ކޮމިޓީތަކުން ޕީއެންސީއަށް 151 ސްލޮޓް، އެމްޑީޕީއަށް 24 ސްލޮޓް

ރައްޔިތުންގެ މަޖިލީހުގެ ދާއިމީ ކޮމިޓީތަކުގަ މެންބަރުން ތަމްސީލުކުރާނެ ގޮތުގެ ރިޕޯޓް ފާސްކޮށްފިއެވެ.

މި ރިޕޯޓް ފާސްކޮށްފައިވަނީ މިއަދު ބޭއްވި 20 ވަނަ ރައްޔިތުންގެ މަޖިލީހުގެ ދެވަނަ ޖަލްސާގައެވެ. އެ ރިޕޯޓް ފާސްކުރުމަށް 88 މެންބަރުންގެ އަޣުލަބިއްޔަތުންނެވެ.

ރައްޔިތުންގެ މަޖިލީހުގައި ސަލާމަތީ ޚިދުމަތްތަކާބެހޭ ކޮމިޓީއާއެކު ޖުމްލަ 18 ދާއިމީ ކޮމިޓީއެއް ހިމެނެއެވެ. މި ކޮމިޓީތަކުގައި މަޖިލީހުގައި ހިމެނޭ ސިޔާސީ ޕާޓީތަކާއި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލް ކުރައްވާގޮތުގެ ރިޕޯޓް ފާސްކޮށްފައިވާއިރު މަޖިލީހުގެ ރައީސް ފިޔަވައި ކޮންމެ މެންބަރަކުވެސް ކޮންމެވެސް އެއް ކޮމިޓީގެ މެންބަރެއްގެ ގޮތުގައި އިންނަވަންނާނެއެވެ.

މަޖިލީހުގައި މިވަގުތު ތިއްބަވަނީ ޕީއެންސީގެ 75 މެންބަރުންނާއި އެމްޑީޕީގެ 12 މެންބަރުންނާއި އެމްޑީއޭގެ ދެ މެންބަރުންގެ އިތުރުން ޖުމްހޫރީ ޕާޓީގެ މެންބަރަކާއި އެމްއެންޕީގެ މެންބަރަކާއި ވަކި ޕާޓީއަކަށް ނިސްބަތްވެވަޑައިނުގަންނަވާ ދެ މެންބަރުންނެވެ. ކޮމިޓީތަކަށް ސްލޮޓުތައް ކަނޑައެޅުމުގައި ބަލާފައިވަނީ މަޖިލީހުގައި ޕާޓީތަކުން މެންބަރުން ތަމްސީލް ކުރައްވާ އަދަދަށެވެ.

މަޖިލީހުން ފާސްކޮށްފައިވާ ރިޕޯޓުގައިވާގޮތުން ދާއިމީ ކޮމިޓީތަކުގައި ޕީއެންސީއަށް 151 ސްލޮޓު ލިބެއެވެ. އަދި އެމްޑީޕީއަށް 24 ސްލޮޓް ލިބޭއިރު އެމްޑީއޭއަށް 4، ޖުމްހޫރީ ޕާޓީއަށް 2، އެމްއެންޕީއަށް 2 އަދި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުންނަށް 4 ސްލޮޓް ލިބެއެވެ. ސަލާމަތީ ޚިދުމަތްތަކާބެހޭ ކޮމިޓީ ފިޔަވައި ދާއިމީ 17 ކޮމިޓީގައި ހިމެނިވަޑައިގަންނަވާނީ ކޮންމެ ކޮމިޓީއެއްގައި 11 މެންބަރުންނެވެ.

ދާއިމީ 17 ކޮމިޓީގައި ޕާޓީތައް ތަމްސީލް ކުރައްވާ މެންބަރުން:

• އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ ކޮމިޓީ: ޕީއެންސީ 10، އެމްޑީޕީ 1
• ސްޓޭޓް އޯންޑް އެންޓަޕްރައިސަސް ކޮމިޓީ: ޕީއެންސީ 8، އެމްޑީޕީ 2، އެމްއެންޕީ 1
• ހިއުމަން ރައިޓްސް އެންޑް ޖެންޑަރ ކޮމިޓީ: ޕީއެންސީ 9، އެމްޑީޕީ 1، ޖުމްހޫރީ ޕާޓީ 1
• އެންވަޔަރަމަންޓް އެންޑް ކްލައިމެޓް ޗޭންޖް ކޮމިޓީ: ޕީއެންސީ 10، އެމްޑީޕީ 1
• ޖުޑީޝަރީ ކޮމިޓީ: ޕީއެންސީ 9، އެމްޑީޕީ 2
• ލާމަރުކަޒީ ކޮމިޓީ: ޕީއެންސީ 9، އެމްޑީޕީ 1، މިނިވަން 1
• ޚާރިޖީ ގުޅުންތަކުގެ ކޮމިޓީ: ޕީއެންސީ 9، އެމްޑީޕީ 2
• ޤައުމީ ތަރައްޤީއާއި ތަރިކައިގެ ކޮމިޓީ: ޕީއެންސީ 9، އެމްޑީޕީ 1، މިނިވަން 1
• ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީ: ޕީއެންސީ 8، އެމްޑީޕީ 2، އެމްޑީއޭ 1
• މިނިވަން މުއައްސަސާތަކުގެ ކޮމިޓީ: ޕީއެންސީ 9، އެމްޑީޕީ 1، އެމްއެންޕީ 1
• އިޖްތިމާޢީ ކޮމިޓީ: ޕީއެންސީ 9، އެމްޑީޕީ 1، މިނިވަން 1
• އިޤްތިސާދީ ކޮމިޓީ: ޕީއެންސީ 7، އެމްޑީޕީ 3، އެމްޑީއޭ 1
• މާލިއްޔަތު ކޮމިޓީ: ޕީއެންސީ 8، އެމްޑީޕީ 2، ޖުމްހޫރީ ޕާޓީ 1
• ގަވާއިދު ކޮމިޓީ: ޕީއެންސީ 9، އެމްޑީޕީ 1، އެމްޑީއޭ 1
• އިމްތިޔާޒާއި ސުލޫކު ކޮމިޓީ: ޕީއެންސީ 10، އެމްޑީޕީ 1
• ޕެޓިޝަން ކޮމިޓީ: ޕީއެންސީ 9، އެމްޑީޕީ 1، އެމްޑީއޭ 1
• އާންމު ކޮމިޓީ: ޕީއެންސީ 9، އެމްޑީޕީ 1، މިނިވަން 1

މީގެ އިތުރުން ސަލާމަތީ ޚިދުމަތްތަކާ ބެހޭ ކޮމިޓީގައި ހުރިހާ ސިޔާސީ ޕާޓީއެއްގެ މެންބަރުން ހިމެނިވަޑައިގަންނަވާނެހެން ޖުމްލަ 13 މެންބަރުން ތިއްބަވާނެއެވެ. އެއީ ޕީއެންސީގެ 8 މެންބަރުންނާއި އެމްޑީޕީ، އެމްޑީއޭ، ޖުމްހޫރީ ޕާޓީ އަދި އެމްއެންޕީގެ ތެރެއިން ކޮންމެ ޕާޓީއަކުން މެންބަރަކާއި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރެއް ހިމެނިވަޑައިގަންނަވައެވެ.