މާލެ ސަރަހައްދު ހިމެނޭގޮތަށް ރާއްޖޭގެ ބޮޑުބަޔަކަށް ރީނދޫ ސަމާލު

މާލެ ސަރަހައްދު ހިމެނޭ ގޮތަށް ރާއްޖޭގެ ބޮޑުބަޔަކަށް ވިއްސާރަކުރާނެކަމަށް ލަފާކޮށް ރީނދޫ ސަމާލު ނެރެފިއެވެ.

މޫސުމާއި ބެހޭ ޤައުމީ އިދާރާއިން ނެރެފައިވާ ރީނދޫ ސަމާލުގައި ރާއްޖޭގެ ބޮޑު ބަޔަކަށް ވައިގަދަވާނެ ކަމަށް ވަނީ ލަފާކޮށްފައެވެ. އެގޮތުން ހއ. އަތޮޅުން ފެށިގެން ދ. އަތޮޅަށް ރީނދޫ ސަމާލު ނެރެފައިވާއިރު، ގަޑިއަކު 25 މޭލާއި 30 މޭލާއި ދެމެދު ބާރުމިނުގައި ވައި ޖެހޭނެ ކަމަށް މޫސުމާއި ބެހޭ އިދާރާއިން ބުނެއެވެ. އަދި ވިލާގަނޑުގައި ގަޑިއަކު 50 މޭލަށް ވައިބާރުވާނެ ކަމަށް ވަނީ ލަފާކޮށްފައެވެ. މިއާއެކު ކަނޑުތައް ގަދަވާނެ ކަމަށް އެއިދާރާއިން ވަނީ ލަފާކޮށްފައެވެ.

މޫސުމާއި ބެހޭ ޤައުމީ އިދާރާއިން ފުރަތަމަ ރީނދޫ ސަމާލު ނެރެފައިވަނީ މިއަދު ހެނދުނު 10:00 އަށެވެ. އޭރު ރީނދޫ ސަމާލު ނެރުނީ އ.ދ އަތޮޅާއި ހަމައަށެވެ. އޭގެ ފަހުން ދ އަތޮޅާއި ހަމައަށް ސަމާލު ނެރެ އެ ސަމާލު މިރޭ ދަންވަރު 2:00 އަށް ހަމައަށް ވަނީ އިތުރުކޮށްފައެވެ.

ރާއްޖެއަށް މިހާރު ކުރަމުންދާ ވިއްސާރައިގައި ވައިގަދަވެ ކަނޑުތައްވެސް ގަދަވާނެ ކަމަށް ލަފާކޮށްފައިވާތީ، ދަތުރުފަތުރު ކުރުމުގައި ސަމާލުވުމަށް ކަމާއިބެހޭ އިދާރާތަކުން ވަނީ އިރުޝާދު ދީފައެވެ.