ޚާރިޖީ ވަޒީރު ރަސްމީ ދަތުރުފުޅެއްގައި ބަޙްރައިނަށް ފުރާވަޑައިގެންފި
-
މި ދަތުރުފުޅުގައި ބަޙްރައިންގެ އިސްވެރިންނާއި ބައްދަލުކުރައްވާ، މަޝްވަރާތައް ބާއްވަވާނެ
ޚާރިޖީ ވަޒީރު މޫސާ ޒަމީރު ރަސްމީ ދަތުރުފުޅެއްގައި ބަޙްރައިނަށް ފުރާވަޑައިގެންފިއެވެ.
ޚާރިޖީ ވުޒާރާއިން ވިދާޅުވީ ވަޒީރުގެ މި ދަތުރުފުޅަކީ ބަޙްރައިންގެ ޚާރިޖީ ވަޒީރު ޑރ. އަބްދުއްލަތީފް ބިން ރާޝިދު އަލް ޒަޔާނީގެ ދައުވަތަކަށް ކުރައްވާ ދަތުރުފުޅެއް ކަމަށެވެ. މި ދަތުރުފުޅުގައި އެ ދެ ޤައުމުގެ ގުޅުން އިތުރަށް ބަދަހިކުރުމާއި ގުޅޭގޮތުން މަޝްވަރާކުރައްވާނެކަމަށްވެސް ޚާރިޖީ ވުޒާރާއިން ވިދާޅުވެއެވެ.
މި ދަތުރުފުޅުގައި ޚާރިޖީ ވަޒީރު މޫސާ ޒަމީރު ބަޙްރައިންގެ ފިނޭންސް އެންޑް ނޭޝަނަލް އިކޮނޮމީ މިނިސްޓަރާއި އޮއިލް އެންޑް އެންވަޔަރަމަންޓް މިނިސްޓަރާއި ޓޫރިޒަމް މިނިސްޓަރާވެސް ބައްދަލުކުރައްވައި އެ ދާއިރާތަކުން ގުޅުން ބަދަހިކުރުމާއި ގުޅޭގޮތުން މަޝްވަރާކުރެއްވުމަށްވެސް ވަނީ ހަމަޖެހިފައެވެ.
މި މަހުގެ 15ވަނަ ދުވަހާ ހަމައަށް ޚާރިޖީ ވަޒީރު ބަޙްރައިނަށް ކުރައްވާ މި ދަތުރުފުޅުގައި އެމްބެސެޑަރ އެޓް ލަރޖް އަހުމަދު ނަސީރާއި ބައިލެޓަރަލް ސެކްރެޓަރީ ޑރ. ހާލާ ހަމީދު ހިމެނޭހެން ޚާރިޖީ ވުޒާރާގެ އިސް ވަފުދެއް ބައިވެރިވެވަޑައިގަންނަވައެވެ.
ރާއްޖެއާއި ބަޙްރައިނާއި ދެމެދު ސިޔާސީ ގުޅުން ބަދަހިކުރިތާ މިއަހަރަށް 44 އަހަރު ފުރޭނެއެވެ.