ސޮވެނިއަރ ފިހާރައެއް ޤާއިމްކުރުމުގެ މަސައްކަތް ފެށީ 2021 ވަނަ އަހަރު: މަޖިލީހުގެ އިދާރާ

މަޖިލީހުގެ އިދާރާގައި ސުވެނިއަރ ފިހާރައެއް ޤާއިމްކުރުމުގެ މަސައްކަތް ފެށީ މިހާރު ހިނގަމުންދާ 20 ވަނަ މަޖިލީހުން ނޫންކަމަށާއި، އެއީ 2021 ވަނަ އަހަރު ފެށި މަސައްކަތެއްކަމަށް މަޖިލީހުގެ އިދާރާއިން ވިދާޅުވެއްޖެއެވެ.

ރައްޔިތުންގެ މަޖިލީހުގެ އިދާރާއިން މިކަން ހާމަކޮށްފައި މިވަނީ ސޮވެނިއަރ ފިހާރައިގެ މަސައްކަތް ފެށީ މިހާރު ހިނގަމުންދާ 20 ވަނަ ރައްޔިތުންގެ މަޖިލީހުގައިކަމަށް ބުނެ ބައެއް ފަރާތްތަކުން ހަޤީޤަތާއި ހިލާފު ވާހަކަތަކެއް ފަތުރަމުންދާ ދަނޑިވަޅެއްގައެވެ.

ރައްޔިތުންގެ މަޖިލީހުގެ މީޑިއާ އެންޑް ކޮމިއުނިކޭޝަން ޑިރެކްޓަރު ޙަސަން ޒިޔާޢު ވިދާޅުވީ ސުވެނިއަރ ފިހާރަތަކަކީ ދުނިޔޭގެ ހުރިހާ ޤާނޫނު ހަދާ މަޖިލިސްތަކުގައި އެތަނަށް ޒިޔާރަތްކުރާ މެހެމާނުންނަށް ސުވެނިއަރ ގަނެވޭގޮތަށް ހަދާފައި ހުންނަ ތަނެއް ކަމަށެވެ. އަދި ރައްޔިތުންގެ މަޖިލީހުގައި ސުވެނިއަރ ފިހާރައިގެ މަސައްކަތް ފެށީ 2021 ވަނަ އަހަރު ކަމަށާއި އޭރު އެތަނަށް ބޭނުންވާ ތަކެތި ފަރުމާކޮށްދޭނެ ފަރާތެއް ހޯދަން އިއުލާންކުރި ކަމަށްވެސް އޭނާ ވިދާޅުވިއެވެ.

ޒިޔާޢު ވިދާޅުވީ ސުވެނިއަރ ޝޮޕަށް ބޭނުންވާ ތަކެތި ޑިޒައިން ކުރާނެ ބަޔަކު ހޯދަން ފުރަތަމަ އިއުލާންކުރީ 21 ޖޫން 2021ގައެވެ. އެއަށްފަހު ދެ ފަހަރެއްގެ މަތިން އިއުލާން ކުރުމަށްފަހު މި މަހުގެ 2 ވަނަ ދުވަހު އަލުން އިއުލާން ކުރީ މީގެކުރިން ހުށަޅާފައިވާ އަގުތައް ބޮޑުކަމަށް ފެންނާތީ އެ ބަދަލުތައް ގެނައުމަށްފަހު ކަމަށްވެސް ޒިޔާޢު ވިދާޅުވިއެވެ.

ސުވެނިއާތަކުގެ ތެރޭގައި ދުނިޔޭގެ އެހެން ޤާނޫނު ހަދާ މަޖިލިސްތަކުގެ ސުވެނިއާ ޝޮޕްތަކުގައި ހުންނަ ފަދަ ގަލަމާއި ފޮތާއި ތަށި އަދި ސަމްސަލާއި އޫ ސެޓް ފަދަ ތަކެތި ހިމެނޭ ކަމަށްވެސް ޒިޔާޢު ވިދާޅުވިއެވެ. އަދި މި ތަކެއްޗަކީ މެންބަރުންނަށް ދޭން ނުވަތަ މެންބަރުންގެ ބޭނުމަށް ތައްޔާރުކުރާ ތަކެތި ނޫން ކަމަށްވެސް އޭނާ ވިދާޅުވިއެވެ.

އެހެންކަމުން ސޮވެނިއަރ ފިހާރައިގެ މަސައްކަތް ފެށީ މިހާރު ހިނގަމުންދާ 20 ވަނަ ރައްޔިތުންގެ މަޖިލީހުގައިކަމަށް ބުނެ ބައެއް ފަރާތްތަކުން ފަތުރަމުންދަނީ ހަޤީޤަތާއި ހިލާފު ވާހަކަތަކެއްކަމަށްވެސް ރައްޔިތުންގެ މަޖިލީހުގެ މީޑިއާ އެންޑް ކޮމިއުނިކޭޝަން ޑިރެކްޓަރ ވިދާޅުވިއެވެ.