ނޭޝަނަލް ޑްރަގް އެޖެންސީގެ މައިގަނޑު އެއް މަސައްކަތަކީ މަސްތުވާތަކެތި ބޭނުންކުރާ ފަރާތްތައް މުޖުތަމަޢުއަށް ނެރުމަށް ކުރާ މަސައްކަތެވެ. މަސްތުވާތަކެތި ބޭނުންކުރާ މީހުން މުޖުތަޢުއަށް ނެރުމަށް ދެވޭ ފަރުވާއަކީ ކޮމިއުނިޓީ ފަރުވާއެވެ. ކޮމިއުނިޓީ ފަރުވާއަކީ މަސްތުވާތަކެތި ބޭނުންކުރާ ފަރާތްތައް މުޖުތަމަޢުން އެކަހެރިކޮށްގެން ދެވޭ ފަރުވާކަމަށްވާ ރެސިޑެންޝިއަލް ފަރުވާއަށްފަހު މުޖުތަމަޢުގެ ތެރޭގައި ހުރެގެން މަސްތުވާތަކެތީގެ ވަބާއިން ސަލަމާވުމަށް އެހީތެރިވުމުގެ ގޮތުން ކުރިއަށްގެންދާ ފަރުވާއެކެވެ. އެގޮތުން މުޖުތަމަޢުން އޭނާއަށް ދިމާވާ ގޮންޖެހުންތައް ހުރަސްކޮށް، ކާމިޔާބު ދިރިއުޅުމެއް އުޅުމަށްޓަކައި، ނަފްސާނީ، ދީނީ އަދި ފަންނީ ހުނަރުތައް ދަސްކޮށްދީ އެހުނަރުތައް އަށަގެންނެވުމަށް ދެވޭ ފަރުވާއެކެވެ. އެހެންކަމުން މިފަރުވާގެ މައިގަނޑު އަމާޒަކީ މި ޕްރޮގްރާމް ފުރިހަމަކޮށް މުޖުތަޢުގެ ތެރެއަށް އޭނާ ނުކުމެގެން ދިއުމުން، އެހެންމީހުންނެކޭ އެއްފަދައިން އަމިއްލަ މަސައްކަތުން ކާމިޔާބު ދިރިއުޅުމެއް އުޅުމެވެ.
ނޭޝަނަލް ޑްރަގް އެޖެންސީގެ ކައުންސިލަރ އަޙްމަދު ޙިލްމީ ވިދާޅުވީ، މަސްތުވާތަކެތި ބޭނުންކުރާ މީހުންގެ ތެރެއިން އެސެންޓަރުން ފަރުވާ ހޯދާ މީހުންގެ ނުވަދިހަ ފަހެއް އިންސައްތަ މީހުން ކާމިޔާބުކަމާއިއެކު ފަރުވާ ނިންމާ މުޖުތަޢުގެ ތެރޭގައި ޒިންމާދާރު ވަޒީފާތަކުގައި ދިރިއުޅުން ފަށާފައިވާކަމަށެވެ. މިއަހަރުގެ މިހާތަނަށް އެސެންޓަރަށް ފަރުވާ ހޯދުމަށް 259 މީހުން އައިކަމަށައި، އެއީ 248 ފިރިހެނުންނާއި 11 އަންހެނުންކަމަށް އޭނާ ވިދާޅުވިއެވެ. އޭގެތެރެއިން މިހާތަނަށް 169 މީހަކު ފަރުވާ ފުރިހަމަކުރުމަށްފަހު ރިލީޒްކުރެވިފައިވާކަމަށް ޙިލްމީ ވިދާޅުވިއެވެ. އަދި ފަރުވާ ފުރިހަމަ ނުކުރެވުނު 28 މީހަކު ފަރުވާއިން ވަކިކޮށްފައިވާކަމަށްވެސް ވިދާޅުވިއެވެ. ފަރުވާ ފުރިހަމަނުކުރެވި ފަރުވާ ހުއްޓުމަކަށް ނުވަތަ ފަރުވާއިން ވަކިވާން ޖެހޭ ސަބަބުތަކުގެ ތެރޭގައި އަމިއްލަ ނަފްސަށް ތެދުވެރި ނުވުމާއި، ޢާއިލާއާއި ރައްޓެހިންގެ ތެރޭގައި އުޅުމުގެ ސަބަބުން ފަރުވާ ކުޑަވުން ހިމެނޭކަމަށް ޙިލްމީ ވިދާޅުވިއެވެ.
ނޭޝަނަލް ޑްރަގް އެޖެންސީގެ ކައުންސިލަރ ރަޝީދާ ޢަބްދުﷲ ވިދާޅުވީ، މަސްތުވާތަކެތި ބޭނުންކުރާ މީހުން މުޖުތަމަޢުއަށް ނެރުމަށްޓަކައި އެސެންޓަރުން ދެއްވާ މައިގަނޑު ފަރުވާތަކުގެ ތެރޭގައި އިސްކަންދެއްވަނީ، އެމީހުންގެ އުޅުމާއި އަޙްލާޤް ބައްޓަން ކުރުމާއި، ނަފްސާނީ ދުޅަހެޔޮކަމާއި، ރޫޙާނީ ދުޅަހެޔޮކަމާއި، މައިންބަފައިނާއި އަނބިދަރިންނަށް ޒިންމާދާރުކަމާއި އަޅާލުމާއި ލޯބި ދޭނެ ގޮތްތައް ފަދަ ކަންތައްތައް ދަސްކޮށްދިނުމަށްކަމަށެވެ.
ނޭޝަނަލް ޑްރަގް އެޖެންސީގެ ޖާގައަކީ 250 މީހުންނެވެ. އެސެންޓަރުން ވިދާޅުވީ ފަރުވާ ޕްރޮގްރާމް ފުރިހަމަ ކުރާ މީހަކީ މުޖުތަމަޢު ބަލައިގަންނަ މީހަކަށް ވާނީ، އެމީހަކު ކުރިން ގެންގުޅުނު ނުރަނގަޅު ހުރިހާ އާދަތަކެއް ދޫކޮށްގެންކަމަށެވެ. އެހެންކަމުން އެފަދަ ފަރާތްތަކުގެ ބެލެނިވެރިން ބާރުވެރިކޮށް އެމީހުންގެ ދަރިފުޅު އެކަމުން ސަލާމަތްކުރުމަށް އެކަށީގެންވާ ބާރެއް ނުވަތަ މަސައްކަތްތަކެއް ކުރެވޭ ބަޔަކަށް ހެދުމަށް އެސެންޓަރުން ޚާއްސަ އިސްކަމެއް ދެއްވާކަމަށެވެ.