ފައިސާ ބަރާބަރަށް ދެވޭނީ އެކަށީގެންވާ އަގެއްގައި މަސް ގަނެގެން، އަގު މުރާޖާ ކުރަންޖެހޭ: ނާޡިމް

މަސްވެރިންނަށް ބަރާބަރަށް ފައިސާ ދެވޭނީ އެކަށީގެންވާ އަގެއްގައި މަސް ގަނެގެން ކަމަށާއި، މަސް ގަންނަ އަގު މުރާޖާ ކުރަންޖެހޭ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަޙްމަދު ނާޡިމް ވިދާޅުވެއްޖެއެވެ.

ނާޡިމް މިހެން ވިދާޅުވީ، މިފްކޯއިން މަސްވެރިންނަށް ފައިސާ ނުދީ ހުރުމުން މަސްވެރިން ކުރަމުން އަންނަ އިހުތިޖާޖާ ގުޅިގެން އެކަން ހައްލުކުރަން ސަރުކާރުން ހައްލެއް ހޯދައިދިނުމަށް ގޮވާލައި އެމްޑީޕީން ހުށަހެޅި ކުއްލި މައްސަލައަށް ބަހުސް ކުރައްވަމުންނެވެ. މި މައްސަލަ މަޖިލީހަށް ހުށަހެޅުއްވީ މަރަދޫ ދާއިރާގެ މެންބަރު އަޙްމަދުދީދީ އެވެ.

ކުއްލި މައްސަލައަށް ބަހުސް ކުރައްވަމުން މަޖިލީހުގެ ނައިބު ރައީސް އަޙްމަދު ނާޡިމް ވިދާޅުވީ، މިފްކޯއިން މިހާރު މަސް ގަންނަމުން އަންނަ އަގަކީ އެ ކުންފުންޏަށް ދެކޮޅު ޖެހޭ އަގެއް ނޫން ކަމަށެވެ. އަދި ދެމެހެއްޓެނިވި ގޮތެއްގައި މަސްވެރިން ބާނާ މަސް މިފްކޯއަށް ގަނެވޭނީ އެކަށީގެންވާ އަގެއްގައި މަސް ގަނެގެންކަމަށެވެ.

ނާޡިމް ވިދާޅުވީ، މަސްވެރިންނަށް ފައިސާ ނުދެވެނީ މި ސަރުކާރު ވެރިކަމާ ހަވާލުވިއިރު ޤައުމުގެ ހާލަތު ހުރިގޮތުން ކަމަށެވެ. ނަމަވެސް ކުރީ ސަރުކާރުން ނުދީ ހުރި ފައިސާ ހިމެނޭހެން ގިނަ އަދަދެއްގެ ފައިސާ މި ސަރުކާރުން މަސްވެރިންނަށް ދީފައިވާ ކަމަށާއި ޤައުމުގެ ހާލަތު އެންމެންވެސް ޤަބޫލުކުރަންޖެހޭ ކަމަށް އެމަނިކުފާނު ވިދާޅުވިއެވެ.

"އަޅުގަނޑުމެން ޕާޓީގެ ކުލަތަކާއި ރޮނގުތައް ފަހަނައަޅައި އަޅުގަނޑުމެން އެބަޖެހޭ ހަގީގަތް ގަބޫލުކުރާ ބަޔަކަށްވާން. 12 ރުފިޔާއަށްވިޔަސް 15 ރުފިޔާއަށްވިޔަސް ދެވެން އޮތް އަގެއްގައި ދެކޮޅުޖެހޭ އަގެއްގައި މިކަން ކުރީމައި މަސްވެރިންނަށް ލާރިކޮޅު ބަރާބަރަށް ލިބޭނެ." މަޖިލީހުގެ ނައިބު ރައީސް އަޙްމަދު ނާޡިމް ވިދާޅުވިއެވެ.

މި މައްސަލައާ ގުޅޭގޮތުން އޭދަފުށި ދާއިރާގެ މެންބަރު އަޙްމަދު ސަލީމް ވިދާޅުވީ މަސްވެރިންގެ މައްސަލައަކީ އެއްވެސް ސަރުކާރަކަށް މިހާތަނަށް ހައްލުނުކުރެވި އޮތް މައްސަލައެއް ކަމަށެވެ. އަދި މި ސަރުކާރުން އެ ހާލަތު ބަދަލުކުރުމަށް ބުރަ މަސައްކަތްތަކެއް ކުރައްވަމުން ގެންދަވާކަމަށެވެ.

އެގޮތުން، ކުރީ ސަރުކާރުން ފަސް އަހަރު ދުވަހުގެ ތެރޭގައި ފައިސާ ޗާޕުކޮށްގެންވެސް މަސްވެރިންނަށް ދޭން ޖެހޭ ފައިސާ ނުދެވުނު ކަމަށެވެ. އަދި މި ސަރުކާރުން ފައިސާ ޗާޕުނުކޮށް މަސްވެރިންނަށް ދޭންޖެހޭ ފައިސާގެ ބޮޑު ބައެއް ދީ ޚަލާސްކޮށްފައިވާ ކަމަށް ސަލީމް ވިދާޅުވިއެވެ.

"މީގެ ކުރިން އަބަދުވެސް މަސްވެރިންނަށް ދޭން އޮންނާނެ 200 މިލިއަން 300 މިލިއަން ރުފިޔާ. އެހެން ނަމަވެސް މި ސަރުކާރުން މިހާލަތުގައިވެސް މަސްވެރިންނަށް މިއޮތީ އެންމެ 50 އަކަށް މިލިއަން ރުފިޔާ ދޭން. ލާރި ނެތި، ފައިސާ ޗާޕުނުކޮށް، އެ ހާލަތުގައި އޮވެފަ 50 މިލިއަނަށް މި ދަށްކުރީ" އޭދަފުށީ ދާއިރާގެ މެންބަރު ސަލީމް ވިދާޅުވިއެވެ.

ސަލީމް ވިދާޅުވީ، މި ސަރުކާރުން މަސްވެރިންނަށް ވެވަޑައިގެންނެވި ވައުދުތައް މި ފަސް އަހަރު ދުވަހުގެ ތެރޭގައި ފުއްދަވާނެކަމުގެ ޔަޤީންކަން އެބައޮތް ކަމަށެވެ.

އެމްޑީޕީން ހުށަހެޅި މި މައްސަލައިގައި ވަނީ މިފްކޯއަށް ގަންނަ މަހަށް ފައިސާ ނުދީ ގިނަ ދުވަސްވާ މައްސަލައަށް ދާއިމީ ހައްލެއް ހޯދައި، ސަރުކާރުގެ ވައުދާ އެއްގޮތަށް 48 ގަޑިއިރު ތެރޭގައި އެ ފައިސާ ދޫކުރަން ގޮވާލާފައެވެ.