16%ގެ ކުރިއެރުމަކާއެކު ރާއްޖެއަށް އައި ފަތުރުވެރިންގެ ޢަދަދު 3 ލައްކައަށް

2024 ވަނަ އަހަރުގެ މިހާތަނަށް ރާއްޖެއަށް އައިސްފައިވާ ފަތުރުވެރިންގެ އަދަދު ތިންލައްކައާ ގާތްކޮށްފިއެވެ.

ފަތުރުވެރިކަމާ ބެހޭ ވުޒާރާއިން އެންމެ ފަހުން ނެރެފައިވާ ޑެއިލީ އަޕްޑޭޓްސް ރިޕޯޓުގައިވާގޮތުން މި މަހުގެ 13ވަނަ ދުވަހުގެ ނިޔަލަށް ރާއްޖެއަށް ވަނީ 294،923 ފަތުރުވެރިން އައިސްފައެވެ. އެއީ މިދިޔަ އަހަރުގެ އެ މުއްދަތުގައި ރާއްޖެއަށް އައިސްފައިވާ 253،841 ފަތުރުވެރިންނަށްވުރެ %16.2 އިތުރު ޢަދަދެކެވެ.

ތަފާސްހިސާބުތައް ދައްކާ ގޮތުގައި މި އަހަރުގެ ޖެނުއަރީ މަހުގެ ތެރޭގައި ރާއްޖެއަށް ވަނީ 192،385 ފަތުރުވެރިން އައިސްފައެވެ. އަދި މި މަހުގެ 13ވަނަ ދުވަހުގެ ނިޔަލަށް 102،538 ފަތުރުވެރިން އައިސްފައިވެއެވެ. ދުވާލެއްގެ މައްޗަށް އެވްރެޖްކޮށް 7،888 ފަތުރުވެރިން ރާއްޖެއަށް އަންނަ ކަމަށް ތަފާސްހިސާބުތަކުން ދައްކައެވެ.

މި މަހަކީ ރާއްޖޭގެ ފަތުރުވެރި ކަމުގައި ފާހަގަކޮށްލެވޭ މަހެކެވެ. އެ ގޮތުން މި މަހުގެ 11ވަނަ ދުވަހު ރާއްޖެއަށް ވަނީ ރެކޯޑު ޢަދަދަކަށް ފަތުރުވެރިން ޒިޔާރަތްކޮށްފައެވެ. އެ ދުވަހު ރާއްޖެއަށް 10،213 ފަތުރުވެރިން ޒިޔާރަތްކޮށްފައިވެއެވެ. އެއީ ރާއްޖޭގެ ތާރީޙުގައި އެއް ދުވަހެއްގެ ތެރޭގައި އެންމެ ގިނަ ޢާދަދަކަށް ފަތުރުވެރިން ޒިޔާރަތްކުރި މަހެވެ.

ރާއްޖެއަށް މިހާރު އެންމެ ގިނަ ޢަދަދަކަށް ފަތުރުވެރިން އަންނަނީ ޗައިނާއިންނެވެ. ދެވަނައަށް އެންމެ ގިނައިން ފަތުރުވެރިން އަންނަނީ ރަޝިއާއިންނެވެ.

އެންމެ ގިނަ ފަތުރުވެރިން ޒިޔާރަތް ކުރި ޤައުމުތައް:

• ޗައިނާ: 40،892 ފަތުރުވެރިން
• ރަޝިއާ: 28،973 ފަތުރުވެރިން
• އިޓަލީ: 27،552 ފަތުރުވެރިން
• އިނގިރޭސިވިލާތް: 26،120 ފަތުރުވެރިން
• އިންޑިއާ: 20،903 ފަތުރުވެރިން

ސަރުކާރުން އަމާޒު ކޮށްފައި ވަނީ މި އަހަރު ރާއްޖެއަށް 2 މިލިއަން ފަތުރުވެރިން ގެނައުމަށެވެ. މިހާރު ފަތުރުވެރިން ރާއްޖެއަށް އަންނަ ނިސްބަތަށް ބަލާނަމަ އެ ޢަދަދު 2.3 މިލިއަނަށް އަރާނެ ކަމަށް ލަފާކުރެވޭ ކަމަށް ފަތުރުވެރިކަމާ ބެހޭ ވުޒާރާއިން ވަނީ ވިދާޅުވެފައެވެ.