ހާފިޒުންގެ އެސޯސިއޭޝަނެއް އުފެއްދެވުމުގެ ޚިޔާލު ވަޒީރު ޝަހީމް ދެއްވައިފި

ދިވެހި ހާފިޒުންނަށް ޚާއްސަ އެސޯސިއޭޝަނެއް އެފެއްދުމުގެ ޚިޔާލު އިސްލާމީ ކަންތައްތަކާ ބެހޭ ވަޒީރު މުޙައްމަދު ޝަހީމް ޢަލީ ސަޢީދު ދެއްވައިފިއެވެ.

ވަޒީރު މި ޚިޔާލު ދެއްވާފައިވަނީ ޒުވާން ދިވެހި ހާފިޒުންނާއެކު އެމަނިކުފާނު ބޭއްވެވި ބައްދަލުކުރެއްވުމުގެ ތެރެއިންނެވެ. މި ބައްދަލުވުމަކީ ރަމަޟާންމަހު ޙިފްޡުކޮށް ތަރާވީޙުނަމާދު ކުރުމާ ގުޅޭގޮތުން ބޭއްވި ބައްދަލުވުމެކެވެ.

މި ބައްދަލުވުމުގައި، ޒުވާން ދިވެހި ހާފިޒުންނަށް ތަމްރީން ޕްރޮގްރާމެއް ކުރިއަށްގެންދިއުމަށް ވަނީ މަޝްވަރާކުރެވިފައެވެ.

ޒުވާން ހާފިޒުން އިތުރުވަމުންދާކަން ވަޒީރު ޑރ. ޝަހީމްވަނީ ފާހަގަކުރައްވާ، ހާފިޒުންގެ އެސޯސިއޭޝަނެއް އުފެއްދެވުމުގެ ޚިޔާލު ދެއްވާފައިވެއެވެ. އަދި އިސްލާމީ މަރުކަޒާއި، ސަލްމާން މިސްކިތް އަދި ބޮޑެތި މިސްކިތްތަކުގައި އިމާމުވެ ތަރާވީޙު ނަމާދު ކުރުމަށް ޒުވާން ދިވެހި ހާފިޒުންނަށް ފުރުޞަތު ދިނުމުގެ ގޮތުން ރަމަޟާންމަހުގެ ކުރިން މުރާޖާ ކުލާހެއް ހިންގުމަށް ހަމަޖެހިފައިވާކަމަށް ޑރ. ޝަހީމް ވިދާޅުވިއެވެ.

މި ބައްދަލުވުމަށްފަހު ވަޒީރު ޑރ. ޝަހީމް ވަނީ ޒުވާން ދިވެހި ހާފިޒުންނަށް ނަމާދާއިގުޅޭ ފޮތްތަކެއްވެސް ހަދިޔާ ކުރައްވާފައެވެ.

ދީނީ ކަންކަމަށް އިސްކަންދީ ރައްޔިތުންގެ ހޭލުންތެރިކަން އިތުރުކުރުމަށް މިސްކިތްތަކުގައި ތިއްބަވާ އިމާމުންނަކީ ހޭލުންތެރި ބަޔަކަށް ހެއްދެވުމުގެ މަސައްކަތްވެސް އިސްލާމީ ކަންތައްތަކާބެހޭ ވުޒާރާއިން ދަނީ ކުރައްވަމުންނެވެ.

މިގޮތުން އިމާމުންގެ ތެރެއިން މާސްޓަރސް ޑިގްރީ ޙާސިލްކޮށްފައިވާ ފަރާތްތަކުގެ ތެރެއިން ޕީ.އެޗް.ޑީއަށް ދާން ބޭނުންވާ ފަރާތްތަކަށް އެފުރުޞަތުވެސް އިސްލާމިކް މިނިސްޓްރީއިން ވަނީ ހުޅުވާލާފައެވެ. މިޕްރޮގްރާމަށްވެސް ތަރުހީބު ލިބެމުންދާކަމަށް އެ ވުޒާރާއިން ވިދާޅުވެއެވެ.