ސަރުކާރުން މަޖިލީހަށް 37 ބިލެއް މިދައުރުގައި ހުށަހަޅަނީ
-
މަޖިލީހުގެ ކޮންމެ ދައުރަކަށް ސަރުކާރުން ބިލުތައް ހުށަހަޅުއްވާ
-
ފަސް އަހަރު ތެރޭ 200 އަށްވުރެ ގިނަ ބިލު ހުށަހަޅަން ސަރުކާރުން ވަނީ ނިންމަވާފައި
ސަރުކާރުގެ ފަރާތުން ރައްޔިތުންގެ މަޖިލީހުގެ މިއަހަރުގެ ދެވަނަ ދައުރަށް 37 ބިލެއް ހުށަހަޅުއްވަން ނިންމަވައިފިއެވެ. މިބިލްތަކުގެ ލިސްޓްވަނީ މަޖިލީހަށް ފޮނުވާފައެވެ.
މިކަން އިއުލާންކުރައްވާފައިވަނީ 20ވަނ ރައްޔިތުންގެ މަޖިލީހުގެ ހަތަރުވަނަ ޖަލްސާގައި މަޖިލީހުގެ ރައީސް ޢަބްދުއްރަޙީމް އަބްދުﷲއެވެ.
ރައްޔިތުންގެ މަޖިލީހުގެ ކޮންމެ ދައުރެއްގައި ސަރުކާރުން ފާސްކުރަން ބޭނުންވާ ބިލުތައް ހިމެނޭހެން ލިސްޓެއް ބަންޑާރަ ނައިބުގެ އޮފީހުން މަޖިލީހަށް ހުށަހަޅައެވެ. އެގޮތުން، މިދައުރަށް ޖުމްލަ 37 ބިލުގެ ލިސްޓެއް ފޮނުއްވާފައިވާ ކަމަށް މިއަދުގެ ޖަލްސާގައި ރިޔާސަތުން ވަނީ ވިދާޅުވެފައެވެ.
ސަރުކާރުން 37 ބިލު މަޖިލީހަށް ފޮނުއްވާފައިވާއިރު ދެ ބިލެއްގެ ފުރަތަމަ ކިޔުން މިއަދު ވަނީ އިއްވާފައެވެ. އެގޮތުން، ޞިއްޙީ ޚިދުމަތް ދިނުމުގެ ޤާނޫނަށް އިސްލާހު ހުށަހެޅުމުގެ ބިލާއި، ސޮވްރިން ޑިވެލޮޕްމަންޓް ފަންޑުގެ ބިލުގެ ފުރަތަމަ ކިޔުން ވަނީ އިއްވާފައެވެ.
މިސަރުކާރުން ރާއްޖޭގެ ތަރައްގީއަށާއި ރައްޔިތުންނަށް ފައިދާހުރި ކަންކަން ކުރިއަށް ގެންދިއުމަށް ޤާނޫނަށް އިސްލާހު ގެނައުމާއި އައު ޤާނޫނުތައް ހެދުން ހިމެނޭހެން 200 އަށްވުރެ ގިނަ ބިލު މަޖިލީހަށް ހުށަހަޅުއްވަންޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.
ސަރުކާރުން ވަނީ ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރު ފެށުނުއިރު 24 ބިލެއް މަޖިލީހަށް ހުށަހަޅުއްވާފައެވެ.