ރާއްޖޭގެ ތަރައްގީއާ ގުޅޭގޮތުން ޗައިނާގެ އެކި ކުންފުނިތަކާއެކު މަޝްވަރާކޮށްފި

ރާއްޖޭގެ ތަރައްގީއާ ގުޅޭގޮތުން ޗައިނާގެ އެކި ކުންފުނިތަކާއެކު މަޝްވަރާތައް ކޮށްފިއެވެ.

މިމަޝްވަރާތައް ކޮށްފައިވަނީ ރާއްޖޭގެ 3 ވަޒީރަކު މިހާރު ޗައިނާއަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ. މިމަހުގެ 20 އިން 24 އަށް ކުރިއަށްގެންދާ މިދަތުރުފުޅުގައި ޚާރިޖީ ވަޒީރު މޫސާ ޒަމީރާއި، މާލީ ވަޒީރު ޑރ. މުޙައްމަދު ޝަފީޤާއި، އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ބައިވެރިވެވަޑައިގަންނަވައެވެ.

ޚާރިޖީ ވަޒީރު މޫސާ ޒަމީރު ވިދާޅުވެފައިވާ ގޮތުގައި 3 ވަޒީރުން ވަނީ ޗައިނާ ސްޓޭޓް ކޮންސްޓްރަކްޝަން އިންޖިނިއަރިން ކޯޕަރޭޝަން (ސީއެސްސީއީސީ)ގެ މެނޭޖިން ޑިރެކްޓަރު ޗެން ލައިއާ ބައްދަލުކުރައްވައި އެކުންފުނީގެ އެގްޒިބިޝަން ސެންޓަރަށް ޒިޔާރަތްކުރައްވާފައެވެ. އަދި ތަރައްޤީގެ މުހިންމު މަޝްރޫއުތަކާއި ގުޅޭގޮތުންނާއި ކުރިއަށް އޮތް ތަނުގައި ދެޤައުމުގެ ގުޅުން ބަދަހިކުރުމާ ގުޅޭގޮތުން މަޝްވަރާކުރެއްވި ކަމަށްވެސް ވިދާޅުވިއެވެ.

މިބައްދަލުކުރެއްވުންތަކުގެ ތެރެއިން ޗައިނާ މެޝިނަރީ އިންޖިނިއަރިން ކޯޕަރޭޝަން (ސީއެމްއީސީ)ގެ ޗެއާމަން ވަންގް ބޯއާ ވެސް ވަޒީރުން ވަނީ ބައްދަލުކުރައްވާފައެވެ. މި ބައްދަލުކުރެއްވުމުގައި ރާއްޖޭގެ ތަރައްޤީއާ ގުޅޭ ގިނަ ދާއިރާތަކުން މަޝްވަރާކުރައްވާފައިވާ ކަމަށް ޚާރިޖީ ވަޒީރު ވިދާޅުވިއެވެ. އެގޮތުން، އިޖްތިމާއީ ބޯހިޔާވަހިކަމާއި، އިއާދަކުރަނިވި ހަކަތައިގެ ދާއިރާއިން ވަނީ މަޝްވަރާކުރައްވާފައެވެ.

މި ބައްދަލުކުރެއްވުމުގައި ރަސްމާލެ އާއި ގުޅީ ފަޅުގެ މަޝްރޫއުތަކާއި ގުޅޭގޮތުންވެސް ވަނީ މަޝްވަރާކުރައްވާފައެވެ.

ވަޒީރުންގެ މި ދަތުރުފުޅުގައި ޗައިނާ ކޮމިއުނިކޭޝަންސް ކޮންސްޓްރަކްޝަން ކޮމްޕެނީ (ސީސީސީސީ)ގެ ޗެއަރމަން ވަންގ ޓޮންގޒޯ އާވެސް ވަނީ ބައްދަލުކުރައްވާފައެވެ. މި ބައްދަލުކުރެއްވުމުގައި ރާއްޖޭގެ އިޖުތިމާޢީ އަދި އިގްތިސާދީ ތަރައްގީގައި އެ ކުންފުނީގެ ދައުރާއި ސިނަމާލެ ބްރިޖާ ގުޅޭގޮތުން ވަނީ މަޝްވަރާ ކުރައްވާފައެވެ.

ރާއްޖޭގެ ތަރައްގީއަށް ސީސީސީސީގެ މުހިންމު ދައުރަށް ޝުކުރުވެރިވެވަޑައިގަންނަވާކަމަށާއި ގުޅިގެން ކުރިއަށް އޮތްތަނުގައިވެސް މަސައްކަތްކުރުމަށް ބޭނުންފުޅުވާ ކަމަށް ޚާރިޖީ ވަޒީރު ވިދާޅުވިއެވެ.

މި ދަތުރުފުޅުގެ ތެރެއިން ވަޒީރުން ވަނީ ޗައިނާގެ ޓިއަންޔިންގ އިންކް، ސީއެންޓީވައި، ކުންފުނީގެ ޗެއަރމަން ޑރ. ޔަން ގެންގްޖުންއާވެސް ބައްދަލުކުރައްވާފައެވެ. މި ބައްދަލުކުރެއްވުމުގައިވަނީ ކުނި މެނޭޖްކުރުމާއި، ރަށްރަށުގައި ކުރިއަށްދާ އުމްރާނީ ހިދުމަތްތަކުގެ މަޝްރޫޢުތަކުގެ މައުލޫމާތު ހިއްސާކޮށް، މިފަދަ މަޝްރޫޢުތަކާއި ރާއްޖޭގެ ދެމެހެއްޓެނިވި ތަރައްޤީގެ ދާއިރާއިން އަންނާނެ ކުރިއެރުންތަކާއި ގުޅޭގޮތުން ވަނީ މަޝްވަރާކުރައްވާފައެވެ.

އަދި މީގެއިތުރުން އިއާދަކުރަނިވި ދާއިރާއިން ރާއްޖޭގައި ހުރި އިންވެސްޓްމަންޓުގެ ފުރުސަތުތަކާއި ގުޅޭގޮތުންވެސް މި ބައްދަލުވުމުގައިވަނީ މަޝްވަރާކުރައްވާފައެވެ.

ޗައިނާ ޓިޔަންޔިން އިންކް، ސީއެންޓީވައި އާއެކު ރާއްޖެއިން މިހާރުވެސް ދަނީ މަސައްކަތްތަކެއް ކުރަމުންނެވެ. އެގޮތުން ތިމާވެށި ހިމާޔަތްކުރުމާއި އިއާދަކުރަނިވި ހަކަތައިގެ ދާއިރާއިން 2 އަހަރު ދުވަހުގެ މުއްދަތަށް ގުޅިގެން މަސައްކަތް ކުރުމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާ އާއި ޗައިނާ ޓިޔަންޔިން އިންކް (ސީއެންޓީވައި) އާއެކު އެމްއޯޔޫއެއްގައި ވަނީ މިއަހަރުގެ މާޗުމަހު ސޮއިކޮށްފައެވެ.

ތިން ވަޒީރުން ޗައިނާއަށް ކުރައްވާ ދަތުރުފުޅަކީ ޗައިނާގެ ޚާރިޖީ ވަޒީރު ވަންގް ޔީގެ ދަޢުވަތަކަށް ކުރައްވާ ދަތުރުފުޅެކެވެ. މި ދަތުރުފުޅުގައި ޗައިނާގެ ޚާރިޖީ ވަޒީރާ ބައްދަލުކުރައްވާ ޗައިނާ ސަރުކާރުގެ އިސްވެރިންނާ ބައްދަލުކުރައްވާނެއެވެ. އަދި ރާއްޖޭގެ އިޤުތިޞާދު ކުރިއެރުމުގައި މުހިންމު ދައުރެއް އަދާކުރާ ޗައިނާގެ ގިނަ ކުންފުނިތަކަކާ މި ދަތުރުފުޅުގެ ތެރެއިން ބައްދަލުކުރައްވާނެއެވެ.

މިދަތުރުފުޅުގައި ވަޒީރުންގެ އަރިހުގައި ސަރުކާރުގެ އިސްވެރިންގެ ވަފުދެއް، ބައިވެރިވެ ވަޑައިގަންނަވައެވެ.