މި މަހުގެ 22 ވަނަ ދުވަހާ ހަމައަށް ވައި ގަދަވެ، ކަނޑު ގަދަވާނެ: މެޓް އޮފީސް

މި މަހުގެ 22 ވަނަ ދުވަހާ ހަމައަށް ރާއްޖޭގެ އެކި ހިސާބުތަކަށް ވައި ގަދަވެ، ކަނޑު ގަދަވާނެކަމަށް މޫސުމާބެހޭ ޤައުމީ އިދާރާއިން ވިދާޅުވެއްޖެއެވެ.

ޕީއެސްއެމް ނިއުސްއަށް ދެއްވި ޚާއްސަ ބަސްދީގަތުމެއްގައި މޫސުމާބެހޭ ޤައުމީ އިދާރާގެ މީޓިއޮރޮލޮޖިސްޓް އަޙްމަދު ޝާބިން ވިދާޅުވި ކުރިއަށް އޮތް 5 ދުވަހަށްވެސް މުޅި ރާއްޖެއަށް މޫސުން ގޯސްވާނެކަމަށާއި މިމަހުގެ 22 ވަނަ ދުވަހާ ހަމައަށް ވައިގަދަވެ ކަނޑު ގަދަވާނެ ކަމަށެވެ. ޝާބިން ވިދާޅުވީ މިދިޔަ އާދިއްތަ ދުވަހުން ފެށިގެން ރާއްޖޭގެ ހުރިހާ ހިސާބަކަށް ވެސް މޫސުން ގޯސް ކަމަށެވެ. އަދި މި ދުވަސްވަރު މޫސުން މިހާ ގޯސްވެފައި ވަނީ ހުޅަނގު މޫސުމުގެ ބާރުގަދަވެ، ވައި ބާރުވުމުގެ ސަބަބުންކަމަށް ޝާބިން ވިދާޅުވިއެވެ.

"މިވޭތުވެދިޔަ 24 ގަޑިއިރު އެންމެ ބޯކޮށް ވާރޭ ވެހުނީ ކެލައަށް. އަދި މިއަދަށް ބަލާލާއިރު ވަރަށް ބޮޑަށް ޚާއްސަކޮށް މެދުރާއްޖެތެރެއަށް ވައި ގަދަވެފައިވަނީ." ޝާބިން ވިދާޅުވިއެވެ.

ޝާބިން ވިދާޅުވީ ރާއްޖޭގެ ދެކުނުގައި ކޮޅިގަނޑެއް އުފެދިފައިވާ ކަމަށެވެ. އަދި މީގެ ސަބަބުން ކުރިއަށް އޮތްތަނުގައި ދެކުނުގެ އަތޮޅުތަކަށް ބޯކޮށް ވާރޭވެހުމުގެ ފުރުޞަތު އޮތްކަން ޝާބިން ފާހަގަކުރެއްވިއެވެ.

މީގެ އިތުރުން ކުރިއަށް އޮތްތަނުގައި މެދުރާއްޖެތެރޭގެ އަތޮޅުތަކަށް އިތުރަށް ވިއްސާރަކޮށް ވައި ގަދަވުމުގެ ފުރުޞަތު އެބައޮތްކަމަށްވެސް ޝާބިން ވަނީ ވިދާޅުވެފައެވެ. ޝާބިން ވަނީ ފެން ބޮޑުވުމާއި ވައި ގަދަވުމުގެ ސަބަބުން ލިބިދާނެ ގެއްލުންތަކަށް ދުރާލާ ފިޔަވަޅު އަޅައިގެން ތިބުމަށް އިލްތިމާސްކުރައްވާފައެވެ. އަދި މި ދުވަސްވަރު ކަނޑުދަތުރުކުރާ ފަރާތްތަކުންވެސް މުސުމަށް ސަމާލުވުމަށް ޝާބިން ވަނީ އިލްތިމާސްކުރައްވާފައެވެ.