މި 5 އަހަރު ނިމުމުގެ ކުރިން ރިސޯޓު މުވައްޒަފުންނަށް ބޯހިޔާވަހިކަން ފޯރުކޮށްދޭނެ: ވަޒީރު ފައިޞަލް

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ރިސޯޓުތަކުގެ މުވައްޒަފުންނަށް ވެވަޑައިގެންނެވި ބޯހިޔާވަހިކަމުގެ ވައުދު މި 5 އަހަރު ނިމުމުގެ ކުރިން ފުއްދަވާނެކަމަށް ފަތުރުވެރިކަމާއި ބެހޭ ވަޒީރު އިބްރާހިމް ފައިޞަލް ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ފަތުރުވެރިކަމާއި ބެހޭ ވަޒީރު އިބްރާހިމް ފައިޞަލް ވިދާޅުވީ، ރިސޯޓު މުވައްޒަފުންނަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވެވަޑައިގެންނެވި އެންމެ މުހިންމު އެއް ވައުދަކީ ބޯހިޔާވަހިކަމުގެ ވައުދުކަމަށާއި، މި 5 އަހަރު ނިމުމުގެ ކުރިން އެމަނިކުފާނު އެވަޢުދު ފުއްދަވާނެކަމަށެވެ. އެކަމުގެ މަސައްކަތްތައް ކުރައްވަމުންދާކަމަށާއި އެމަނިކުފާނު އަމިއްލަފުޅަށްވެސް އެކަން ބައްލަވަމުން ގެންދަވާކަމަށް ފަތުރުވެރިކަމާ ބެހޭ ވަޒީރު ވިދާޅުވިއެވެ.

"ރިސޯޓު މުވައްޒަފުންނަށް އަޅުގަނޑު ޔަޤީންކަން ދޭން ބޭނުންވަނީ ތިބޭފުޅުންނަށް ރައީސް ވެވަޑައިގެންނެވި އެންމެ ބޮޑު ވައުދަކީ ބޯހިޔާވަހިކަމުގެ ވައުދު. އެމަނިކުފާނު އެކަމަށްޓަކައި އެދަނީ ވަރަށް ބޮޑަށް މަސައްކަތް ކުރަމުން. އިރާދަކުރެއްވިއްޔާ ރައީސް ޑރ. މުޙައްމަދު މުއިއްޒުގެ މި 5 އަހަރު ނިމޭއިރު އެ މަނިކުފާނު ރިސޯޓުތަކުގެ މުވައްޒަފުންނަށް މަސައްކަތްތެރިންނަށް ބޯހިޔާވަހިކަމުގެ ދާއިރާއިން އެ ކޮށްދޭން ބުނި ވައުދު ފުއްދަވާނެ. އަޅުގަނޑު އެކަން ބަލައި ވަރަށް ބޮޑަށް މޮނިޓަރ ކުރަމުން މިދަނީ. އެކަމުގެ މަސައްކަތް ކުރިއަށްދާކަން އިނގޭ." ފައިޞަލް ވިދާޅުވިއެވެ.

ވަޒީރު ފައިޞަލް ވިދާޅުވީ ފަތުރުވެރިކަމުގެ ދާއިރާގައި ވަރަށް ގިނަ ދުވަސްވަންދެން މަސައްކަތްކޮށްފައިވާ ފަރާތްތައް އެބަތިބިކަމަށާއި، ނަމަވެސް މިހާތަނަށް އައިއިރުވެސް އެ ފަރާތްތަކުގެ ހައްގުގައި މަސައްކަތް ކޮށްފައިނުވާކަމަށެވެ.

ފަތުރުވެރިކަމާއި ބެހޭ ވަޒީރު އިބްރާހިމް ފައިޞަލް ވިދާޅުވީ، ރިސޯޓު މުވައްޒަފުންނަށް ބޯހިޔާވަހިކަން ފޯރުކޮށްދޭނީ މިހާރު ކުރިއަށްގެންދާ ހައުސިން މަޝްރޫއުގެ ތެރެއިންކަމަށެވެ.