ޕީއެންސީގެ ޕީޖީ ލީޑަރަކަށް ފަލާޙް، ސީނިއަރ ޑެޕިއުޓީ ލީޑަރަކަށް ޝުޖާޢު

ވިހިވަނަ ރައްޔިތުންގެ މަޖިލީހުގައި ސަރުކާރު ހިއްސާވާ މައި ޕާޓީ، ޕީޕަލްސް ނޭޝަނަލް ކޮންގްރެސް، ޕީއެންސީ ތަމްސީލް ކުރައްވާ ޕާލިމަންޓްރީ ގްރޫޕްގެ ލީޑަރަކަށް އިނގުރައިދޫ ދާއިރާގެ އިންތިޚާބީ މެންބަރު އިބްރާހީމް ފަލާހު ކަނޑައެޅުމަށް އެ ޕާޓީން ނިންމައިފިއެވެ.

އެ ޕާޓީން މިގޮތަށް ނިންމާފައިވަނީ ކޮންގްރެސް ޕާޓީގެ ރައީސް، އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއެކު ބޭއްވެވި ބައްދަލުކުރެއްވުމުގައި އެމަނިކުފާނު މަގާމުތަކަށް ކަނޑައަޅުއްވަން ބޭނުންފުޅުވާ ނަންތައް ހުށަހެޅުއްވުމުންނެވެ.

ވިހި ވަނަ މަޖިލީހުގެ ފުރިހަމަ މެޖޯރިޓީ ކޮންގްރެސް ޕާޓީއަށް ލިބިފައިވާއިރު އެ ޕާޓީގެ ޕީޖީ ލީޑަރު ވެގެންދާނީ މަޖިލީހުގެ މެޖޯރިޓީ ލީޑަރަށެވެ. އެ މަގާމަށް މެންބަރަކު ކަނޑައަޅާނީ ޕާޓީގެ ޕީޖީ މެންބަރުންނެވެ. އެގޮތުން، ޕީޖީ ލީޑަރަކަށް، އިނގުރައިދޫ ދާއިރާގެ އިންތިޚާބީ މެންބަރު އިބްރާހިމް ފަލާހުގެ ނަން ރައީސުލްޖުމްހޫރިއްޔާ ހުށަހެޅުއްވުމުން އެ ނަން ޕާޓީގެ އިންތިޚާބީ މެންބަރުންގެ އިއްތިފާގުން ވަނީ ފާސްވެފައެވެ.

ޕީއެންސީގެ ސީނިއަރ ޑެޕިއުޓީ ޕީޖީ ލީޑަރަކަށް ރައީސުލްޖުމްހޫރިއްޔާ ހުށަހެޅުއްވީ ބާރަށު ދާއިރާގެ އިންތިޚާބީ މެންބަރު އިބްރާހިމް ޝުޖާއުގެ ނަންފުޅެވެ.

ޝުޖާއުގެ އިތުރުން 3 ޑެޕިއުޓީ ލީޑަރުން ކަނޑައެޅުއްވުމަށްވެސް ރައީސުލްޖުމްހޫރިއްޔާ ހުށައެޅުއްވިއެވެ. އެގޮތުން އެމަނިކުފާނު ހުށަހެޅުއްވީ، ވިލިމާލެ ދާއިރާގެ އިންތިޚާބީ މެންބަރު މުޙައްމަދު އިސްމާޢީލާއި، މަހިބަދޫ ދާއިރާގެ އިންތިޚާބީ މެންބަރު އަހުމަދު ޠާރިގާއި ހުޅުދޫ ދާއިރާގެ އިންތިޚާބީ މެންބަރު މުޙައްމަދު ޝާހިދުގެ ނަންފުޅެވެ.

ޕީއެންސީގެ ޕީޖީގެ އެކި މަގާމުތަކަށް ކަނޑައެޅުއްވުމަށް ނަން ހުށަހަޅުއްވި ހުރިހާ މެންބަރުންނަށް ވެސް ރުހުން ދިނުމަށް ކޮންގްރެސް ޕާޓީގެ ޕީޖީން ވަނީ ފާސްކޮށްފައެވެ.

މަޖިލީހުގެ މެޖޯރިޓީ ތަމްސީލުކުރާ ކޮންގްރެސް ޕާޓީން ޕީޖީގެ އެކި މަގާމުތަކަށް ނަންތައް ފާސްކޮށްފައިވާއިރު މައިނޯރިޓީ ތަމްސީލުކުރާ، އެމްޑީޕީން ވެސް ވަނީ ޕީޖީގެ މަގާމުތަކަށް މެންބަރުން އިންތިޚާބު ކުރުމަށް އިއުލާންކޮށްފައެވެ. އެ ޕާޓީގެ ޕީޖީ މަގާމުތަކަށް މެންބަރުން އިންތިޚާބު ކުރުމަށް ނިންމާފައިވަނީ މި މަހުގެ 28 ވަނަ ދުވަހުއެވެ. މިއީ ވިހި ވަނަ މަޖިލީހުގެ މެންބަރުން ހުވާކުރާ ދުވަހެވެ.