އެމްޑީޕީގެ މެމްބަރުން އަޑުގަދަކުރުމުން ޖަލްސާ މެދުކަނޑާލައިފި

ރައްޔިތުންގެ މަޖިލީހުގެ ނިޒާމު ގޯސްވެ، މިއަދުގެ ޖަލްސާ މެދުކަނޑާލައިފިއެވެ.

މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް ގެދޮރުވެރިކަމާއި ބިމާއި ޢުމްރާނީ ތަރައްޤީއާބެހޭ ވަޒީރު ޑރ. ޢަލީ ހައިދަރު އަޙުމަދާ ހުށައަޅުއްވާފައިވާ ސުވާލުގެ ވަގުތު ކުރިއަށްދަނިކޮށް، ވައިކަރަދޫ ދާއިރާގެ މެންބަރު ޙުސައިން ޒިޔާދުވަނީ ނިޒާމީ ނުކުތާނަގައި ސުވާލުކުރައްވާފައެވެ..

ވައިކަރަދޫ ދާއިރާގެ މެންބަރުގެ ނިޒާމީ ނުކުތާގައި ފާހަގަކުރެއްވި ކަންކަމާ ގުޅިގެން މަޖިލީހުގެ ރައީސް ޢަބްދުއްރަހީމް ޢަބްދުﷲ ވިދާޅުވީ ނިޒާމީ ނުކުތާއެއްކަމުގައި ބަލާނީ މަޖިލީހުގެ ނިޒާމުން ބޭރުގައި ކަމެއް ހިނގާނަމަ ކަމަށެވެ. އަދި ވަޒީރާ ސުވާލުކުރުން ކުރިއަށްގެންދަނީ މަޖިލީހުގެ ގަވާއިދާއި ނިޒާމާ އެއްގޮތަށްކަން ފާހަގަކުރައްވަމުން ޢަބްދުއްރަޙީމް ވިދާޅުވީ މެންބަރުންކުރާ ސުވާލާ ގުޅިގެން ވަޒީރު ބޭނުންވާ ޖަވާބެއް ދިނުމުގެ އިޚުތިޔާރު ވަޒީރަށް ލިބިގެންވާ ކަމަށެވެ.

މިގޮތަށް ރިޔާސަތުން އެންގެވުމުން ވައިކަރަދޫ ދާއިރާގެ މެންބަރުވަނީ މަޖިލީހުގެ ތަޅުމުގައި އަޑުގަދަކޮށްފައެވެ. މިކަމާ ގުޅިގެން މަޖިލީހުގެ ތަޅުން ދޫކުރައްވާ ވަޑައިގެންނެވުމަށް އަންގަވާ ވައިކަރަދޫ ދާއިރާގެ މެންބަރުގެ ނަން، ރިޔާސަތުންވަނީ އިއްވާފައެވެ.

މިކަމާ ގުޅިގެން އިދިކޮޅު އެމްޑީޕީގެ އިތުރު މެމްބަރުންތަކެއްވެސް ތަޅުމުގައި އަޑުގަދަކުރަން ފެށުމުން ތަކުރާރުކޮށް މަޖިލީހުގެ ގަވާއިދުތަކަށް ޙުރުމަތްތެރިކޮށް ހިތުމަށް މެންބަރުންނަށް ގޮވާލެއްވުމަށްފަހު އިތުރު 3 މެންބަރެއްގެ ނަން، މަޖިލީހުގެ ރިޔާސަތުން އިއްވިއެވެ. އެއީ ހިތަދޫ ދެކުނު ދާއިރާގެ މެންބަރުން އިބްރާހިމް ނާޒިލާއި، ކެންދޫ ދާއިރާގެ މެންބަރު މަޢުރޫފް ޛާކިރުގެ އިތުރުން ކެޔޮދޫ ދާއިރާގެ މެންބަރު މުޙައްމަދު ނިއުޝާދުގެ ނަމެވެ.

ރިޔާސަތުން ވިދާޅުވީ ނަން އިއްވި 4 މެންބަރުން މަޖިލީހުގެ ތަޅުން ދޫކުރައްވާ ވަޑައިގަންނަވަންދެން މަޖިލީހުގެ ޖަލްސާ މެދުކަނޑާލާ ކަމަށެވެ. އަދި ދެން ޖަލްސާ ފަށަނީ މިއަދު 11 ޖަހާއިރު ކަމަށް ރިޔާސަތުން ވިދާޅުވިއެވެ.

ވަޒީރު ޑރ.އަލީ ހައިދަރު އަޙުމަދާ ސުވާލުކުރުމުގެ އިތުރަށް ސަރުކާރުގެ ފަރާތުން އަލަށް މަޖިލީހަށް ތަޢާރަފްކުރާ 2 ބިލެއްގެ ފުރަތަމަ ކިޔުން އިއްވުން މިއަދުގެ ޖަލްސާއަށްވަނީ އެޖެންޑާކޮށްފައެވެ. އަދި ސަރުކާރުގެ ފަރާތުން މަހިބަދޫ ދާއިރާގެ މެންބަރު އަޙްމަދު ޠާރިޤުު ހުށައަޅުއްވާފައިވާ އިންޝުއަރެންސްގެ ބިލުގެ ބަހުސްކުރުންވެސް ކުރިއަށް ގެންދިއުމަށް މިއަދުގެ ޖަލްސާއަށް އެޖެންޑާކޮށްފައިވެއެވެ.