އޯލެވެލް އަދި އެސްއެސްސީ އިމްތިހާނުގެ ނަތީޖާ ދޫކުރަން ފަށައިފި

މިއަހަރު މެއި އަދި ޖޫން މަހު ބޭއްވި ކޭމްބްރިޖް އޯލެވެލްގެ އިމްތިހާނުގެ ނަތީޖާ ދޫކުރަން މިއަދު ފަށައިފިއެވެ.

ޑިޕާޓްމަންޓް އޮފް ޕަބްލިކް އެގްޒެމިނޭޝަނުން ވިދާޅުވީ، މެއި އަދި ޖޫން މަހު ބޭއްވި ކެމްބްރިޖް އައިޖީސީއެސްއީ އަދި ސެކަންޑަރީ ސްކޫލް ސެޓިފިކެޓް، އެސްއެސްސީ އިމްތިހާނުގެ ނަތީޖާ މިއަދު މެންދުރު 12 އިން ފެށިގެން ދޫކުރަން ފަށާފައިވާކަމަށެވެ. އެގޮތުން ސެންޓަރުތަކުން ކެނޑިޑޭޓުންނަށް ނަޓީޖާ ފެށިގެން ދޫކުރަމުންދާނެކަމަށް އެއިދާރާއިން ވިދާޅުވެއެވެ. އަދި ނަތީޖާގެ ރީޗެކްކުރުމަށް ބުދަ ދުވަހު ހުޅުވާލާނެކަމަށް ޑިޕާޓްމަންޓް އޮފް ޕަބްލިކް އެގްޒެމިނޭޝަނުން ވިދާޅުވިއެވެ.

2024 މެއި/ ޖޫންމަހު ބޭއްވި ކެމްބުރިޖު އައި.ޖީ.ސީ.އެސް.އީ އަދި އެސް.އެސް.ސީ އިމްތިޙާނުގެ ނަތީޖާ 2024 އޮގަސްޓް 13 ވަނަ ދުވަހު ދޫކުރާގޮތަށްވަނީ ހަމަޖެހިފައެވެ. ސެންޓަރތަކުން ކެނޑިޑޭޓުންނަށް ނަތީޖާ ދޫކުރާނީ 2024 އޮގަސްޓް 13 ވަނަ ދުވަހުގެ 12.00 އިން ފެށިގެން.

— Department of Public Examinations (@dpemv) August 12, 2024

މިއަހަރުގެ އޯލެވެލް އިމްތިހާނުގައި ރާއްޖޭގެ 256 ސެންޓަރަކުން 7501 ދަރިވަރުންވަނީ ބައިވެރިވެފައެވެ. މިއީ މިދިޔަ އަހަރު އޯލެވެލް އިމްތިހާނުގައި ބައިވެރިވި ދަރުވަރުންނަށްވުރެ 803 ދަރިވަރުންގެ އިތުރުވުމެކެވެ. މިއަހަރުގެ އެސްއެސްސީ އިމްތިހާނުގައި 7133 ދަރިވަރުންވަނީ ބައިވެރިވެފައެވެ. އެކި ސްޓްރީމްތަކުގެ މާއްދާތައް ހިމެނޭހެން ދަރިވަރުންވަނީ ޖުމްލަ 60 އިމްތިހާން ކަރުދާސް ހަދާފައެވެ.

މިދިޔަ ޑިސެމްބަރު މަހުވަނީ އޯލެވެލް އިމްތިހާނަށް މުހިއްމު ބަދަލުތަކެއް ސަރުކާރުން ގެންނަވާފައެވެ. އެގޮތުން އިސްލާމް، ދިވެހި، އިނގިރޭސި އަދި ހިސާބު މާއްދާއަކީ މަޖުބޫރު މާއްދާތަކުގެ ގޮތުގައި ކަނޑައަޅާ އެމާއްދާތަކަށް ސަރުކާރުން ފައިސާދައްކާގޮތަށްވަނީ ހަމަޖައްސަވާފައެވެ. ނަމަވެސް މީގެ ކުރީގެ އުސޫލުގައިވާގޮތުން މަޖުބޫރު މާއްދާއިން މޮކް އިމްތިހާނުގައި ފާސްނުވެއްޖެނަމަ، އެ އިމްތިހާނެއްގައި އެ ދަރިވަރަކު ބައިވެރިވާންޖެހޭނީ އަމިއްލައަށް ފައިސާ ދައްކައިގެންނެވެ.