އެހީތެރިވުމަށް ރައީސުލްޖުމްހޫރިއްޔާ ނިންމެވީ އެ ގެ ހުންނަ މަގުން ހިނގާ މީހުންނާއި އުޅަނދުތައް ދުއްވާ މީހުންގެ ސަލާމަތާއި ރައްކާތެރިކަން ކަށަވަރުކުރުމަށްކަމަށް ވުޒާރާއިން ވިދާޅުވެއެވެ.