ފުލުހުންގެ އެހީގައި ފިޝަރީޒް ކޮމްޕްލެކްސްއަށް ކަރަންޓު ދިނުމުންވެސް ކަރަންޓު ކަނޑާލައިފި
-
ފުލުހުންގެ އެހީއާއެކު ކަރަންޓު ދިނީ ހަވީރު 5:30ގައި
-
ކަރަންޓު ކަނޑާލުމުން އަނެއްކާވެސް ކަރަންޓު ދޭން ދަނީ މަސައްކަތް ކުރަމުން
އައްޑޫ ފިޝަރީޒް ކޮމްޕްލެކްސްގައި ހިންގަމުންދާ އިހުތިޖާޖުގައި ފުލުހުންގެ އެހީތެރިކަމާއެކު އެ ކޮމްޕްލެކްސްއަށް ކަރަންޓު ދިނުމުން އަނެއްކާވެސް ކަރަންޓު ކަނޑާލާފައިވާކަމަށް މިފްކޯއިން ބުނެފިއެވެ.
މިފްކޯއިން މައުލޫމާތު ދިންގޮތުގައި އިހުތިޖާޖުގެ ބައިވެރިން ކަރަންޓު ދޭން ފުރުސަތު ނުދިނުމުގެ ސަބަބުން ފުލުހުންގެ އެހީތެރިކަމާއެކު ކަރަންޓު ދިނީ ހަވީރު 5:30ހާއިރުއެވެ. ނަމަވެސް އެއްވެފައިވާ މީހުންގެ އަމަލުތައް ހުރިގޮތުން އަނެއްކާވެސް ކަރަންޓު ކަނޑާލާފައިވާކަމަށާއި އަލުން ކަރަންޓު ދިނުމުގެ މަސައްކަތް ކުރަމުންއަންނަ ކަމަށް އެ ކުންފުނިން ބުންޏެވެ.
އެ ކުންފުނިން ބުނީ ހަވީރު ކަރަންޓު ދިނުމަށް ފުލުހުން މަސައްކަތް ކުރަމުންދިޔައިރު އެއްވެ ތިބި މީހުންގެ އަމަލުތައް ހުރިގޮތުން ބާރުގެ ބޭނުން ކުރި ކަމަށެވެ.
ބުރާސްފަތި ދުވަހުން ފެށިގެން އައްޑޫ ފިޝަރީޒް ކޮމްޕްލެކްސްގައި ކުރަމުން އަންނަ އިހުތިޖާޖުގައި ބައިވެރިވާ މީހުން މިފްކޯގެ މުދަލަށް ގެއްލުންދީފައިވާ ކަމަށް އެ ކުންފުނިން މައުލޫމާތުދެއެވެ. އަދި ހުއްދަ ނެތި ވަނުން މަނާ ސަރަހައްދުތަކަށް ވަދެ އެ ފެސިލިޓީގެ އޮޕަރޭޝަން ހުއްޓުވާގޮތަށް އަމަލުކޮށްފައިވާ ކަމަށާއި މުވައްޒަފުން ދިރިއުޅޭ ސަރަހައްދުފަދަ ތަންތަނަށް ކަރަންޓު ދޭން ފުރުސަތު ނުދިނުމުގެ ސަބަބުން މުވައްޒަފުންގެ ޒަރޫރީ ކަންކަމަށް ބުރޫއަރާފައިވާ ކަމަށްވެސް އެ ކުންފުނިން ބުނެއެވެ.