ސަރުކާރުން އިސްނަންގަވައިގެން ފަށްޓަވާފައިވާ ސިޔާސީ ޕާޓީތަކުގެ މަޝްވަރާތަކުގައި ކުރީގެ ރައީސް މުޙައްމަދު ނަޝީދާއި، އަދާލަތު ޕާޓީގެ ކުރީގެ ރައީސް އިމްރާން ޢަބްދުﷲ ބައިވެރިކުރައްވައިގެން ކުރިއަށް ގެންދިއުމަށް ސަރުކާރުން ނިންމަވައިފިއެވެ.
ޕާޓީތަކުގެ މަޝްވަރާތައް ބޭއްވުމަށް ހަތަރު ފަހަރެއްގެ މަތިން ސަރުކާރުން ވަނީ އެމްޑީޕީއަށާއި އަދާލަތު ޕާޓީއަށް ދަޢުވަތު ދެއްވާފައެވެ. ނަމަވެސް އެ ދެޕާޓީން ބުނަމުން އައިސްފައިވަނީ ޕާޓީތަކުގެ މަޝްވަރާތަކުގައި ބައިވެރިވާނީ ރައީސް ނަޝީދާއި، އިމްރާން ޢަބްދުﷲ ބައިވެރި ކޮށްގެންކަމަށެވެ. ރައީސުލްޖުމްހޫރިއްޔާގެ އޮފީހުގައި ނޫސްވެރިންނާއި ބައްދަލުކުރައްވާ މަޝްވަރާތަކަށް ސަރުކާރުން ކަނޑައަޅުއްވާފައިވާ އެންމެ އިސްމަންދޫބު ފިޝަރީޒް މިނިސްޓަރ ޑރ.މުޙައްމަދު ޝައިނީ ވިދާޅުވީ، ރައީސް ނަޝީދާއި، އިމްރާން ޢަބްދުﷲ މަޝްވަރާތަކުގައި ބައިވެރިކުރުމަށް މިހާރު ހުރަހެއް ނެތްކަމަށެވެ. އެގޮތުން މަޝްވަރާތަކުގައި ބައިވެރިވެވަޑައިގަތުމަށް ނަޝީދު ޖެހިވަޑައިގަންނަވާނީ ރާއްޖެ ވަޑައިގަތުމަށްކަމަށް ޝައިނީ ވިދާޅުވިއެވެ. އަދި ޖަލުގައި އެފަރާތްތަކާއި މަޝްވަރާކުރައްވަން ވަޑައިގަތުމަށްވެސް ތައްޔާރަށް ހުންނެވިކަމަށް ޝައިނީ ވިދާޅުވިއެވެ. ބަންދުގައި ތިބޭ މީހުނަށް މަޝްވަރާގައި ބައިވެރިނުވެވޭ ގޮތަށް ކުރިން ނިންމި ނަމަވެސް އެ ނިންމުން ބަދަލުކުރެއްވީ މަޝްވަރާތައް ކުރިއަށް ގެންދިއުން އެއީ މުހިންމު ކަމެއްކަމަށް ގިނަ ބަޔަކު ޤަބޫލުކުރާއްވާތީކަމަށް ޝައިނީ ވިދާޅުވިއެވެ.
މަޝްވަރާތަކުގައި އިދިކޮޅު އެމްޑީޕީއާއި އަދާލަތުން ބައިވެރި ނުވާ މައްސަލާގައި، މަޝަވަރާގެ މޭޒަށް އިދިކޮޅު ފަރާތްތައް ގެނައުމަށް ސަރުކާރުން ދަނީ އދ. ގެ އެހީތެރިކަން ހޯއްދަވަމުންނެވެ. އެގޮތުން މިހާރު ރާއްޖެ ވަޑައިގެން އުޅުއްވާ އދ.ގެ ވަފުދާއި ކޮންމެ ދުވަހަކު ބައްދަލުކުރައްވާކަމަށް ޝައިނީ ވިދާޅުވިއެވެ. ޝައިނީ ވިދާޅުވީ، ރައީސް ނަޝީދާއި، އިމްރާން ޢަބްދުﷲ މަޝްވަރާތަކުގައި ބައިވެރިކުރުމަށް ނިންމެވީ މަޝްވަރާތަކުގައި އެފަރާތްތައް ބައިވެރިކުރުމުގެ ބޭނުމުގައި ސަރުކާރަށް ދެވެން އޮތް ލުޔެއް ދެއްވުމުގެ ބޭނުމުގައިކަމަށެވެ. މިކަމުގައި ބޭރުގެ އެއްވެސް ފަރާތެއްގެ ޕްރެޝަރު ނެތްކަމަށް ޝައިނީ ވިދާޅުވިއެވެ.
މަޝްވަރާގެ މޭޒަށް ސަރުކާރުން ވަޑައިގަންނަވަނީ އެއްވެސް އެޖެންޑާއެއް އަދި ޝަރުތެއް ނެތިކަން ވިދާޅުވާ ވިދާޅުވުން މިނިސްޓަރ ތަކުރާރު ކުރެއްވިއެވެ. ސަރުކާރުން އިސްވެ ފަށްޓަވާފައިވާ ސިޔާސީ ޕާޓީތަކުގެ މަޝްވަރާތަކުގައި މިހާތަނަށް ބައިވެރިވި ޕީޕީއެމާއި، އެމްޑީއޭއާއި ޖުމްހޫރީ ޕާޓީއާއި ޑީއާރުޕީން ދަނީ މަޝްވަރާތަކަށް އެއްބާރުލުން ދެމުންނެވެ.