ގުޅިފަޅުން ގޯތި ހަވާލުކުރެވޭނީ ބްރިޖު ސައިޓް ހުސްކޮށް، ބިން ހިއްކައި ނިމުމުން: ވަޒީރު ޑރ.ހައިދަރު

ކުރީ ސަރުކާރުން ގުޅިފަޅުން ދޫކޮށްފައިވާ ގޯތި ހަވާލުކުރެވޭނީ ތިލަމާލެ ބްރިޖުގެ މަސައްކަތް ކުރުމަށް ބޭނުންކުރާ ސައިޓު ހުސްކޮށް، ބިން ހިއްކައި ނިމުމުން ކަމަށް ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވަޒީރު ޑރ. އަލީ ހައިދަރު ވިދާޅުވެއްޖެއެވެ.

ވަޒީރު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް ކުރެއްވި ސުވާލަށް ޖަވާބުދެއްވަމުންނެވެ.

ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވަޒީރު ޑރ. އަލީ ހައިދަރު ވިދާޅުވީ ކުރީ ސަރުކާރުން ކަނޑުފަޅުތަކުން ގޯތި ދޫކޮށްފައި ހުރީ ޒިންމާދާރުކަން ކުޑަގޮތެއްގައި ކަމަށެވެ. ނަމަވެސް އެ ފަޅުތައް ހިއްކުމުގެ މަސައްކަތް މިސަރުކާރުން ކުރަމުން އަންނަ ކަމަށާއި އެގޮތުން، ގުޅިފަޅުގައި އިތުރު 85 ހެކްޓަރުގެ ބިން ހިއްކަން ޖެހޭކަމަށާއި އެތަނުން ގޯތި ދޫކުރެވޭނީ އެ މަސައްކަތް ނިމުމުން ކަމަށެވެ. އަދި މިހާރު ތިލަމާލެ ބްރިޖުގެ މަސައްކަތްތަކަށް ގުޅިފަޅު ބޭނުންކުރާއިރު އެތަން ހުސްކުރެވޭނެކަމަށް ބެލެވެނީ އަންނަ އަހަރުގެ ސެޕްޓެމްބަރު މަހާ ހިސާބަށްކަމަށްވެސް ވަޒީރު ވިދާޅުވިއެވެ.

ވަޒީރު ޑރ. އަލީ ހައިދަރު ވިދާޅުވީ ގުޅިފަޅުން ބިން ދޫކުރުމަށް މިސަރުކާރުން ތައްޔާރުކުރި ލޭންޑް ޔޫސް ޕްލޭނުގެ ސަބަބުން ރައްޔިތުންނަށް ތަކުލީފަކާ ނުލައި ދިރިއުޅެވޭނެ ކަމަށާއި އެޕްލޭން ފާސްކުރުމުގެ މަސައްކަތް މިހާރު ކުރަމުންދާ ކަމަށެވެ.

ހުޅުމާލެ ދެވަނަ ފިޔަވަހިން ބިން ދޫކުރުމާ ގުޅޭގޮތުން ވަޒީރު ވިދާޅުވީ އެތަނުން ބިން ދޫކޮށްފައި ހުރީ އެކި މަސައްކަތްތަކަށް ސާމާނު ބަހައްޓާފައިވާ ސައިޓުތަކާއި މަގުތަކުން ކަމަށެވެ. އަދި ކަރަންޓު ފޮށިތައް ގޯތިތެރެއަށް ވާގޮތަށްވެސް އެބަހުރި ކަމަށް ވިދާޅުވިއެވެ. އެކަންކަން ހައްލުކުރުމަށްފަހު 1407 ގޯތިން 623 ގޯތި މިހާރު ހަވާލުކޮށްފައިވާ ކަމަށާއި، މި އޮކްޓޯބަރު މަހުގެ ނިޔަލަށް ދެވަނަ ފިޔަވަހިން ދޭން ޖެހޭ ހުރިހާ ގޯއްޗެއް ހަވާލުކުރެވޭނެ ކަމަށް ވަޒީރު ވިދާޅުވިއެވެ. މީގެ އިތުރުން ތިންވަނަ ފިޔަވަހިން 699 ގޯތި ދީފައިވަނީ ފަޅުން ކަމަށާއި އެއީ ޒިންމާދާރު ސަރުކާރަކުން ކަންކުރާނެ ގޮތެއް ނޫންކަމަށްވެސް ވިދާޅުވިއެވެ.

"ރައީސް ބޭނުންފުޅުވަނީ ޒިންމާދާރުކަމާއެކު ގޯތި ބައްސަވަން. އެހެންވީމަ ހުޅުމާލެ ފޭސް 3އިން ގޯތި ލިބުނު 699 ފަރާތަށްވެސް މި ސަރުކާރުން ގޯތި ހަވާލުކުރާނީ ބިން ހިއްކުމަށްފަހު ބިމުން. ފޭސް 3 ހިއްކައި ގޯތި ހަވާލުކުރުމުގެ އަމަލީ މަސައްކަތް ފެށޭނެކަމަށް ލަފާ ކުރެވެނީ މިއަހަރުގެ ނޮވެމްބަރު ހާތަނުގައި،" ވަޒީރު ވިދާޅުވިއެވެ.

ވަޒީރު ވިދާޅުވީ ކުރީ ސަރުކާރުން ގިރާވަރުފަޅުން 5186 މީހުންނަށް ގޯތި ދީފައިވާއިރު އެ ގޯތިތައްވެސް ބިން ހިއްކުމަށްފަހު މިސަރުކާރުން ހަވާލުކުރާނެ ކަމަށެވެ. އެގޮތުން، ގޯތި ލިބުނު އެއްވެސް ފަރާތެއް އުނިނުވާނެހެން ހަވާލުކުރައްވާނެ ކަމަށާއި ބިންހިއްކުމުގެ މަސައްކަތް މިހާރު ކުރިއަށްދާކަން ވަޒީރު ފާހަގަކުރެއްވިއެވެ.