އެމްޑީޕީއާ މަޝްވަރާ ކުރުމަށް މަޖިލިސް އިންތިޚާބުގެ ތާރީޚު އިޢުލާންކުރުން ފަސްކޮށްފި

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާ މަޝްވަރާ ކުރުމަށް މަޖިލިސް އިންތިޚާބު ބާއްވާ ތާރީޚު އިޢުލާން ކުރުން އިލެކްޝަންސް ކޮމިޝަނުން ފަސްކޮށްފިއެވެ.

އީސީން ކުރިން ނިންމާފައިއޮތީ މިއަދު ބާއްވާ ނޫސްވެރިންގެ ބައްދަލުވުމުގައި ތާރީޚު އިޢުލާން ކުރުމަށެވެ. ނަމަވެސް އެމްޑީޕީން މިދިޔަ ބުރާސްފަތި ދުވަހު އެ ކޮމިޝަނަށް ހުށަހެޅި ސިޓީއަކާ ގުޅިގެން އެ ޕާޓީއާ ބައްދަލުކުރެއްވުމަށްފަހު ތާރީޚު އިޢުލާން ކުރަން ނިންމަވާފައިވާ ކަމަށް އީސީގެ ނައިބު ރައީސް އިސްމާއިލް ހަބީބު ވިދާޅުވިއެވެ.

ހަބީބު ވިދާޅުވީ، އެމްޑީޕީގެ ސިޓީއާ ގުޅިގެން ކޮމިޝަނުގައި މަޝްވަރާ ކުރުމަށްފަހު އެމްޑީޕީއާއެކު މާދަމާ މެންދުރު ބައްދަލުވުމެއް ބާއްވަން ނިންމާފައިވާކަމަށެވެ. އެހެންކަމުން މަޖިލިސް އިންތިޚާބު ބާއްވާނެ ތާރީޚު މި ހަފުތާ ތެރޭގައި އިޢުލާން ކުރެވޭނެކަމަށް އޭނާ ވިދާޅުވިއެވެ.

ތާރީޚު ކަނޑައެޅުމުގައި އާއްމު ރައްޔިތުންނާއި ކެންޑިޑޭޓުންނަށް އެންމެ ފަސޭހަވާނެ ގޮތްތަކާއި އީސީއަށް އިންތިޒާމު ކުރުމަށް ހުރި ގޮންޖެހުންތަކަށް ބައްލަވާނެކަމަށް ހަބީބު ވިދާޅުވިއެވެ. އަދި އިންތިޚާބުގައި އެންމެ މުހިންމީ ވޯޓުލާ މީހުންގެ އަދަދު ގިނަ ކުރުންކަމަށްވެސް އޭނާ ވިދާޅުވިއެވެ.

މިހާރު އޮތްގޮތުން ރައްޔިތުންގެ މަޖިލިސް އިންތިޚާބު ދިމާވަނީ ރަމަޟާން މަހާއެވެ. އެހެންކަމުން އިންތިޚާބު އަވަސް ކޮށްދެއްވުމަށް އީސީން ރައްޔިތުންގެ މަޖިލީހުގެ މިނިވަން މުއްސަސާތަކާ ބެހޭ ކޮމިޓީގައި އެދުނެވެ. ނަމަވެސް އެ ކޮމިޓީން ލަފާ އެރުވީ ޤާނޫނުގައި ބުނާ މުއްދަތު ރަމަޟާން މަހަށް ފަހުވެސް ލިބޭތީ، ރަމަޟާން މަސް ނިމުމުން އިންތިޚާބު ބޭއްވުމަށެވެ. އެމްޑީޕީންވެސް އީސީގައި އެދިފައިވަނީ ރަމަޟާން މަހަށްފަހު އިންތިޚާބު ބޭއްވުމަށެވެ.

ރަމަޟާންމަހަށްފަހު މަޖިލިސް އިންތިޚާބު ބާއްވަން ގޮންޖެހުންތައް ދިމާވާނެ ކަމަށް އީސީގެ ރައީސް ފުއާދު ތައުފީޤުވެސް ވަނީ މީގެ ކުރިން ވިދާޅުވެފައެވެ. އެގޮތުން، ރަމަޟާންމަހުގެ ފަހު 10 އަކީ ސަރުކާރު ބަންދު ދުވަސްތަކަށްވުމުން ޢީދާއެކު ގިނަ ދުވަސްތަކެއް ބަންދުވެ، އިދާރީ މަސައްކަތްތަކުގައި ދަތިތަކާ ދިމާވާނެ ކަމަށް ފުއާދު ވިދާޅުވިއެވެ.