އެމްއެމްއޭގެ ގަވަރުނަރަކަށް މުނައްވަރު ޢައްޔަންކުރައްވައިފި

މަރުކަޒީ ބޭންކް، އެމްއެމްއޭގެ ގަވަރުނަރަކަށް ކުރީގެ މާލީ ވަޒީރު އަޙްމަދު މުނައްވަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އައްޔަން ކުރައްވައިފިއެވެ.

ގަވަރުނަރުކަމަށް އައްޔަނުކުރެއްވިކަމުގެ ލިޔުން، އަޙްމަދު މުނައްވަރަށް ރައީސުލްޖުމްހޫރިއްޔާ ހަވާލުކުރެއްވީ، އެކަމަށްޓަކައި މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތެއްގައެވެ.

މި ރަސްމިއްޔާތަށްފަހު ރައީސުލްޖުމްހޫރިއްޔާ ވަނީ އަޙްމަދު މުނައްވަރާއި ބައްދަލުކުރައްވާފައެވެ.

އެގޮތުން މި ބައްދަލުކުރެއްވުމުގައި ރައީސުލްޖުމްހޫރިއްޔާ އާއި ގަވަރުނަރު ވަނީ ރާއްޖޭގެ އިޤްތިޞާދީ ޙާލަތާ ގުޅޭގޮތުން މަޝްވަރާ ކުރައްވާފައެވެ. އަދި ފައިނޭންސްގެ ދާއިރާއާއި ގުޅޭ އެހެން މުވައްސަސާތަކާ ގުޅިގެން މަސައްކަތް ކުރެއްވުމަށް ރައީސުލްޖުމްހޫރިއްޔާ ބާރުއެޅުއްވިއެވެ.

މި ބައްދަލުކުރެއްވުމުގައި ވާހަކަފުޅު ދައްކަވަމުން މޯލްޑިވްސް މަނިޓަރީ އޮތޯރިޓީގެ ގަވަރުނަރު ވިދާޅުވީ ޤައުމުގެ އިޤްތިޞާދު ކުރިއެރުވުމަށް ސަރުކާރުން ކުރައްވާ މަސައްކަތްތަކަށް ފުރިހަމައަށް އެއްބާރުލުން ދެއްވާނެކަމަށެވެ.

އެމަނިކުފާނު މުނައްވަރު އެ މަގާމަށް އައްޔަން ކުރެއްވީ ރައްޔިތުންގެ މަޖިލީހުގެ 78 މެންބަރުންގެ ވޯޓާއެކު މުނައްވަރު އައްޔަން ކުރެއްވުމަށް އެމަނިކުފާނު ލަފާ އެރުވުމަށް ފާސްކުރުމާ ގުޅިގެންނެވެ. މަޖިލީހުން މުނައްވަރު އެމަޤާމަށް އައްޔަންކުރަން ފާސްކުރީ މަޖިލީހުގެ މާލިއްޔަތު ކޮމިޓީން އިންޓަވިއު ކުރުމަށްފަހު އެމަގާމަށް ޝަރުތުހަމަވާކަށް ނިންމުމާއި ގުޅިގެންނެވެ.

ގަވަރުނަރުގެ މަގާމަށް ކުރީގެ މާލީ ވަޒީރު އަޙްމަދު މުނައްވަރު އައްޔަން ކުރައްވަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވީ ރައްޔިތުންގެ މަޖިލީހުގެ ލަފާފުޅާއެކު އެ މަގާމުގައި ކުރިން ހުންނެވި ޢަލީ ހާޝިމް އެ މަގާމުން ވަކިކުރެއްވުމަށްފަހުއެވެ. އޭނާ މަގާމުން ވަކިކޮށްފައިވަނީ މަގާމުގެ މަސްއޫލިއްޔަތު އަދާނުކުރެވޭ ކަމަށްބުނެ މާލިއްޔަތު ކޮމިޓީއަށް ހުށަހެޅި މައްސަލައަކާ ގުޅިގެންނެވެ.

އެމްއެމްއޭގެ ޤާނޫނު ބަޔާންކުރާގޮތުގައި ގަވަރުނަރުގެ މަގާމަށް ބޭފުޅަކު އައްޔަން ކުރައްވާނީ އަދި އެ މަގާމުން ބޭފުޅަކު ވަކިކުރައްވާނީ މަޖިލީހުގެ ލަފާގެ މަތިން ރައީސުލްޖުމްހޫރިއްޔާއެވެ.

އަޙްމަދު މުނައްވަރު ގަވަރުނަރުގެ މަގާމަށް ހަމަޖެއްސެވުމުގެ ކުރިން 12 ޑިސެންބަރު 2023 އިން 22 ޖުލައި 2024 އާ ހަމަޔަށް ހުންނެވީ މިނިސްޓްރީ އޮފް ފިނޭންސްގެ އެޑްވައިޒަރ ޓު ދަ މިނިސްޓަރ އޮފް ފިނޭންސްގެ މަގާމުގައެވެ. އަދި އަޙްމަދު މުނައްވަރު މީގެ ކުރިން ވަނީ މިނިސްޓަރ އޮފް ފިނޭންސް އެންޑް ޓްރެޜަރީ ކަމުގެ މަގާމުވެސް އަދާކުރައްވާފައެވެ. އޭގެ ކުރިން 2014ވަނަ އަހަރުން ފެށިގެން 2016 ވަނަ އަހަރާ ހަމައަށް ހުންނެވީ މާލީ ވުޒާރާގެ ސްޓޭޓް މިނިސްޓަރުގެ މަގާމުގައެވެ.

މުނައްވަރަކީ މާލީ ދާއިރާގައި ރާއްޖޭގައި ފާހަގަކޮށްލެވޭ ތަޖުރިބާކާރު ބޭފުޅެކެވެ. މުނައްވަރު ވަނީ މެލޭޝިއާގެ އިސްލާމިކް ޔުނިވަރސިޓީން ބެޗެލަރ އޮފް އިކޮނޮމިކްސް (އޮނަރސް) ހާސިލްކުރައްވާފައެވެ. އަދި އިކޮނޮމިކްސްގެ ދާއިރާއިން މާސްޓަރސް ހާސިލް ކުރެއްވީ އޮސްޓްރޭލިއާގެ މެކުއަރީ ޔުނިވަރސިޓީންނެވެ.

މުނައްވަރު ވަނީ 1999ވަނަ އަހަރުން ފެށިގެން 2013ވަނަ އަހަރާ ހަމައަށް އެމްއެމްއޭގައިވެސް ޚިދުމަތް ކުރައްވާފައެވެ. އެގޮތުން، އެ އިދާރާގައި 14 އަހަރު ޚިދުމަތް ކުރެއްވިއިރު އިގްތިސާދީ ރިސާރޗްގެ ދާއިރާއިން އެކި މަގާމުތައް ވަނީ ފުރުއްވާފައެވެ.

މާލިއްޔަތު ކޮމިޓީގައި ގަވަރުނަރު މުނައްވަރު ވިދާޅުވީ ރާއްޖޭގެ މާލީ ދާއިރާއަކީ ރާއްޖޭގެ އިގްތިސާދު އެންމެ ބޮޑަށް ސިންދަފާތު ކުރެވޭނެ އެއް ދާއިރާ ކަމަށާއި، އޭނާގެ ގަވަރުނަރުކަމުގައި ކުރިއަށް އޮތް ފަސް އަހަރު ދުވަހުގެ ތެރޭގައި އެ ދާއިރާއަކީ މި ސަރަހައްދުގެ އެއްވަނަ ދާއިރާއަށް ހެދުމުގެ އަމާޒު ގެންގުޅުއްވާ ކަމަށެވެ. އަދި އުފެއްދުންތެރިކަމުގެ ނިސްބަތުން ރާއްޖޭގެ މާލީ ދާއިރާއަކީ 6 އިންސައްތަކަމަށާއި ފަސް އަހަރުތެރޭ އެ އަދަދު ދެގުނަ ކުރުމަކީ އަމާޒެއް ކަމަށް މުނައްވަރު ވިދާޅުވިއެވެ.