އޮޅުވެލި ބީޗު ރިސޯޓްގެ މުވައްޒަފުންނަށް އަމާޒުކޮށްގެން، އެމްއެންޑީއެފް ކޯސްޓްގާޑުން ކަނޑުމަތީގެ ސަލާމަތާއި ރައްކާތެރިކަމަށް ހޭލުންތެރިކުރުމުގެ ޕްރޮގްރާމެއް ފަށައިފިއެވެ.
މިއަދާއި މާދަމާ، ދެ ދުވަހުގެ ނިޔަލަށް އެ ރިސޯޓްގައި ހިންގާ މި ޕްރޮގްރާމްގައި އެ ރިސޯޓުގެ 16 މުވައްޒަފަކު ވަނީ ބައިވެރިވެފައެވެ. ނެވިގޭޝަން އާއި ރެސްކިޔު އަދި ފަސްޓްއެއިޑް ފަދަ ބައިތައް މައިގަނޑުގޮތެއްގައި ކިޔަވައިދިނުމަށް ހަމަޖެހިފައިވާ މި ޕްރޮގްރާމުގައި، ކަނޑުމަތީގައި ދިމާވާ ހާދިސާތަކާ ގުޅޭ މަޢުލޫމާތާއި އެފަދަ ހާދިސާއެއް ދިމާވެއްޖެނަމަ ޢަމަލު ކުރާނެ ގޮތްތައް ދަސްކޮށްދިނުމަށް ވަނީ ހަމަޖެހިފައެވެ. މީގެ އިތުރުން، މި ޕްރޮގްރާމުގައި ސުވިމިންގ އަދި ރެސްކިއު ސުވިމިންގ ކުލާސްތައްވެސް ނަގައިދިނުމަށް ވަނީ ހަމަޖެހިފައެވެ. img:http://s3.psmnews.mv/images/660x400/14638216506606.jpg|އޮޅުވެލި ރިސޯޓްގެ މުވައްޒަފުންނަށް ކޯސްޓްގާޑުން ކަނޑުމަތީގެ ސަލާމަތާބެހޭ ހޭލުންތެރިކުރުމުގެ ޕްރޮގްރާމެއް ފެށުން - ފޮޓޯ: އެމްއެންޑީއެފް
ތިއަރީ އާއި ޕްރެކްޓިކަލް ހިމަނައިގެން ކުރިއަށްގެންދިޔުމަށް ހަމަޖެހިފައިވާ މި ޕްރޮގްރާމަކީ، އޮޅުވެލި ބީޗު ރިސޯޓުގައި މަސައްކަތްކުރާ މުވައްޒަފުން ކަނޑުމަތީގެ ސަލާމަތާއި ރައްކާތެރިކަމަށް އަހުލުވެރިކުރުމުގެ މަޤްޞަދުގައި ހިންގޭ ޕްރޮގްރާމެކެވެ. މި ޕްރޮގްރާމުގައި މުދައްރިބުންގެ ގޮތުގައި ހަރަކާތްތެރިވަނީ އެމްއެންޑީއެފް ކޯސްޓްގާޑު ޓްރޭނިންގ ޑިޕާޓްމަންޓްގެ ހުނަރުވެރި މުދައްރިބުންނެވެ.