ވަޒީރުންނަށް ރުހުން ދޭންޖެހޭ، މަސްލަޙަތު އޮތް ގޮތަކީވެސް އެއީ: ޤާސިމް
-
ޤާސިމް ވިދާޅުވީ ވަޒީރުންނަށް ރުހުން ދޭންޖެހޭކަމަށް
-
އިންޑިއާ ސިފައިންގެ މައްސަލަ ހައްލުވާނެކަމަށް ޔަޤީންކަން އެބައޮތްކަމަށް
ޤާނޫނު އަސާސީގައި ބަޔާންކުރާ ކަންކަން ފުރިހަމަވާނަމަ، ރައްޔިތުންގެ މަޖިލީހުން ވަޒީރުންނަށް ރުހުން ދޭންޖެހޭކަމަށް ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ޤާސިމް އިބްރާހީމް ވިދާޅުވެއްޖެއެވެ. ޤާސިމް މިހެން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި މިއަދު ބައްދަލުކުރައްވުމަށްފަހު، ރައީސުލްޖުމްހޫރިއްޔާގެ އޮފީހުގެ ބޭރުގައި ހުންނަވާ ނޫސްވެރިން ކުރެއްވި ސުވާލުތަކަށް ޖަވާބުދެއްވަމުންނެވެ.
ޤާސިމް ވިދާޅުވީ ރައީސް ޑރ. މުޢިއްޒާއި ބައްދަލުކުރައްވާ މައިގަނޑު ގޮތެއްގައި މަޝްވަރާކުރެއްވީ ޤައުމުގެ ހަމަޖެހުން ޤާއިމްކުރުމަށް ގުޅިގެން މަސައްކަތްކުރެވޭނެ ކަންކަމާ ގުޅޭގޮތުންކަމަށެވެ.
ޤާސިމް ވިދާޅުވީ ޤައުމުގެ ހަމަޖެހުން މުހިންމުކަމަށާއި، ހަމަޖެހުން ގެއްލިއްޖެނަމަ އޭގެ ނޭދެވޭ އަސަރު ޤައުމަށާއި އިޤްތިޞާދަށް ކުރާނެކަމަށެވެ. އެހެންކަމުން ޤާނޫނު އަސާސީއާއި އެއްގޮތްވާގޮތުގެ މަތިން ސަރުކާރުން ނިންމާ ނިންމުންތަކާ ކުރައްވާ މަސައްކަތްތަކަށް، ސަރުކާރަށް އެއްބާރުލުން ފުރިހަމައަށް ދެއްވާނެކަމަށްވެސް ޤާސިމް ވިދާޅުވިއެވެ.
ޤާސިމްވަނީ ވަޒީރުންނަށް ރުހުން ހޯދުމަށް މަޖިލީހަށް ފޮނުއްވާފައިވާ މައްސަލައަށްވެސް ވާހަކަފުޅު ދައްކަވާފައެވެ. ޤާސިމް ވިދާޅުވީ ވަޒީރުންނަށް ރުހުން ދިނުމަކީ މަޖިލީހުން ކޮންމެހެން ކުރަންޖެހޭކަމެއްކަމަށެވެ. ޤައުމުގެ މަސްލަހަތު އޮތްގޮތަކީވެސް އެއީކަމަށް ޤާސިމް ވިދާޅުވިއެވެ.
"ޤާނޫނު އަސާސީއާއި ޤާނޫނުގައި ފުރިހަމަވެފައިވާ ކަންކަން އެއްވެސް މެންބަރެއްގެ ހަމަވާމަށްވަންޔާ އެމީހަކަށް ރައީސުލްޖުމްހޫރިއްޔާ "ޑިސައިޑުކުރައްވާ" ފޮނުވި ނަންތަކަށް ރުހުން ދިނުމަކީ ރައްޔިތުންގެ މަޖިލީހުން ކުރަންޖެހޭނެކަމެއް. އަޅުގަނޑު ރައީސަށް ދެއްނެނވިން އަޅުގަނޑަށް ކޮށްދެން އޮތް ހުރިހާ ކަމެއް ޤާނޫނާ އެއްގޮތްވާގޮތުގެ މަތިން ކޮށްދޭނަމޭ." ޤާސިމް އިބްރާހީމް ވިދާޅުވިއެވެ.
އިންޑިއާ ސިފައިން ފޮނުވާލުމުގެ މައްސަލައާއި ގުޅޭގޮތުން ޤާސިމް ވިދާޅުވީ، ރައީސް ޑރ. މުޢިއްޒު ވަޢުދުވެވަޑައިގެންނެވިގޮތަށް އެކަން ކުރައްވާނެކަމަށެވެ. މިއީ ސަރުކާރުގެ ވަރަށް ކުރީކޮޅުކަން ފާހަގަކުރައްވަމުން ޤާސިމް ވިދާޅުވީ ރައީސް ވަޢުދުވެވަޑައިގެންނެވިގޮތަށް އެކަން ކުރައްވާނެކަމުގެ ޔަޤީންކަން އެބައޮތްކަމަށެވެ.
އިންޑިއާ ސިފައިން ރާއްޖޭގައި ޤާއިމްވެ ތިބި މައްސަލައަކީ ފާއިތުވި 3 ސަރުކާރުގައިވެސް ޙައްލު ނުވެ އޮތް މައްސަލައެއްކަމަށެވެ. ނަމަވެސް މިސަރުކާރުން އެކަމަށް ހައްލު ހޯދައިދެއްވަމުން ގެންދަވާކަމަށާއި، އެކަން ކުރައްވާނެކަމުގެ ޔަޤީންކަންވެސް އެބައޮތްކަން ޤާސިމް ތަކުރާރު ކުރެއްވިއެވެ.