ޒަކާތު ފަންޑުން މިއަހަރުގެ މިހާތަނަށް 3 ކުއްޖަކަށް ބޯންމެރޯ ހައްދައިދީފައިވާކަމަށް އިސްލާމިކް މިނިސްޓްރީން ހާމަކުރައްވައިފިއެވެ.
ކޮންމެ އަހަރަކު ފަސް ކުއްޖަކަށް ބޯންމެރޯ ހައްދައިދިނުމަކީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ރިޔާސީ ވަޢުދެކެވެ. މިދިޔަ އަހަރުވެސް 11 ކުއްޖަކު ބޮންމެރޯ ހައްދަދީފައިވެއެވެ. ޒަކާތް ނެރުމާއި ގުޅޭގޮތުން ރައްޔިތުން ހޭލުންތެރިކުރަމުންދާ ވަރަކަށް ޒަކާތު ފަންޑަށް ލިބޭ ފައިސާ އިތުރުވަމުންދާކަން އިސްލާމިކް މިނިސްޓްރީން ފާހަގަކުރައްވައެވެ. އެގޮތުން 2014 ވަނަ އަހަރު ޒަކާތުގެ ގޮތުގައި 55 މިލިއަން ރުފިޔާ ލިބިފައިވާއިރު 2015 ވަނަ އަހަރު 72 މިލިއަން ރުފިޔާ ލިބިފައިވާކަމަށް އިސްލާމިކް މިނިސްޓްރީން ވިދާޅުވެއެވެ.
ޒަކާތު ފައިސާ އޭގެ ހައްޤު ވެރިންނަށް ދިނުމަށް ސަރުކާރުން ކުރައްވާ މަސައްކަތުގެ ދަށުން ޒަކާތާއި ބެހޭ ޤާނޫނެއް ވުޖޫދަށް ގެނައުމަށްޓަކައި ކުރައްވަމުން ގެންދަވާ މަސައްކަތުގެ ބޮޑު ބައެއް ނިމި ރައްޔިތުންގެ މަޖިލީހަށް އެ ބިލް ހުށައެޅުއްވުމަށް ސަރުކާރުން ދަނީ މަސައްކަތްކުރައްވަމުންނެވެ. މި ބިލްގެ ދަށުން ޒަކާތާ ބެހޭ ވަކި މުއައްސަސާއެއް ޤާއިމްކުރެވިގެންދާނެއެވެ.
އިސްލާމިކް މިނިސްޓަރުގެ ނާއިބު މުޙައްމަދު މުސްޠަފާ ވިދާޅުވީ، ޒަކާތުގެ ގޮތުގައި ލިބޭ ފައިސާ ސަރުކާރުން ބޭނުން ނުކުރައްވާކަމަށާއި، އެފައިސާ ބޭނުންކުރައްވަނީ އޭގެ ހައްޤުވެރިންނަށް ޚަރަދުކުރުމަށްކަމަށް މުސްޠަފާ ވިދާޅުވިއެވެ. އެގޮތުން 2015 ވަނަ އަހަރު ޒަކާތު ފަންޑުން ފަޤީރުންނަށް ނަގުދު ފައިސާގެ ގޮތުގައި ވިހި މިލިއަނަށްވުރެ ގިނަ ރުފިޔާ ބަހާފައިވެއެވެ. ދީނީ ހޭލުންތެރިކަން އިތުރުކުރުމަށްޓަކައި އެކިއެކި ދީނީ ޕްރޮގްރާމްތައް ހިންގުމަށް ދެމިލިއަނަށްވުރެ ގިނަ ރުފިޔާ ޚަރަދުކުރައްވާފައިވާއިރު، ކީރިތި ޤުރުއާނުގެ ޢިލްމު ފެތުރުމަށްޓަކައި 9 މިލިއަނަށްވުރެ ގިނަ ރުފިޔާ ސަރުކާރުން ޚަރަދު ކުރައްވާފައިވެއެވެ. މީގެ އިތުރުން އަލިފާނުގެ ކާރިސާތަކާއި، ކުއްލި ހާދިސާތައް ދިމާވެގެން 180 ހާސް ރުފިޔާ ޚަރަދުކުރައްވާފައިވާއިރު، އެންސްޕާ މެދުވެރިކޮށް ބޭސްފަރުވާއަށް 10 މިލިއަން ރުފިޔާ ޒަކާތު ފަންޑުން ވަނީ ޚަރަދުކުރައްވާފައެވެ. ކޮންމެ އަހަރަކު ފަސް ކުދިންނަށް ބޯންމެރޯ ހަދައިދިނުމަކީ ސަރުކާރުގެ ވަޢުދަކަށް ވީހިނދު، މިދިޔަ އަހަރު 11 ކުއްޖެއްގެ ބޯން މެރޯ ޒަކާތު ފަންޑުން ހަދާދީފައިވެއެވެ. އަދި މިއަހަރު މިހާތަނަށް 3 ކުއްޖެއްގެ ބޯންމެރޯ ވަނީ ހަދާ ދީފައެވެ. އަދި ސްޕެޝަލިސްޓް ތަމްރީނުކުރުމަށް 2 މިލިއަން ރުފިޔާ ހޭދަކުރައްވާފައިވާއިރު ކިޔަވަން ބޭނުންވެ، އެކަމަށް ބޭނުންވާ ފައިސާގެ އެހީތެރިންކަން ނެތް، ކުދިންނަށް ސްކޯލާޝިޕްގެ ގޮތުގައި 7 މިލިއަން ރުފިޔާ ހޭދަކުރައްވަފައިވެއެވެ.
ސަރުކާރުން ވަނީ މިއަހަރުގެ މާރޗް މަހުގެ 27 ވަނަ ދުވަހު އިސްލާމިކް މިނިސްޓްރީއާއި ކައުންސިލް އިދާރާތަކުން ބަލައިގަންނަވަމުން ގެންދެވި މުދަލު ޒަކާތް ބަލައިގެންނެވުން، ދައުލަތުގެ ޓެކްސް އިދާރާމީރާއާ ހަވާލުކުރައްވާފައެވެ.
ރާއްޖޭގައި މުދަލުގެ ޒަކާތް ދައްކަމުން އަންނަނީ ދޭއް އިންސައްތައާއި ފަހެއް އިންސަތައާ ދެމެދު ޢަދަދެއްގެ މީހުންކަމަށް އިސްލާމިކް މިނިސްޓްރީން ވިދާޅުވެއެވެ.