"މަޖިލިސް20" ޖުމްލަ 93 މެންބަރުން؛ މުޅިން އަލަށް 67 މެންބަރުން

ވިހިވަނަ ރައްޔިތުންގެ މަޖިލީހަކީ އެއްގޮތަށް ވުރެ ގިނަ ގޮތްގޮތުން ތާރީޚީ މަޖިލީހެކެވެ. މިފަހަރުގެ މަޖިލީސް ވެގެންދާނީ އެންމެ ގިނަ މެންބަރުން ރައްޔިތުން ތަމްސީލު ކުރާ މަޖިލީހަށެވެ. އެގޮތުން މިފަހަރު މަޖިލީހުގައި 93 ދާއިރާއެއްގެ ރައްޔިތުން، މެންބަރުން ތަމްސީލުކޮށްދޭނެއެވެ.

މަޖިލީހުގެ 93 މެންބަރުން 5 ޕާޓީއެއް ތަމްސީލު ކުރައްވައެވެ. އެއީ ވެރިކަން ކުރާ ޕީޕަލްސް ނޭޝަނަލް ކޮންގްރެސް ޕާޓީ (ޕީއެންސީ) އާއި، އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާއި، ޖުމުހޫރީ ޕާޓީ (ޖޭޕީ)އާއި މޯލްޑިވްސް ޑިވެޕޮލްމަންޓް އެލަޔަންސް (އެމްޑީއޭ)ގެ އިތުރުން މޯލްޑިވްސް ނޭޝަނަލް ޕާޓީ (އެމްއެންޕީ)އެވެ.

ޕީއެންސީގެ 75 މެންބަރުން

މަޖިލީހުގައި 91 މެންބަރުން ޕާޓީތައް ތަމްސީލު ކުރެއެވެ. އެގޮތުން އެންމެ ގިނަ މެންބަރުން ތަމްސީލުކުރާ އަދި މިފަހަރު މަޖިލީހުގެ ސުޕަމެޖޯރިޓީ ނަގާފައިވަނީ 75 މެންބަރުންނާއެކު ޕީއެންސީންނެވެ. އެ ޕާޓީގެ 66 މެންބަރަކު މަޖިލިސް އިންތިހާބުގައި ވާދަކޮށް ގޮނޑި ކާމިޔާބު ކުރިއެވެ. އަދި އިންތިޚާބުގައި އަމިއްލަ ގޮތުން ވާދަކޮށް ހޮވިވަޑައިގަތް 9 މެންބަރަކު ޕީއެންސީއަށް ސޮއިކޮށް އެ ޕާޓީގެ ޕާލަމެންޓަރީ ގްރޫޕާއި ގުޅިވަޑައިގަތެވެ.

މަޖިލީހުގައި މައިނޯރިޓީ ޕާޓީ ތަމްސީލު ކުރާނީ އިދިކޮޅު އެމްޑީޕީންނެވެ. އެ ޕާޓީގެ 12 މެންބަރުން މިފަހަރުގެ މަޖިލީހުގައި ދާއިރާތައް ތަމްސީލު ކުރައްވާނެއެވެ. މިއީ 19 ވަނަ މަޖިލިސް ފެށުނުއިރު އެޕާޓީ ތަމްސީލު ކުރި 65 މެންބަރުންނާއި އަޅާބަލާއިރު ވަރަށް މަދު ޢަދަދެކެވެ.

އެމްޑީޕީއަށްފަހު ދެން މަޖިލީހުގައި އެންމެ ގިނަ މެންބަރުން ތަމްސީލު ކުރަނީ އެމްޑީއޭއިންނެވެ. އެ ޕާޓީން ދެ ދާއިރާ ތަމްސީލްކުރައްވާއިރު ޖުމުހޫރީ ޕާޓީ އަދި އެމްއެންޕީ މަޖިލީހުގައި ތަމްސީލު ކުރައްވާނީ އެ ދެ ޕާޓީގެ ލީޑަރުންނެވެ.

ޒުވާން މެންބަރުންތަކެއް، އަލަށް 67

އައު މަޖިލީހުގައި ހިމެނިވަޑައިގަންނަވާ މެންބަރުންގެ ތެރެއިން 67 މެންބަރުންނަކީ މީގެ ކުރިން މަޖިލީހުގެ މެންބަރުކަން އެއްވެސް ދައުރެއްގައި އަދާކޮށްފައިވާ ކޮށްފައިވާ ނުވާ އައު މެންބަރުންނެވެ. ޒުވާން މޫނުތަކެކެވެ.

މި މަޖިލީހުގައި ހިމެނިވަޑައިގަންނަވާ އަންހެން މެންބަރުންގެ ޢަދަދު ކުރީ މަޖިލީހަށްވުރެ މަދެވެ. އެގޮތުން މި މަޖިލީހުގައި އަންހެން މެންބަރުންގެ ގޮތުގައި ހިމެނިވަޑައިގަންނަވަނީ 3 މެންބަރުންނެވެ. އެ ދާއިރާތަކަކީ، ހުރާ ދާއިރާއާއި، ނިލަންދޫ ދާއިރާގެ އިތުރުން މާފަންނު މެދު ދާއިރާއެވެ. އޭގެ ތެރެއިން ނިލަންދޫ ދާއިރާ ތަމްސީލު ކުރައްވާ ފާޠިމަތު ސަޢުދާއަކީ މަޖިލީހަށް އައު މެންބަރެކެވެ. އަނެއް ދެ މެންބަރުންކަމަށްވާ ހުރާ ދާއިރާގެ މެންބަރު އަނާރާ ނަޢީމާއި މާފަންނު މެދު ދާއިރާގެ މެންބަރު އަސްމާ ރަޝީދު ވަނީ މީގެ ކުރީ ދައުރުތަކުގައި މެންބަރުކަން ކުރައްވާފައެވެ.

އެއް ރަށަކަށް ނިސްބަތްވެވަޑައިގަންނަވާ އާއިލީ 4 މެންބަރުން

ވިހިވަނަ މަޖިލީހުގައި 4 ދާއިރާއެއް އެއް ރަށަކަށް ނިސްބަތްވާ 4 ބޭފުޅެއް ހިމެނިވަޑައިގަންނަވައެވެ. ގއ. ދެއްވަދޫއަށް ނިސްބަތްވެވަޑައިގަންނަވާ އެ 4 މެންބަރުންގެ ތެރެއިން ހުޅުމާލޭގެ ތިން ދާއިރާ ތިން ބޭފުޅުން ތަމްސީލް ކުރައްވައެވެ. ދެން ހިމެނިވަޑައިގަންނަވަނީ ގެމަނަފުށީ ދާއިރާއެވެ.

މިފަހަރު މަޖިލީހުގައި އިތުރަށް ފާހަގަކޮށްލެވޭ ކަންކަމުގެ ތެރޭގައި ހުރާ ދާއިރާއާއި މަކުނުދޫ ދާއިރާގެ މެންބަރުންނަކީ ދެމަފިރިކަނބަލުންނެވެ. އެއީ ހުރާދާއިރާގެ މެންބަރު އަނާރާ ނައީމާއި، މަކުނުދޫ ދާއިރާގެ މެންބަރު އާދަމް ޝަފީޤެވެ.

މަޖިލީހުގެ ތާރިޚުގައި އައު މަޖިލީހުގައި ދެބަފައިންވެސް ދެ ދާއިރާއެއް ތަމްސީލު ކުރައްވައެވެ. އެއީ އޭދަފުށީ ދައިރާއާއި މުލަކު ދާއިރާއެވެ. އޭދަފުށީ ދާއިރާގެ މެންބަރު އަޙްމަދު ސަލީމްގެ ދަރިކަލުން އިބްރާހީމް ނައުފަލްއަކީ މިފަހަރު މުލަކު ދާއިރާގެ މެންބަރެވެ.

އެންމެ ޒުވާން މެންބަރަކަށް އަލްސަން

މި ދައުރުގެ އެންމެ ޒުވާން މެންބަރެއްގެ ގޮތުގައި މަޖިލީހުގައި މަސައްކަތް ކުރައްވާނީ އުމުރުން 27ގެ މުހައްމަދު އަލްސަން އަހުމަދެވެ. އޭނަ ތަމްސީލްކުރައްވާނީ ތިނަދޫ ދެކުނު ދާއިރާގެ މެންބަރުކަމެވެ. މި މަޖިލީހުގައި އެންމެ ދޮށީ މެންބަރަކީ މާމިގިލީ ދާއިރާގެ 72 އަހަރުގެ ޤާސިމް އިބްރާހީމްއެވެ.

އައު ގިނަ މެންބަރުންނާއެކު އައު މަޖިލީހާއި ގުޅިފައިވަނީ ގިނަ ރައްޔިތުންގެ އުންމީދުތަކަކާއެވެ. ރައްޔިތުންނަށް ބޭނުންވާ ކަންކަން ފަހިކުރުމަށް ހަދާ ޤާނޫނުތަކާއި، އަދި ސަރުކާރުގެ ސިޔާސަތުތައް ތަންފީޒު ކުރުމަށް މުހިންމު ދައުރެއް މި މެންބަރުން އަދާ ކުރާނެއެވެ. އެ މެންބަރުން ތަމްސީލު ކުރާ ދާއިރާތަކުގެ ރައްޔިތުންވެސް ތިބީ އެ އުއްމީދުގައެވެ.