ފެން ބޮޑުވި ބައެއް ރަށްރަށަށް އާރުޑީސީން އެހީތެރިކަން ފޯރުކޮށްދީފި

ރާއްޖެއަށް މިހާރުކުރަމުންދާ ވިއްސާރައިގަ ބޯކޮށް ވާރޭވެހި ބައެއް ރަށްރަށުގައި ފެން ބޮޑުވުމާ ގުޅިގެން ރޯޑް ޑިވަލޮޕްމެންޓް ކޯޕަރޭޝަން، އާރުޑީސީން އެހީތެރިކަން ފޯރުކޮށްދީފިއެވެ.

ހުޅަނގު މޫސުމުގެ ބާރުގަދަވެ، ބޯކޮށް ވާރޭވެހުމާ ގުޅިގެން ރާއްޖޭގެ އެކި ހިސާބުތަކުގައި އިއްޔެވަނީ ފެން ބޮޑުވުމުގެ ހާދިސާތައް ހިނގާފައެވެ.

އާރުޑީސީން ބުނީ ފެންބޮޑުވުމާ ގުޅިގެން އެންމެ ބޮޑު އެހީތެރިކަމެއް ފޯރުކޮށްދީފައިވަނީ މާލެއަށާއި ހއ. އިހަވަންދޫއަށާއި ހދ. ކުޅުދުށްފުއްޓަށް ކަމަށެވެ.

އެގޮތުން މާލެއަށް ބޯކޮށް ވާރޭވެހި ފެންބޮޑުވުމާ ގުޅިގެން ދިވެހި ފުލުހުންގެ ޚިދުމަތާއި މާލެ ސިޓީ ކައުންސިލާއި އެމްއެންޑީއެފުން ކުރި މަސައްކަތްތަކުގައި އާރުޑީސީންވެސް ވަނީ ބައިވެރިވެފައެވެ.

އަދި ކުޅުދުއްފުށި ސިޓީގެ ބައެއް ހިސާބުތަކުގައި ފެން ބޮޑުވެ އެކި ވަރުގެ ގެއްލުންތައް ވުމާއިގުޅިގެން ސިޓީ ކައުންސިލާއި ވެމްކޯއާ ގުޅިގެން އާރުޑީސީގެ މުވައްޒަފުން އެހީތެރިކަން ފޯރުކޮށްދީފައިވާކަންވެސް އާރުޑީސީން ފާހަގަކުރެއެވެ.

މީގެ އިތުރުން ހއ. އިހަވަންދޫގައިވެސް އާރުޑީސީގެ މުވައްޒަފުން ކައުންސިލާ ގުޅިގެން އެހީތެރިކަން ފޯރުކޮށްދީފައިވާކަމަށް އެ ކޯޕަރޭޝަނުން ބުނެއެވެ.

މީގެ އިތުރުން އާރުޑީސީގެ މުވައްޒަފުން ތިބި ރަށްތަށުގައި ވެލި އުފުލުމާއި ކޯރު ކޮނުމުގައި މުވައްޒަފުން ވަނީ ހަރަކާތްތެރިވެފައެވެ.

އާރުޑީސީގެ އިތުރުން މާލޭގައި އިއްޔެ ފެން ބޮޑުވުމާ ގުޅިގެން ސްޓޭޓް އިލެކްޓްރިކް ކޮންޕެނީ، ސްޓެލްކޯއިންވެސްވަނީ އެހީތެރިކަން ފޯރުކޮށްދީފައެވެ.

ރަށްރަށުގައި ފެންބޮޑުވުމާއި ގުޅިގެން މުއައްސަސާތަކުން ކުރި މަސައްކަތްތަކުގައި އާންމު ރައްޔިތުންގެ ފަރާތުން ފުރިހަމަ އެއްބާރުލުން ދީފައިވާކަން ކައުންސިލްތަކުން ވަނީ ވިދާޅުވެފައެވެ.