ވޭތުވެދިޔަ ތިން ދުވަހު މެދުކެނޑުމެއް ނެތި ސްރީލަންކާގެ ބޮޑު ބަޔަކަށް ކުރި ވިއްސާރައިގައި 6 މީހުން މަރުވެއްޖެއެވެ.
ސްރީލަންކާއަށް ކުރަމުންދާ މިވިއްސާރައިގައި 2 މީހުން ގެއްލި، އެތައްހާސް ބަޔަކު ގެދޮރު ދޫކޮށް ރައްކާތެރި ސަރަޙައްދުތަކަށް ބަދަލްވާން ޖެހިފައިވެއެވެ. މި ވިއްސާރައިގެ އަސަރު އެންމެ ބޮޑަށް ކޮށްފައިވަނީ ސްރީލަންކާގެ ކޮލޮމްބޯއާއި ފަރުބަދަމަތީގެ ސަރަޙައްދެއް ކަމަށްވާ ނުވަރައެލިޔާއަށް ކަމަށް ޚަބަރު ލިބެއެވެ. ނުވަރައެލިޔާއަށް ބޯކޮށް ވާރޭ ވެހުމުގެ ސަބަބުން ފެންބޮޑުވެ، ބިންގަނޑު ކަނޑައިގެންދިއުމުގެ ޙާދިސާތައް ހިނގަމުންދާއިރު، ބައެއް ސަރަޙައްދުތަކުގައި ގަސްތައް މުލުން ލުހި، ޢިމާރާތްތަކަށް ގެއްލުންވުމުގެ އިތުރުން ބައެއް މަގުތަކަށް ގެއްލުން ލިބިފައިވާ ކަމަށް ރޮއިޓަރސްއިން ޚަބަރުދެއެވެ.
ވޭތުވެދިޔަ 3 މަސް ދުވަހު ސްރީލަންކާއަށް ކުރިމަތިވި ގަދަ ހޫނަށްފަހު މި ފެށި ވިއްސާރައިގެ ސަބަބުން ޙާލުގައި ޖެހިފައިވާ މީހުންނަށް އެހީވުމަށް، އެޤައުމުގެ ރައީސް މައިތިރިޕަލަ ސިރިސޭނާގެ އަމުރުފުޅަށް އެޤައުމުގެ ސިފައިން ކުއްލި ޙާލަތަށް ގެނެސް، އެހީގެ ކަންތައްތަކުގައި މިހާރު ވަނީ ޙަރަކާތްތެރިވާން ފަށާފައެވެ.