ވަޒީރުންނަށް ރުހުން ދޭން ދެކޮޅުހަދަނީ އެމްޑީޕީގެ މަދު މެންބަރުންކޮޅެއް: ޢަލީ ޢާރިފް
-
ވަޒީރުންނަށް ރުހުން ހޯއްދެވުމަށް ފޮނުއްވީ ނޮވެމްބަރު 21ގައި
-
މިކަމަށް ދެކޮޅު ހަދަނީ މަދު މެންބަރުންކޮޅެއް
-
ޢާރިފް ވިދާޅުވީ މިކަން ނުކުރަނީ ސިޔާސީ ބޭނުމެއްގައިކަމަށް
-
މަޖިލީހަށް ލާޒިމުކުރަނީ، ވަޒިރުންގެ ޝަރުތު ހަމަވާނަމަ ރުހުން ދިނުމަށްކަމަށް
ވަޒީރުގެ މަޖިލީހަށް ރުހުންނުދީ މަޖިލީހުގެ ތެރެއިން ދަތިކުރުމަކީ، އިދިކޮޅުގެ ގިނަ މެންބަރުންވެސް އެކަމަށް ތާޢީދުކުރާ ކަމެއް ނޫންކަމަށާއި، އެއީ މަޖިލީހުގެތެރެއިން ވަކި ބަޔަކު ރައީސުލްޖުމްހޫރިއްޔާގެ މަސްޢޫލިއްޔަތު އަދާކުރުމަށް ހުރަސްއަޅަން ކުރައްވާކަމެއްކަމަށް ރައީސުލްޖުމްހޫރިއްޔާގެ އޮފީހުގެ ވަޒީރު ޢަލީ ޢާރިފް ވިދާޅުވެއްޖެއެވެ.
ވަޒީރުންގެ މަޖިލީހަށް ރުހުން ހޯއްދެވުމަށް، ރައިސުލްޖުމްހޫރިއްޔާ ޑރ.މުޙައްމަދު މުޢިއްޒު ރައްޔިތުންގެ މަޖިލީހަށް ފޮނުއްވެވީ ނޮވެމްބަރުމަހުގެ 21ވަނަ ދުވަހުއެވެ. ޤާނޫނު ބުނާގޮތުން ވަޒީރުންގެ މަޖިލިސް އައްޔަން ކުރައްވާތާ ހަފްތާއެއްގެ ތެރޭގައި މަޖިލީހުގެ ރުހުން ހޯއްދަވަން ފޮނުވަން ޖެހިވަޑައިގަންނަވައެވެ.
ނަމަވެސް ރައީސުލްޖުމްހޫރިއްޔާ ނަންތައް ހުށައެޅުއްވިތާ މަސް ދުވަސް ވެގެންދިޔައިރުވެސް، ރައްޔިތުންގެ މަޖިލީހުން ވަޒީރުންނަށް ރުހުން ދެއްވާފައެއް ނުވެއެވެ.
މި މައްސަލައާއި ގުޅޭ ތަފްސީލް ޕީއެސްއެމްގެ ރާއްޖެމިއަދު ޕްރޮގްރާމްގައި ޙިއްސާކުރައްވަމުން، ރައީސުލްޖުމްހޫރިއްޔާގެ އޮފީހުގެ ވަޒީރު އަދި ކެލާ ދާއިރާގެ ކުރީގެ މަޖިލިސް މެންބަރު ޢަލީ ޢާރިފް ވިދާޅުވީ، ވަޒީރުންގެ މަޖިލީހަށް ރުހުން ހޯއްދެވުމަށް ރައީސުލްޖުމްހޫރިއްޔާއަށް ޤާނޫނުން ލާޒިމުކުރާ މަޞްޢޫލިއްޔަތު އެމަނިކުފާނު ފުރިހަމައަށް އަދާކުރައްވާފައިވާކަމަށެވެ. ޤާނޫނު ބުނާގޮތުން ކެމިނެޓު އެކުލަވާލުމުގެ އެންމެހާ މަސައްކަތަކީ ރައީސުލްޖުމްހޫރިއްޔާގެ ނިންމެވުމެއްކަމަށް ޢަލީ ޢާރިފް ވިދާޅުވިއެވެ. މަޖިލީހުގެ ޒިންމާއަކަށްވަނީ، ޤާނޫނު އަސާސީން މަޖިލީހަށް ލާޒިމްކުރާގޮތަށް، ވަޒީރުގެ މަޤާމަށް އައްޔަންކުރާ ބޭފުޅުންގެ ޤާނޫނު ބުނާ ޝަރުރުތައް ހަމަވޭތޯ ބަލައި ރުހުން ދިނުންކަމަށް ޢަލީ ޢާރިފް ވަނީ ވިދާޅުވެފައެވެ.
ރައީސުލްޖުމްހޫރިއްޔާގެ އޮފީހުގެ ވަޒީރު ވިދާޅުވީ، މި ޝަރުތުތައް ވަޒީރުންގެ ހަމަވާކަން މަޖިލީހުން ކަށަވަރުކުރައްވާފައިވާކަމަށެވެ. އެހެންކަމުން ސިޔާސީ ބޭނުމެއް ފިޔަވައި، ވަޒީރުންނަށް ރުހުން ނުދޭންވީ އެއްވެސް ސަބަބެއް މިހާރު ނެތްކަމަށްވެސް ވަޒީރު ވިދާޅުވިއެވެ.
ޢަލީ ޢާރިފް ވިދާޅުވީ، ވަޒީރުންނަށް ރުހުން ދިނުމަށް ދެކޮޅުހަދާ، މައްސަލަ ދިގުދަންމަނީ އެމްޑީޕީގެ ހުރިހާ މެންބަރުން ބޭނުންފުޅުވެގެން ނޫންކަމަށާއި، އެގޮތަށް ބޭނުންވަނީ އެމްޑީޕީގެ ވަރަށް މަދު މެންބަރުންތަކެއްކަމަށެވެ. މެންބަރުންގެ މި ޢަމަލުތަކާމެދު ހިތްހަމަޖެހިވަޑައިނުގަންނަވާ އިދިކޮޅުގެ އެތަށް މެންބަރުން މަޖިލީހުގައި އެބަތިއްބެވިކަމަށްވެސް ޢަލީ ޢާރިފް ވިދާޅުވިއެވެ.
"މަޖިލީހުގެ އެމްޑީޕީގެ މެންބަރުންގެވެސް ބޮޑު އިންސައްތައެއް މިކަމާ ދެކޮޅު. ލީޑަޝިޕްވެސް މިކަމުގައި ނުހިމެނޭ. އަޅުގަނޑަށް ޔަގީން ޕާޓީގެ އާންމު މެންބަރުންވެސް މިކަމާ ދެކޮޅުހަދާ. ބައެއްގެ ބާރު ގެއްލުނީމަ އުފެދިގެން އުޅޭ ނުތަނަވަސްކަމެއްގެ ސަބަބުން ރުހުން ނުދޭން ހިފަހައްޓަނީ." ޢަލީ ޢާރިފް ވިދާޅުވިއެވެ.
ޢަލީ ޢާރިފް ވިދާޅުވީ ވަޒީރުންނަށް ރުހުންދިނުމާއި ދެކޮޅުހެދުމަކީ މީގެކުރީގެ އެއްވެސް މަޖިލީހަކުން ކަންކުރިގޮތެއް ނޫންކަމަށެވެ. މިކަމުގެ ސަބަބުން އެބޭފުޅުންގެ ވުޒާރާތައް ހިންގުމާއި، މަސްޢޫލިއްޔަތު އަދާކުރަން ހުރަސްއެޅޭކަމަށް ޢާރިފް ވިދާޅުވިއެވެ.
"ވަޒީރުންނަށް ރުހުން ދޭކަށް ބޭނުމެއް ނުވޭ. އެކަމަކު ކަންކަމުގައި ސަރުކާރު ޖަވާބުދާރީކުރުވަން ވަޒީރު އެބަ މަޖިލީހަށް ހާޒިރުކުރޭ. އިސްފަސްކޮށް ކަންކަން އެ ގެންދަނީ، ދެކޮޅެއް ނުޖެހޭ." ޢަލީ ޢާރިފް ވިދާޅުވިއެވެ.
މި ޕްރޮގްރާމްގައި ވާހަކަފުޅު ދައްކަވަމުން ފެނަކަ ކޯޕަރޭޝަންގެ މެނޭޖިން ޑިރެކްޓަރ އަދި މަޑަވެލި ދާއިރާގެ ކުރީގެ މެންބަރު މުއާޒު މުޙައްމަދު ރަޝީދު ވިދާޅުވީ، ޤާނުނު އަސާސީގައި ބުނެފައިވަނީ ރައީސުލްޖުމްހޫރިއްޔާގެ ކެބިނެޓް މެންބަރުންގެ ޝަރުތުތައް ފުރިހަމަވާނަމަ، ރުހުންދިނުމަށްކަމަށެވެ. އެއީ މަޖިލިސް މެންބަރުންގެ އިޚްތިޔާރީކަމެއް ނޫންކަމަށް މުޢާޒް ވިދާޅުވިއެވެ.
"ވަޒީރު ޤާބިލުތޯ ނުވަތަ ނޫންތޯ ކަނޑައަޅާނީ ރުހުންދިނުމަށްފަހުގައި. އެ ބޭފުޅުންގެ މަސްޢޫލިއްޔަތު އަދާކުރެއްވުމަށް ފުރުޞަތު ދީފައި. ރައީސަކު އައްޔަންކުރީ ރައްޔިތުންގެ އަޤުލަބިއްޔަތުން. އެ ރައީސް ކެބިނެޓް އައްޔަންކުރައްވަނީ. އެހެންވީމައި ހުރަސްއަޅަންޖެހޭ ސަބަބެއް ނެތް." މުޢާޒު މުޙައްމަދު ރަޝީދު ވިދާޅުވިއެވެ.
ވަޒީރުންނަށް ރުހުން ދިނުމުގެ މައްސަލަ ދިރާސާކުރައްވަނީ ރައްޔިތުންގެ މަޖިލީހުގެ ސަރުކާރުގެ މަސްޢޫލިއްޔަތުއ ަދާކުރާ މިންވަރުބަލާ ކޮމިޓީންނެވެ. އެ ކޮމިޓީން ފުރަތަމަ ނިންމެވީ ހުރިހާ ވަޒީރުންނަށް ރުހުން ދިނުމަށް ފެންނަކަމަށެވެ. އަދި ވަޒީރުންނަށް ރުހުން ދިނުމަށް ތަޅުމުގައި ވޯޓަށް އަހާނީ ވަކިވަކިންކަމަށްވެސް ކޮމިޓީން ނިންމާފައިވެއެވެ.
ނަމަވެސް ކޮމިޓީން އެގޮތަށް ނިންމަވާ ތަޅުމަށް ފޮނުއްވި ރިޕޯޓުގައި ބައެއް ފުށުރުންތަކެއް ހުރިކަމަށް އެބަހުރިކަމަށްބުނެ އެމްޑީޕީގެ ސުޕަ މެޖޯރިޓީ އޮތް މަޖިލީހުން ވަނީ އެ މައްސަލަ އަލުން އަނބުރާ ކޮމިޓީއަށް ފޮނުވާފައެވެ. މެންބަރުން އުޒުރެއްގެ ގޮތުގައި ދެއްކެވީ ވުޒާރާތަކުގެމެންޑޭޓު ފާސްނުކުރައްވާ ވަޒީރުންނަށް ރުހުން ދިނުން ދެކޮޅު ނުޖެހޭކަމަށެވެ.
ނަމަވެސް ނިމިދިޔަ ސަރުކާރުގައިވެސް ވުޒާރާތަކުގެ މެންޑޭޓު މަޖިލީހުން ފާސްކުރައްވާފައިވަނީ ވަޒީރުންނަށް ރުހުން ދިނުމަށްފަހުގައިކަން ފާހަގަކޮށްލެވެއެވެ.
ވަޒީރުންނަށް ރުހުން ދިނުމުގެ މައްސަލަ ފާސްނުކޮށް އަލުން ކޮމިޓީއަށް ފޮނުވާލާފައިވާއިރު، މަޖިލީހުގެ ދައުރު ވަނީ މިމަހުގެ 28އާއި ހަމައަށް ދިގުދައްމާލާފައެވެ.