އެކަކު އަނެކަކުގެ އަބުރާއި ޢިއްޒަތަށް ޙުރުމަތްތެރިކޮށް ހިތުމަށް މަގުދައްކައިދޭން އެބަޖެހޭ: ރައީސް
ދިވެހީން އެކަކު އަނެކަކުގެ އަބުރާއި ޢިއްޒަތަށް ޙުރުމަތްތެރިކޮށް ހިތުމަށް، މަގުދައްކައިދޭންޖެހޭކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ޤައުމީ އެއްބައިވަންތަކަމުގެ ދުވަހުގެ ރަސްމީ ޖަލްސާގައި ދެއްކެވި ވާހަކަފުޅުގައެވެ.
ދިވެހީންގެ އެއްބައިވަންތަކުގެ ދުވަސް ފާހަގަކުރުމަށް ބޭއްވި ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ސުނާމީ ކާރިސާގެ ހިތްދަތި ހަނދާންތައް އައުކުރައްވާފައެވެ.
ރައީސްގެ ވާހަކަފުޅުގައި ޒަމާނުއްސުރެ ދިވެހީންގެ ކިބައިގައިވާ އެއްބައިވަންތަކަމަކީ، ތަފާތު އެކި ގޮތްގޮތުން ދިވެހީންނަށް ލިބިފައިވާ އެއްގޮތްވަންތަކަންކަމަށް ވިދާޅުވިއެވެ. އެކަމުގެ ތަފްސީލަށް އަލިއަޅުއްވާލއްވަމުން ރައީސް ވިދާޅުވީ ދުނިޔޭގައި ބޮޑެތި ލޭ އޮހޮރުވުންތައް ހިނގައިފައިވާ ސަބަބުތަކަށް ބަލާއިރު، ތަފާތު ބަސްބަހުން ވާހަކަދައްކާ، ތަފާތު ދަރިކޮޅުތަކުގެ މީހުން އެއްތަނެއްގައި އުޅެން ޖެހުން ހިމެނޭކަމަށެވެ. އެގޮތުން އެ ތަނެއްގެ މައްޗަށް ދަޢުވާކުރެވި އަނެއް ބަޔަކަށްވުރެ ތިމާމެން މާ މޮޅުކަމަށް ގަބޫލުކުރެވި އުފެދޭ އިޙްސާސްތަކެއްގައި ހަނގުރާމަ ހިނގައިފައި އެބަހުރިކަމަށާއި، ނަމަވެސް ދިވެހީންނަށް ބަލާއިރު މި ތަފާތު ނެތްކަމަށް ރައީސް ވިދާޅުވިއެވެ.
"ދިވެހީން ވާހަކަދައްކަނީ އެއް ބަހަކުން. ލިޔަނީ އެއް އަކުރަކުން. އެހެންވީމާ، ބަހުގެ މައްޗަށް ބޮޑާވެ ދެބަސްވެގަތުމެއް ދިވެހީންގެ ކިބަޔަކު އެއް އިރަކު ވެސް ނެތް." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
ރައީސް ވިދާޅުވީ ތަފާތު އެކި ނަސްލުތައް އޮތުމަކީ ވެސް ބޮޑެތި ހަމަނުޖެހުން އުފެދޭ ކަމެއްކަމަށެވެ. ދިވެހިރާއްޖެއަށް ބަލާއިރު ނަސްލީ ތަފާތުތަކެއް ވެސް ނެތްކަމަށާއި، ދޮނާ ކަޅުގެ ހަނގުރާމައެއް ރާއްޖެއަކު ދުވަހަކު ވެސް ނުހިނގާކަމަށް ރައީސް ވިދާޅުވިއެވެ. އެ ފަދަ ކަމެއް ހިނގާނެ އެއްވެސް ސަބަބެއް ވެސް، އެއްވެސް ޒަމާނަކު ރާއްޖެއަކު ނެތްކަމަށްވެސް ރައީސް ވިދާޅުވިއެވެ.
"ދިވެހީންގެ ނަސްލަކީ ދިވެހި ނަސްލު. ދިވެހިބަހުން ވާހަކަދައްކާ ދިވެހީންގެ ނަސްލު. އެހެންވީމާ، ނަސްލުގެ ގޮތުން ވެސް ދިވެހީން މި ވަނީ އެއްގޮތްވަންތަ ބަޔަކަށް." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
ރައީސް ވިދާޅުވީ ސަގާފަތަކީ ބަޔަކު އުޅޭ ގޮތްކަމަށާއި، އެއީ ދިރިއުޅުމުގައި ކަންކަން ކުރާ ގޮތްކަމަށެވެ. އަދި އެއީ ތަޢުލީމު އުނގެނުމުގައި ޢަމަލު ކުރާ ގޮތްކަމަށާއި، މަސައްކަތްތަކާއި ސިޔާސީ ގޮތުން ވެސް ދަމަހައްޓާ ގޮތްކަމަށް ރައީސް ވިދާޅުވިއެވެ. ވަރަށް ފަހަކާ ޖެހެންދެން މި ކަންކަންވެސް އޮތީ ހަމަ އެއް ގޮތަކަށްކަމަށާއި، ދިރިއުޅެން ގެދޮރު އަޅައި އުޅުނީ ހުރިހައި ރަށެއްގައި ވެސް ދާދި އެއް ގޮތަކަށްކަމަށްވެސް ރައީސް ވިދާޅުވިއެވެ. އޮޑިދޯނި ފަހަރު ބަނދެ ފެނަށް ބާލަނީ އެއް ސިފަޔަކަށްކަމަށާއި، ތަޢުލީމު ވެސް އެފަދަކަމަށް ރައީސް ވިދާޅުވިއެވެ.
"ބޮޑުތަރުތީބުން ކިޔެވި އިރު އެންމެން ވެސް ކިޔެވީ ބޮޑުތަރުތީބުން. ތަޢުލީމުއްދީޔާނާއިން ކިޔެވި އިރު އެ ފޮތުން. ފަހުން އިނގިރޭސި ތަޢުލީމަށް ބަދަލުވެ ޖީ.ސީ.އީ. ނަގަން ފެށުމުން ދެން އެންމެން ވެސް މިސްރާބު ޖެހީ ޖީ.ސީ.އީ.އާ ދިމާއަށް. އެއަށް ފަހު މަތީ ތަޢުލީމަށް. ހަމަ އެހެންމެ، ސިޔާސީ ސަގާފަތަށް ބަލާއިރު، އެ ދުވަސްވަރު ހަމަ ކޮންމެ ރަށެއްގައި ވެސް ކަތީބަކާއި ކުޑަކަތީބަކާއި އަދި އަތޮޅުގައި ނައިބަކާއި އަތޮޅުވެރިޔަކު ހުންނަވާ. އެއީ، ރަށްފުށުގެ ސިޔާސީ ބާރުވެރިކަން ތަރުތީބުވެފައި އޮތްގޮތް. ހުރިހައި ރަށެއްގައި ވެސް މިހެން. އެހެންވީމާ، ސަގާފީ ގޮތުން ވެސް ދިވެހީންގެ ކިބައިން ފެންނަނީ އެއްގޮތްވަންތަކަން. އެއްބައެއްކަން." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
ރައީސްގެ ވާހަކަފުޅުގައި އިންސާނާގެ އެންމެ ފުނުގައިވާ އެއް އިޙްސާސަކީ ދީނުގެ އިޙްސާސްކަމަށް ވިދާޅުވިއެވެ. ދިވެހިން އިސްލާމްދީން ޤަބޫލުކޮށް، އެ ދީނުގެ ބިންގަލުގެ ނަތީޖާއަކަށް ވީ މާތް އަޚްލާޤެއްގެ ވެރި ޖީލެއް އުފެދި ހަރުދަނާކަން ހުރި މުޖުތަމަޢެއް އުފެދުންކަމަށް ރައީސް ވިދާޅުވިއެވެ. އަދި ޤައުމުގައި ޒިންމާދާރުކަން އުފެދުމަކީ އަޚްލާޤީ ގޮތުންނާއި ދީނީ ގޮތުން އުފެދުނު އިސްލާމީ އަޚްވަންތަކަމުގެ ބަދަހި މާތް ގުޅުމެއްކަމަށް ރައީސް ސިފަކުރެއްވިއެވެ.
"އެހެންވީމާ، ދީނީ ގޮތުން ވެސް، ދިވެހީންނަށް ލިބިފައި މި އޮތީ އާދަޔާ ޚިލާފު ބޮޑު އެއްގޮތްވަންތަކަމެއް." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
ރައީސްގެ ވާހަކަފުޅުގައި ދިވެހިރާއްޖޭގެ އެއްކޮޅުން އަނެއް ކޮޅަށް ބަލާއިރު ރަށްތައް އުފެދިފައި ހުންނަނީ ދާދި އެއް ގޮތަކަށްކަމަށާއި، އެތުރިފައި އޮންނަނީ ވެސް ދާދި އެއް ސިފައެއްގައިކަމަށް ވިދާޅުވިއެވެ. ކަނޑުތަކުގެ އޮޔާއި ވަޔާއި މޫސުމާއި އަދި ކަނޑުފަޅުގެ ކުލައިގައި ވެސް ތަފާތެއް ނުހުންނަކަމަށާއި، ރާއްޖޭގެ އެންމެ އުތުރުން އޮތް ރަށުގައި ހެދޭ ގަސް، ރާއްޖޭގެ އެންމެ ދެކުނު ރަށުގައި ވެސް ހެދޭކަން ރައީސް ފާހަގަކުރެއްވިއެވެ. މިއީ ޤުދުރަތީ ވަރަށް މަތިވެރި ނަސީބެއްކަން ފާހަގަކުރައްވަމުން ރައީސް ވިދާޅުވީ މި އެއްގޮތްވަންތަ ސިފަތަކަކީ، ދިވެހިރާއްޖެއަށް ޚާއްޞަ ސިފަތަކެއްކަމަށެވެ. ނަމަވެސް، ދުނިޔޭގެ ބައެއް ބައްރުތަކަށް ބަލައިލާއިރު، ފެންނަނީ ތަފާތުކަންކަމަށް ވިދާޅުވިއެވެ. އެއީ ހަނަފަސްކަމާއި ފަރުބަދަތަކާއި ކޯރުތައްކާއި މޫސުމުގެ ތަފާތުކަންކަމަށް ވިދާޅުވިއެވެ.
މި ހުރިހައި ކަމަކަށް ބަލައި ދުނިޔޭގެ ޤައުމުތަކުން ދިވެރާއްޖެ ސިފަކުރަނީ މި ބިންމަތީގެ ސުވަރުގޭގެ ގޮތުގައިަމަށް ވިދާޅުވިއެވެ.
ރައީސްގެ ވާހަކަފުޅުގައި އަޅުގަނޑުމެންގެ އާއިލީ ގުޅުންތަކަށް ފަރުވާ އެބަ ބޭނުންވާކަމަށް ހާމަކުރައްވަމުން ވިދާޅުވީ އަޅުގަނޑުމެންގެ ދޭދޭ ކުލުނުވެރިކަމާއި އެއްބަނޑުއެއްބަފާކަން ގާއިމުކުރުމަށް އެހީ ބޭނުންވާކަމަށެވެ. ދިވެހީން އެކަކު އަނެކަކުގެ އަބުރަށް ޢިއްޒަތަށް ޙުރުމަތްތެރިކޮށް ހިތުމަށް، މަގުދައްކައިދޭން ޖެހޭކަމަށާއި، ދިވެހިންގެ ހިތްތަކަށް ރަޙުމާއި ކުލުނާއި އޯގާވެރިކަމުގެ މޫސުމެއް އަންނަން ޖެހޭކަމަށްވެސް ރައީސް ވިދާޅުވިއެވެ. އެމަނިކުިފާނު ދެކެން ބޭނުންފުޅުވަނީ އެ ދުވަސްކަމަށާއި، މާޒީން ދިވެހީން ދެކެފައިވި، އެކުވެރިކަމުގެ ދުވަސްކަމަށް ރައީސް ވިދާޅުވިއެވެ. އެ ގުޅުންތެރިކަމުގެ ދުވަސް ދެކެން ބޭނުންފުޅުވާކަމަށް ރައީސް ވިދާޅުވިއެވެ. ޤައުމީ އެއްބައިވަންތަކަމުގެ ދުވަސް އަޅުގަނޑުމެންނަށް ދޭ ފިލާވަޅަކީ އެއީކަމުގައިވެސް ރައީސް ވިދާޅުވިއެވެ.
"އަޅުގަނޑުމެންގެ ދޭދޭ ކުލުނުވެރިކަމާއި އެއްބަނޑުއެއްބަފާކަން ގާއިމުކުރުމަށް އެހީ އެބަ ބޭނުންވޭ. އަޅުގަނޑުމެން ދިވެހީން އެކަކު އަނެކަކުގެ އަބުރަށް ޢިއްޒަތަށް ޙުރުމަތްތެރިކޮށް ހިތުމަށް، މަގުދައްކައިދޭން އެބަ ޖެހޭ. އަޅުގަނޑުމެންގެ ހިތްތަކަށް ރަޙުމާއި ކުލުނާއި އޯގާވެރިކަމުގެ މޫސުމެއް އަންނަން އެބަ ޖެހޭ.
އަޅުގަނޑު ދެކެން ބޭނުންވަނީ އެ ދުވަސް. މާޒީން އަޅުގަނޑުމެން ދެކެފައިވި، އެކުވެރިކަމުގެ ދުވަސް. ގުޅުންތެރިކަމުގެ ދުވަސް. " ރައީސް ޑރ. މުޙައްމަދު މުޢިއްޒު ވިދާޅުވިއެވެ.
ރައީސްގެ ވާހަކަފުޅުގައި ޒަމާންތަކަށް ދިވެހިންގެ ވުޖޫދު ކަށަވަރުކޮށްދެއްވައި، އެއްރޫޙެއްގައި އެއް ޢަޒުމެއްގައި ދެމިތިބި ތިބުން ދަމަހައްޓަވައިދެއްވުމަށް އެދިވަޑައިގެންނެވިއެވެ. އެކަމަށްޓަކައި މިއީ އެއްބައިވަންތަ އެކުވެރި ޤައުމެއްކަން ހަމަ ކޮންމެ ދިވެއްސަކު ބަހާއި ޢަމަލުން ސާބިތުކޮށްދެއްވުމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގެންނެވިއެވެ.