އައްޑޫގެ މަގުތައް ތަރައްޤީކުރަނީ މޫސުމީ ބަދަލުތަކަށް ވިލުންވެރިވާނެހެން: ވަޒީރު ޑރ.މުއްޠަލިބު
-
މަގުތައް ތަރައްޤީކުރަނީ ޒަމާނީ ފެން ހިންދާ ނިޒާމާއެކު
-
އިންޑިއާގެ އެހީގައި ކުރިއަށްގެންދިޔަ ބޮޑު 2 މަޝްރޫޢެއްގެ ނިމުން ވަނީ ފާހަގަކޮށްފައި
-
އަމާޒަކީ އިތުރު މަޝްރޫޢުތައް އިންޑިއާއާއެކު ކުރިއަށް ގެންދިއުންކަމަށް ވިދާޅުވި
އައްޑޫ ސިޓީގެ މަގުތައް ތަރައްޤީކުރަނީ މޫސުމީ ބަދަލުތަކަށް ވިލުންވެރިވާނެހެންކަމަށް ޢިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.
ވަޒީރު މިހެން ވިދާޅުވީ އިންޑިއާގެ އެހީގައި ކުރިއަށް ގެންދިޔަ އައްޑޫ ޑިވެލޮޕްމެންޓް ޕްރޮޖެކްޓުގެ ދެ މަޝްރޫޢު ކަމަށްވާ، އައްޑޫގެ ބިން ހިއްކުމުގެ މަޝްރޫޢާއި ހަންކެޑެ ވަށައިގެން އަޅާފައިވާ ޑީޓުއަރ ލިންކް ރޯޑު މަޝްރޫޢުގެ ނިންމުން ފާހަގަކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ޢިމާރާތްކުރުމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވީ އައްޑޫގައި މިހާރު ކުރިއަށްގެންދާ މަގު ހެދުމުގެ މަޝްރޫޢުތައް ނިމުމަކާ ހަމައަށް އައިސްފައިވާ ކަމަށެވެ. އަދި މި މަގުތައް ތަރައްޤީކުރަނީ ތިމާވެށްޓާ ރައްޓެހި، މޫސުމީ ބަދަލުތަކަށް ވިލުންވެރިގޮތަކަށް ކަމަށް ވަޒީރު ވިދާޅުވިއެވެ.
އެގޮތުން މިމަގުތައް ތަރައްޤީކުރަނީ ބޯކޮށް ވާރޭވެހި ފެން ބޮޑުވެއްޖެނަމަ ފެން ހިންދުމަށް ބޭނުންވާނެ ޒަމާނީ ނިޒާމަކާއެކުކަން ވަޒީރު ޢަބްދުﷲ މުއްޠަލިބު ފާހަގަކުރެއްވިއެވެ.
"100 ކިލޯ މީޓަރުގެ މަގު ހެދުމުގެ މަޝްރޫޢެއް އައްޑޫގެ ފޭދޫއާއި މަރަދޫއާއި ހިތަދޫއާއި ހުޅުދޫމީދޫގައި އެބަ ކުރިއަށްދޭ." ވަޒީރު ވިދާޅުވިއެވެ.
ވަޒީރު ވިދާޅުވީ އިންޑިއާގެ އެހީގައި މިއަދު ނިމުން ފާހަގަކުރެވުނު މަޝްރޫޢުތަކަކީ އައްޑޫގެ ކުރިއެރުމާއި ތަރައްޤީއަށް މުހިންމު މަޝްރޫޢުތަކެއް ކަމަށެވެ. އެގޮތުން މާލެ ފިޔަވައި ފެން މަތީ ހެދުނު އެންމެ ފުރަތަމަ ބުރިޖަކީ ހަންކެޑެ ބުރިޖުކަން ވަޒީރު ފާހަގަކުރެއްވިއެވެ.
އައްޑޫ ސިޓީ 4 ލޭން ޑިޓުއަރ ލިންކް ރޯޑް ނުވަތަ ހަންކެޑެ ބްރިޖަކީ ފަތުރުވެރިކަމަށް ތަރައްޤީކުރަން ކަނޑައަޅާފައިވާ ރަށް، "ހަންކެޑެ" ބޭރުން ހުޅަނގު ދެކުނުގައި ތަރައްޤީކުރި މަގެކެވެ.
ވަޒީރު ވިދާޅުވީ ކުރިއަށް އޮތްތަނުގައި ދިވެހި ރައްޔިތުންގެ ލާބައާއި މަންފާއަށް އިތުރު މަޝްރޫޢުތައް އިންޑިއާގެ އެހީގައި ކުރިއަށްގެންދިއުމަކީ އަމާޒެއް ކަމަށެވެ. އަދި މިފަދަ ބޮޑެތި މަޝްރޫޢުތައް ކުރިއަށް ގެންދިއުމަށް އިންޑިއާއިން ވެދެއްވާ އެހީތެރިކަމަކީ ދެ ޤައުމުގެ ދެމެދުގައި އޮތް ގާތްގުޅުން ދޭހަކޮށްދޭކަމެއް ކަމަށް ވަޒީރު ޢަބްދުﷲ މުއްޠަލިބު ވިދާޅުވިއެވެ.
އިންޑިއާގެ އެހީގައި ކުރިއަށް ގެންދިޔަ އައްޑޫ ޑިވެލޮޕްމެންޓް ޕްރޮޖެކްޓުގެ ދެ މަޝްރޫޢު ކަމަށްވާ، އައްޑޫގެ ބިން ހިއްކުމުގެ މަޝްރޫޢާއި ހަންކެޑެ ވަށައިގެން އަޅާފައިވާ ޑީޓުއަރ ލިންކް ރޯޑުގެ މަސައްކަތް ނިންމާ ރަސްމީކޮށް ދިވެހި ސަރުކާރާ މިއަދުވަނީ ހަވާލުކޮށްފައެވެ.