މުސާރަ ބޮޑުކުރަން ފާސްކުރީ ސަރުކާރުން އެދިގެނެއް ނޫން، ބޮޑުކުރާކަށް ބޭނުމެއްވެސް ނޫން: ރައީސް
ރައީސުލްޖުމްހޫރިއްޔާއާއި، ރައީސުލްޖުމްހޫރިއްޔާގެ ނައިބުގެ އިތުރުން ވަޒީރުންނާއި ދައުލަތުގެ އިސް އެހެނިހެން މަޤާމުތަކުގެ ބޭފުޅުންގެ މުސާރަ ބޮޑުކުރަން އެދިވަޑައިގެންފައި ނުވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، އެމްޑީޕީގެ އަޣްލަބިއްޔަތު އޮތް މާލިއްޔަތު ކޮމިޓީން ދައުލަތުގެ ތިން ބާރުގެ ވެރިންނާއި، ރައީސުލްޖުމްހޫރިއްޔާގެ ނައިބާއި، ވަޒީރުންނާއި ރައްޔިތުންގެ މަޖިލީހުގެ މެންބަރުންގެ މުސާރަ ބޮޑުކުރުމަށް ފާސްކުރެއްވުމާއި ގުޅިގެންނެވެ.
ނަމަވެސް ރާއްޖޭގެ އިޤްތިޞާދީ މިހާރުގެ ޙާލަތަށް ބަލައި މުސާރަ ބޮޑުކުރުމަށް ކޮމިޓިން ނިންމި ނިންމުމަށް ގިނަބައެއްގެ ފާޑުކިޔުން ވަނީ ޢަމާޒުވެފައެވެ.
އެކަމާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ރައީސުލްޖުމްހޫރިއްޔާއާއި، އެމަނިކުފާނުގެ ނައިބު އަދި ވަޒީރުންގެ މުސާރަ ބޮޑުކުރަން ސަރުކާރުން އެދިވަޑައިގެންފައިނުވާނެކަމަށާއި، ބޮޑުކުރައްވަން ބޭނުންފުޅުވެސް ނުވާކަމަށެވެ.
ރައީސް ޑރ. މުޢިއްޒު ވިދާޅުވީ، އެއްވެސް މަޝްވަރާއެއް ކުރުމެއް ނެތި މިގެނައި ބަދަލުގެ ސަބަބުން ލިބޭ މުސާރައިގެ ކުރިއެރުން ކުޑަކުދިންގެ ހިޔާފަދަ އިޖްތިމާޢީ ފަންޑަކަށް ހަދިޔާކުރަން ނިންމާފައިވާކަމަށެވެ.
Raees, naib raees, vazeerunge musaara bodu kuran sarukaarun edhifa nuvaane. Adhi bodu kuraakah beynumevves noon. Evves mashwara eh kurumehnethi mi genai badhaluge sababun libey musaaraige kuri erun kudakudhinge hiyaa fadha ijthimaaee fund akah hadhiyaa kuran alhugandumen…
— Dr Mohamed Muizzu (@MMuizzu) December 20, 2023
މާލިއްޔަތު ކޮމިޓީގެ އިއްތިފާޤުން ފާސްކުރައްވާފައިވަނީ ރައީސުލްޖުމްހޫރިއްޔާގެ މުސާރަ 120،000 ރުފިޔާއަށް ބޮޑުކުރެއްވުމަށެވެ. މިހާތަނަށް ރައީސުލްޖުމްހޫރިއްޔާއަށް ލިބިވަޑައިގަންނަވަމުން ގެންދެވީ 100،000 ރުފިޔާއެވެ. ރައީސުލްޖުމްހޫރިއްޔާގެ ނައިބުގެ މުސާރަ ބޮޑުކުރައްވަން ފާސްކުރެއްވީ 93،000 ރުފިޔާއަށެވެ. ރައީސުލްޖުމްހޫރިއްޔާގެ ނައިބަށް މިހާތަނަށް ލިބިވަޑައިގެންނެވީ 75،000 ރުފިޔާއެވެ.
ވަޒީރުންގެ މުސާރަ ބޮޑުކުރައްވަން ފާސްކުރެއްވީ 72،000 ރުފިޔާއަށެވެ. މިހާތަނަށް ވަޒީރަކަށް ލިބިވަޑައިގަތީ 66،000 ރުފިޔާގެ މުސާރައެކެވެ.
ދައުލަތުގެ ވެރިންގެ އިތުރުން ރައްޔިތުންގެ މަޖިލީހުގެ މެންބަރުންނާއި މޭޔަރުންނާއުި ކައުންސިލްތަކުގެ ރައީސުންނާއި މެންބަރުންގެ މުސާރަވެސް ބޮޑުކުރަން ކޮމިޓީން ފާސްކުރެއްވިއެވެ. މިގޮތުން ރައްޔިތުންގެ މަޖިލީހުގެ މެންބަރުންގެ މުސާރަ އެއްލައްކަ ރުފިޔާއަށް ބޮޑުކުރަން މަޖިލީހުގެ މާލިއްޔަތު ކޮމިޓީން ފާސްކޮށްފައިވެއެވެ. މަޖިލީހުގެ މެންބަރުންނަށް މުސާރައިގެ ގޮތުގައި މިހާރު ލިބިވަޑައިގަންނަވަނީ 62،500 ރުފިޔާއާއި، ކޮމިޓީ އެލަވަންސްގެ ގޮތުގައި 20،000 ރުފިޔާއާ އެކު ޖުމްލަ 82،500 ރުފިޔާއެވެ.