ތިނަދޫ ސިޓީ ކުނިކޮށީގައި ރޯކުރާތީ ސެކިއުރިޓީ ވަރުގަދަކުރަނީ
-
ދެ ހަފުތާ ތެރޭގައި 4 ފަހަރު ކުނިކޮށީގައިވަނީ ރޯކޮށްލާފައި
-
މިއީ ވަކި މަޤުސަދެއް ހާސިލު ކުރުމަށް ކުރާ ކަމެއް ކަމަށް ވެމްކޯއިން ބުނޭ
ތިނަދޫ ސިޓީ ކުނިކޮށީގައި ރޯކުރާތީ އެތަނުގެ ސެކިއުރިޓީ ވަރުގަދަކުރުމަށް ނިންމާފައިވާ ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފިއެވެ.
އެކުންފުނިން މިއަދު ނެރުނު ބަޔާނެއްގައި ބުނީ ފާއިތުވި ދެ ހަފުތާ ތެރޭގައި 4 ފަހަރެއްގެ މަތިން ތިނަދޫ ކުނިކޮށީގައި ގަސްތުގައި ރޯކޮށްލާފައިވާ ކަމަށެވެ. އެކަމާ ގުޅިގެން ކަންބޮޑުވާ ކަމަށާއި ކުނިކޮށީގައި ރޯކޮށްލުމުގެ ސަބަބުން ވަށައިގެން ދިރިއުޅެމުންދާ އާންމު ރައްޔިތުންނަށް ދުމާއި، ނުބައިވަހުގެ އަސަރުވަރަށް ބޮޑަށް ކުރާ ކަމަށް ވެމްކޯގެ ބަޔާނުގައިވެއެވެ.
ވެމްކޯއިން ހާމަކޮށްފައިވާ ގޮތުން ކުނިގޮނޑުގައި ރޯ ކުރަނީ ވަކި މަޤުސަދެއް ހާސިލު ކުރުމަށެވެ. ނަމަވެސް އެ މަޤުސަދެއް އެކުންފުނިން ހާމައެއް ނުކުރެއެވެ.
އެކަން ތަކުރާރުވިޔަ ނުދިނުމަށް ކުނިކޮށި ބެލެހެއްޓުމުގެ ކަންކަން ވަރުގަދަ ކުރާނެ ކަމުގެ ޔަގީންކަން ވެމްކޯއިން ވަނީ ތިނަދޫގެ ރައްޔިތުންނަށް އަރުވާފައެވެ.