ގަވަރަނަރު ޢަލީ ޙާޝިމް މަގާމުން ވަކިކުރަން ރައީސުލްޖުމްހޫރިއްޔާއަށް ލަފާދޭން ފާސްކޮށްފި

މޯލްޑިވްސް މަނިޓަރީ އޮތޯރިޓީ، އެމްއެމްއޭގެ ގަވަރނަރު އަލީ ހާޝިމް މަގާމުން ވަކިކުރުމަށް ރައީސުލްޖުމްހޫރިއްޔާއަށް ލަފާދިނުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސްކޮށްފިއެވެ.

މިގޮތަށް ފާސްކޮށްފައިވަނީ މިއަދު ބޭއްވި މާލިއްޔަތު ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އަޣުލަބިއްޔަތުންނެވެ.

ގަވަރަނަރު އަލީ ހާޝިމް މަގާމުން ވަކިކުރުމަށް ރައީސަށް ލަފާ ދެއްވުމުގެ މައްސަލަ ކޮމިޓީއަށް ހުށަހެޅުއްވީ މަޖިލީހުގެ ނައިބުރައީސް އަދި ދިއްގަރު ދާއިރާގެ މެންބަރު އަޙްމަދު ނާޒިމެވެ. އެ މައްސަލަ ހުށަހަޅުއްވައި ނާޒިމް ވިދާޅުވީ ގަވަރަނަރުގެ ޒިންމާ ޢަލީ ހާޝިމަށް އަދާކުރެވޭކަމަށް ގަބޫލުނުކުރައްވާ ކަމަށެވެ.

ނާޒިމް ވިދާޅުވީ މަރުކަޒީ ބޭންކަކީ ފައިސާ ނެރުމާއި ލިބެން ހުންނާނެ ގޮތް ހަމަޖެއްސުމާއި ދިވެހި ރުފިޔާގެ ބައިނަލްއަގުވާމީ އަގު ކަނޑައެޅުމާއި ބޭންކިންއާބެހޭ އަދި މަނިޓަރީ މުއާމަލާތާބެހޭ ކަންކަމުގައި ސަރުކާރަށް ލަފާ ދިނުމާއި މާލީ ކަނކަން ހަރުދަނާގޮތުގައި ކުރިއަށްގެންދިއުމަށް ބޭންކު މުއާމަލާތާބެހޭ އުސޫލުތައް އެކަށައަޅައި އެކަންކަން ހިނގާ ނުހިނގާގޮތް ބެލުމުގެ ޒިންމާ އަދާކުރާ އިދާރާކަމަށެވެ. އަދި ޤައުމެއްގެ އިގްތިސާދު ކުރިއަށްގެންދިއުމުގެ އެންމެ މުހިންމު އެއް އަސާސަކީ މަނިޓަރީ ޕޮލިސީ ކަމަށވީނަމަވެސް އެ ޕޮލިސީ އެންމެ އެކަށޭނެ ގޮތެއްގައި ހިނގަމުންދާކަން ފެންނަން ނެތްކަމަށް އެމަނިކުފާނު ވިދާޅުވިއެވެ.

ރާއްޖޭގައި ހިންގާ ބޭންކުތަކާއި ފައިނޭންޝަލް އންސްޓިޓިއުޝަންތަކުން އާންމުންނަށް ލޯނު ދޫކުރާ މިންވަރު ނުސީދާކޮށް އެމްއެމްއޭއިން ހިފަހައްޓައި ބޭންކުތަކުގެ ނިޒާމު އެއްމިނެއްގައި ހިފެހެއްޓުމަށް ޤާނޫނީ ބާރު އަޅުއްވާފައިވާކަން ނާޒިމް ފާހަގަކުރެއްވިއެވެ. މީގެ ސަބަބުން އިގްތިސާދުގެ ތެރޭގައި ދައުރުވާން ހުރި ފައިސާ މަދުވެ، އިގްތިސާދީ މަސައްކަތްތައް ހުއްޓި، އިގްތިސާދީ ދުވެލި މަޑުޖެހިފައިވާކަމަށްވެސް ވިދާޅުވިއެވެ.

މީގެ އިތުރުން ސަރުކާރުން ފައިސާ ހޯދަމުންދަނީ ޑޮމެސްޓިކް މާކެޓުންކަން ފާހަގަކުރައްވައި ނާޒިމް ވިދާޅުވީ އެ މާކެޓް ރަނގަޅަށް ރެގިއުލޭޓް ކުރުމުގެ މުހިންމުކަން ބޮޑުވެފައިވާ ދަނޑިވަޅެއްގައި އެކަން ކުރަމުންދާތަން ނުފެންނަ ކަމަށެވެ. އަދި ދާޚިލީ ސަލާމަތާއި ފަންނިއްޔާތާބެހޭ ވުޒާރާ އާއި ފުލުހުންގެ ފަރާތުން މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީއާ ހިއްސާކޮށްފައިވާ މައުލޫމާތްތަކުގައި ކުށްކުރުމަށް ހުރި ގޮންޖެހުންތަކުގެ ތެރޭގައި އެމްއެމްއޭގެ ގަވާއިދުތައް އަދާހަމަކުރެވިފައިނުވާ މައްސަލަ ފާހަގަކޮށްފައިވާ ކަމަށާއި އެމްއެމްއޭގެ ޤާނޫނުގައި ސަރީހަ އިބާރާތުން ބަޔާންކޮށްފައިވާ މައިގަނޑު މަގުސަތުތައް ހާސިލްކުރުމަށް 17 ނޮވެމްބަރުން ފެށިގެން މިހާތަނަށް ސަރުކާރަށް ލަފާ ދިނުމާއި އެ މަގުސަދު ހާސިލްކުރުމަށް އަމަލީގޮތުން ހަރުދަނާ މަސައްކަތްތަކެއް ކޮށްފައިނުވާކަމަށްވެސް ނާޒިމް ވިދާޅުވިއެވެ.

ނާޒިމް ވިދާޅުވީ ޤައުމުގެ އިގްތިސާދު ހީނަރުވެ، ޤައުމު ބޮޑު އިގްތިސާދީ ކާރިސާއަކުން ސަލާމަތްކުރުމަށް އެމްއެމްއޭއަކީ މުހިންމު މަސައްކަތްތަކެއް ކުރަންޖެހޭ މުއައްސަސާއަކަށްވާއިރު އެމްއެމްއޭގެ އިސްވެރިޔާގެ ހައިސިއްޔަތުން ގަވަރަނަރުގެ މަސްއޫލިއްޔަތުތައް އެންމެ ފުރިހަމަގޮތުގައި އަދާކޮށްފައި ނުވާ ކަމަށެވެ. އަދި މިދަނޑިވަޅަކީ އެމްއެމްއޭއިން މަނިޓަރީ ޕޮލިސީގެ މިސްރާބު ބަދަލުކުރަންޖެހޭނަމަ އެކަން ކުރަންޖެހޭ ވަގުތުކަމުން މަރުކަޒީ ބޭންކަށް އައު ލީޑަރޝިޕެއް ބޭނުންވާކަމަށްވެސް އެމަނިކުފާނު ވިދާޅުވިއެވެ.

ޤާނޫނުގައި އޮންނަ ގޮތުން މަޖިލީހުގެ ލަފާގެ މަތިން އެމްއެމްއޭގެ ގަވަރުނަރު ރައީސުލްޖުމްހޫރިއްޔާއަށް ވަކިކުރެވޭނެއެވެ. މިހާރުގެ ގަވަރަނަރު އަލީ ހާޝިމް އެ މަގާމަށް އައްޔަން ކުރައްވާފައިވަނީ 8 ސެޕްޓެމްބަރު 2019ގައެވެ.