އިންޑިޔާގެ ބޮޑުވަޒީރު ނަރެންދްރަ މޯދީ އީރާނަށް ކުރައްވާ ރަސްމީ ދަތުރުފުޅެއްގައި ތެހެރާނަށް ވަޑައިގެންފިއެވެ.
ދެ ދުވަހުގެ މި ދަތުރުފުޅުގައި މޯދީ، އީރާނުގެ ރައީސް ޑރ. ޙަސަން ރޫހާނީއާއި އެ ޤައުމުގެ ދީނީ މުރްޝިދު އާޔަތުﷲ ޢަލީ ޚާމަނާއި އާ ބައްދަލުކުރައްވާނެއެވެ. މޯދީގެ މިދަތުރުފުޅަކީ ނިއުކްލިޔަރ މައްސަލާގައި އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލާފައިވާތީ އީރާނާއި އިންޑިޔާގެ އިޤްތިޞާދީ އަދި ވިޔަފާރީގެ މުއާމަލާތްތައް އިތުރުކުރުމުގެ ބޭނުމުގައި ކުރައްވާ ދަތުރުފުޅެކެވެ. މިދަތުރުފުޅުގައި އީރާނުގެ ބާޒާރުން އިންޑިޔާގެ ކުންފުނިތަކަށް ގިނަ ފައިދާތަކެއް ޙާސިލް ކުރެވޭނެ މަގުތައް ތަނަވަސްކުރުމަށް މޯދީ ވަރަށް ބޮޑަށް މަސައްކަތް ކުރައްވާނެއެވެ.
މިގޮތުން ހަކަތައާއި މުވާސަލާތާއި ސިނާއަތުގެ އިތުރުން މަދަނީ އިންފްރާސްޓްރަކްޗަރގެ ދާއިރާތަކުގައި އީރާނާއި އިންޑިޔާގެ މަސްއޫލުވެރިން ގިނަ އަދަދެއްގެ އެއްބަސްވުންތަކެއްގައި ސޮއިކުރައްވާނެއެވެ. އިންޑިޔާގެ ޚާރިޖީ ވަޒީރު ޝުޝްމާ ސްވަރާޖް ވެސް ދާދިފަހުންވަނީ އީރާނަށް ޒިޔާރަތް ކުރައްވާފައެވެ. ތެހެރާނަށް ވަޑައިގެން ދެއްވި ބަޔާނެއްގައި މޯދީ ވަނީ އިންޑިޔާއާއި އީރާނުގެ ގުޅުންތަކަކީ އަވަށްޓެރި އަދި ތާރީޚި ގުޅުންތަކެއް ކަމަށް ސިފަކުރައްވާފައެވެ.