ކްރިމިނަލް ކޯޓުގެ ޝަރީއަތްތައް މާދަމާއިން ފެށިގެން ހުޅުމާލޭގައި!

ކްރިމިނަލް ކޯޓުގެ ޝަރީއަތްތައް ހުޅުމާލޭގައި ކުރިއަށްގެންދާ ހަމަޖައްސާފައިވާކަމަށް އެ ކޯޓުން ވިދާޅުވެއްޖެއެވެ.

ކްރިމިނަލް ކޯޓުގެ ޝަރީއަތްތައް ހުޅުމާލޭގައި ކުރިއަށްގެންދަން އެ ކޯޓުން ނިންމާފައި މިވަނީ ޖާގައިގެ ދަތިކަމުގެ މައްސަލަ އެ ކޯޓަަށް ވަރަށް ބޮޑަށް ކުރިމަތިވެފައިވާ ދަނޑިވަޅެއްގައެވެ.

ކްރިމިނަލް ކޯޓުން ވިދާޅުވީ ކްރިމިނަލް ކޯޓުގެ ޝަރީއަތްތައް ހުޅުމާލޭގައި ކުރިއަށް ގެންދިއުމަށް ހަމަޖެހިފައިވަނީ ހުޅުމާލޭގައި މީގެކުރިން ސިވިލް ކޯޓުގެ ޑިވިޝަން ހިންގި އިމާރާތުގައެވެ. އަދި މާދަމާއިން ފެށިގެން މި ބަދަލާއި އެއްގޮތަށް ޝަރީއަތްތައް ކުރިއަށްދާނެކަމަށްވެސް އެ ކޯޓުން ވިދާޅުވެއެވެ. އެގޮތުން ސިވިލް ކޯޓުގެ ޑިވިޝަން ހިންގި އިމާރާތުގެ 3 މާލަމެއްގައި ކްރިމިނަލް ކޯޓުގެ 6 ސެކްޝަނެއްގެ އަޑުއެހުންތައް ބޭއްވުމުގެ އިންތިޒާމުތައް ހަމަޖެހިފައިވާކަމަށްވެސް އެ ކޯޓުން ވިދާޅުވެއެވެ.

ކްރިމިނަލް ކޯޓުން ވިދާޅުވީ މިބަދަލަކީ ވަގުތީ ބަދަލެއް ކަމަށެވެ. އަދި ޝަރީޢަތްތައް ކުރިއަށްދާނީ ސިވިލް ކޯޓުގެ ހުޅުމާލެ ޑިވިޝަންގެ ގޮތުގައި ބޭނުންކުރަމުންދިޔަ އިމާރާތުގެ ޝަރީޢަތް ކުރާ ތިން މާލަމެއްގައިކަމަށްވެސް ކޯޓުން ވިދާޅުވެއެވެ. އެގޮތުން ކްރިމިނަލް ކޯޓުގެ B2, B3, B5, B8, B10 އަދި B11 ސެކްޝަންގެ އަޑުއެހުންތައް އެ ތަނުގައި ބޭއްވުމުގެ އިންތިޒާމުތައް ހަމަޖެހިފައިވާކަމަށް ކޯޓުން ވިދާޅުވިއެވެ.

ކްރިމިނަލް ކޯޓަށް ޖާގައިގެ ދަތިކަން ކުރިމަތިވެފައިވާއިރު، ކޯޓުގެ އިމާރާތަށް ފެން ފޭބުމުގެ ސަބަބުން ލިބުނު ގެއްލުންތަކަކާއި ގުޅިގެން މިހާރު ޝަރީއަތްތައް ކުރިއަށްދަނީ އެންމެ މާލަމެއްގައިވެސް ކްރިމިނަލް ކޯޓުން ވިދާޅުވެއެވެ.

ކްރިމިނަލް ކޯޓުން ވިދާޅުވީ ހުޅުމާލެއަށް ޝަރީއަތްތައް ބަދަލުކުރުމުން މާލޭގައި ހުރި ކޯޓުގެ އިމާރާތުން 3 މާލަމެއް ޝަރީއަތްކުރަން މިހާރު ހަމަޖެހިފަައިވާކަމަށެވެ. އެހެންކަމުން ހުޅުމާލެއިން ހަމަޖެހުނު 3 މާލަމާއެކު ޖުމްލަ 6 މާލަމެއް ޝަރީއަތްކުރުމަށް ލިބިފައިވާކަމަށްވެސް ކްރިމިނަލް ކޯޓުން ވިދާޅުވެއެވެ.

މި 6 މާލަމުގައި ޝަރީއަތްތައް ކުރިއަށްދާނީ އެ ކޯޓުގެ 11 ގާޒީންގެ މެދުގައި އެކި ދުވަސްތަކަށް ބަހާލައިގެން ކަމަށްވެސް ކްރިމިނަލް ކޯޓުން ވިދާޅުވެއެވެ. އަދި ދުވަސްވީ މައްސަލަތަކާއި ޝަރީއަތްތައް ނިމެންދެން ބަންދުގައި ތިބި މީހުންގެ މައްސަލަތުގެ ޝަރީއަތްތައް ކުރިއަށް ގެންދިއުމަށް އިސްކަންދޭން ނިންމާފައިވާ ކަމަށްވެސް ކްރިމިނަލް ކޯޓުން ވިދާޅުވެއެވެ.

ވޭތުވެދިޔަ ދޮޅު އަހަރެއްހާ ދުވަހުގެ ތެރޭގައި ކޯޓުގެ 1 މާލަމުގައި ޝަރީއަތް ކުރިއަށްގެންދިޔަނަމަވެސް އެ މުއްދަތުގެ ތެރޭގައި 2934 މީހުންގެ ބަންދާމެދު ގޮތެއް ނިންމާފައިވާ ކަމަށާއި އަދި 2193 ކޯޓު އަމުރު ދޫކޮށްފައިވާ ކަމަށްވެސް ކްރިމިނަލް ކޯޓުން ވިދާޅުވެއެވެ. މީގެއިތުރުން 520 މައްސަލައެއް ނިންމާފައިވާކަމަށްވެސް އެ ކޯޓުން ވިދާޅުވެއެވެ.