ސަރުކާރުން އިސްނަންގަވައިގެން ފަށްޓަވާފައިވާ ސިޔާސީ ޕާޓީތަކުގެ މަޝްވަރާތަކުގައި ކުރީގެ ރައީސް މުޙައްމަދު ނަޝީދު ބައިވެރިކުރެއްވުމާ ގުޅޭގޮތުން ގޮތެއް ނިންމިދާނެކަމުގެ އިޝާރާތެއް، މަޝްވަރާތަކުގެ އިސް މަންދޫބު، ފިޝަރީޒް މިނިސްޓަރ ޑރ.މުޙައްމަދު ޝައިނީ ދެއްވައިފިއެވެ. މިނިސްޓަރ މިހެން ވިދާޅުވީ، މަޝްވަރާތައް ކުރިއަށް ގެންދެވުމުގައި އެހީތެރިވެދެއްވުމަށް ރާއްޖެ އައިސްއުޅޭ އދ.ގެ ވަފްދާ ބައްދަލުކުރެއްވުމަށްފަހު މީޑިއާއަށް މަޢުލޫމާތު ދެއްވަމުންނެވެ.
ސަރުކާރުން ފަށްޓަވާފައިވާ ސިޔާސީ ޕާޓީތަކުގެ މަޝްވަރާތަކުގައި އިދިކޮޅު ޕާޓީތަކުން ބައިވެރިނުވި މައްސަލައިގައި ސަރުކާރުން ވަނީ ބައިނަލްއަޤްވާމީ އެހީތެރިކަމާއެކު މަޝްވަރާގެ މޭޒަށް އިދިކޮޅު ފަރާތްތައް ގެނައުމަށް މަސައްކަތް ކުރައްވާނެކަމަށް ވިދާޅުވެފައެވެ. މަޝްވަރާތަކުގައި އެހީތެރިވުމަށް ރާއްޖެ ވަޑައިގެން އުޅުއްވަނީ އދ.ގެ ޑިޕާޓްމަންޓް އޮފް ޕޮލިޓިކަލް އެފެއާޒްގެ ސީނިއަރ އެޑްވައިޒަރާއި އިތުރު ތިން ބޭފުޅުންނެވެ. މިއީ ދުނިޔޭގެ އެހެން ޤައުމުތަކުގައިވެސް ސިޔާސީ މަސްރަޙު ޙައްލުކުރުމުގައި މަސައްކަތް ކުރައްވާފައިވާ ބޭފުޅުންގެ މައްޗަށް އެކުލެވޭ ވަފްދެއްކަމަށް ސަރުކާރުން ވިދާޅުވެއެވެ.
އދ.ގެ ވަފްދާ ބައްދަލުކުރެއްވުމަށްފަހު މީޑިއާއާ ބައްދަލުކުރެއްވުމަށްފަހު ޑރ.މުޙައްމަދު ޝައިނީ ވަނީ ރާއްޖޭގެ އިޖްތިމާޢީ އަދި އިޤްތިޞާދީ ތަޞައްވަރު ކުރިއަށް ގެންދިއުމުގައި ސިޔާސީ މާޙައުލުގައި ހުރި އުނދަގޫތައް އދ.ގެ ވަފުދާއި ޙިއްޞާކުރައްވާފައެވެ. މިނިސްޓަރ ޝައިނީ ވިދާޅުވީ، އދ.ގެ ވަފުދުން ސިޔާސީ ޕާޓީތަކާއި، އެހެނިހެން މުއައްސަސާތަކާއި ބައްދަލާކުރައްވާނެ ކަމަށާއި، ފެށޭ ހަފްތާގެ ތެރޭގައި ސިޔާސީ ޕާޓީތަކުގެ މަޝްވަރާތައް ކުރިއަށް ގެންދަވާނެކަމަށެވެ. އަދި މަޝްވަރާތަކުގައި އދ.ގެ އެހީތެރިކަމާއެކު އިދިކޮޅު ޕާޓީތަކުން ބައިވެރިވާނެކަމުގެ އުއްމީދު އެބައޮތްކަމަށް މިނިސްޓަރ ވިދާޅުވިއެވެ. މަޝްވަރާތަކުގައި އެމްޑީޕީގެ ކުރީގެ ރައީސް އަދި ކުރީގެ ރައީސް މުޙައްމަދު ނަޝީދު ބައިވެރިކުރުމާ މެދުވެސް ގޮތެއް ނިންމެވޭނެކަމަށް ޝައިނީ ވިދާޅުވިއެވެ.
މަޝްވަރާގެ މޭޒަށް ސަރުކާރުން ވަޑައިގަންނަވަނީ އެއްވެސް އެޖެންޑާއެއް އަދި ޝަރުތެއް ނެތިކަން މިނިސްޓަރ ވަނީ ވަފުދުގެ ބޭފުޅުންނާއި ޙިއްޞާކުރައްވާފައެވެ. އަދި އދ.ގެ ވަފުދުން ރާއްޖޭގެ ދާޚިލީ ކަންކަމާ ނުބެހޭނެކަމުގެ ޔަޤީންކަން މިނިސްޓަރ ދެއްވިއެވެ. ސަރުކާރުން އިސްވެ ފަށްޓަވާފައިވާ ސިޔާސީ ޕާޓީތަކުގެ މަޝްވަރާތަކުގައި މިހާތަނަށް ބައިވެރިވި ޕީޕީއެމާއި، އެމްޑީއޭއާއި ޖުމްހޫރީ ޕާޓީއާއި ޑީއާރުޕީން ދަނީ މަޝްވަރާތަކަށް އެއްބާރުލުން ދެމުންނެވެ.
ސިޔާސީ ޕާޓީތަކާއެކު މަޝްވަރާތައް ފެއްޓެވުމަށް ރައީސް ޢަބްދުﷲ ޔާމީން ނިންމެވީ ދިވެހިރާއްޖެ ތަރައްޤީކުރެއްވުމަށާއި ޤައުމު ބިނާކުރެއްވުމަށް ކުރައްވާ މަސައްކަތް ހަލުވިކުރައްވައި، ރައްޔިތުންގެ އެއްބައިވަންތަކަން އިތުރުކުރެއްވުމަށް ކަމަށް ސަރުކާރުން ހާމަކުރައްވައެވެ.