މާލޭ މޭޔަރުކަމަށް ވާދަކުރައްވާ ކެންޑިޑޭޓުންގެ ނަންތައް ތަރުތީބުކޮށްފި، ޢާޒިމާއަށް 3، ޢާޒިމަށް 4
-
މޭޔަރުކަމަށް ކުރިމަތިލުމަށް ހުޅުވާލީ މިދިޔަ މަހުގެ 28 ގައި
-
މޭޔަރު ބައި-އިލެކްޝަންގައި 5 ކެންޑިޑޭޓުން ވާދަކުރައްވާ
-
ބައި-އިލެކްޝަން އޮންނާނީ އަންނަަމަހު 13 ގައި
މާލޭ ސިޓީއަށް މޭޔަރަކު ހޮވުމަށް ބާއްވާ ބައި-އިލެކްޝަންގައި ވާދަކުރައްވާ ކެންޑިޑޭޓުންގެ ނަންތައް ރަސްމީކޮށް އިޢުލާނުކޮށް، ކެންޑިޑޭޓު ނަންބަރު ތަރުތީބުކޮށްފިއެވެ.
މޭޔަރުކަމަށް ވާދަކުރައްވާ ކެންޑިޑޭޓުންގެ ނަންތައް ތަރުތީބުކޮށްފައިވަނީ، އެކަމަށްޓަކާ ދަރުބާރުގޭގަައި މިއަދު ބޭއްވި ރަސްމިއްޔާތުގައެވެ.
މޭޔަރު އިންތިޚާބުގެ އިތުރުން، މި ރަސްމިއްޔާތުގައި ވަނީ މާލެ ސިޓީ ކައުންސިލުން ހުސްވެފައިވާ 3 ގޮނޑިއަށް ވާދަކުރައްވާ ކެންޑިޑޭޓުންގެ ނަންތައް ރަސްމީކޮށް އިޢުލާނުކޮށް، ކެންޑިޑޭޓު ނަންބަރު ކަނޑައެޅުމަށް ގުރުއަތުލާފައެވެ. މާލެ ސިޓީ ކައުންސިލުން ގޮނޑި ހުސްވެފައިވާ 3 ދާއިރާއަކީ ހެންވޭރު ދެކުނާއި، މާފަންނު ދެކުނުގެ އިތުރުން މެދު ހެންވޭރެވެ.
މާލޭ މޭޔަރުކަމަށް ވާދަކުރައްވާ ކެންޑިޑޭޓުންގެ ނަންތައް ތަރުތީބުން:
• ކެންޑިޑޭޓް ނަންބަރު 1: ޝުޢައިބު ޢަލީ/ އަމިއްލަ ގޮތުން
• ކެންޑިޑޭޓް ނަންބަރު 2: ޙުސައިން ވަހީދު / އަމިއްލަ ގޮތުން
• ކެންޑިޑޭޓް ނަންބަރު 3: ޢާއިޝަތު ޢާޒިމާ ޝަކޫރު / ޕީއެންސީ
• ކެންޑިޑޭޓް ނަންބަރު 4: އާދަމް ޢާޒިމް / އެމްޑީޕީ
• ކެންޑިޑޭޓް ނަންބަރު 5: ސައިފް ފާތިހު / ދަ ޑިމޮކްރެޓްސް
މާލެ ސިޓީ މޭޔަރުކަމަށާއި، މާލެ ސިޓީ ކައުންސިލުން ހުސްވެފައިވާ 3 ގޮނޑިއަށް ކުރިމަތިލުމަށް އިލެކްޝަންސް ކޮމިޝަނުން ހުޅުވާލީ ނޮވެންބަރުމަހުގެ 28 ގައެވެ. މުއްދަތު ދީފައިވަނީ މިމަހުގެ 13 އާއި ހަމައަށެވެ.
މާލެ ސިޓީއަށް މޭޔަރަކު ހޮވުމާއި، ކައުންސިލަށް 3 މެންބަރުން ހޮވުމަށް ބާއްވާ ބައި-އިލެކްޝަން އޮންނާނީ އަންނަ ޖެނުއަރީމަހުގެ 13 ވަނަ ދުވަހުއެވެ.
މާލެ ސިޓީ މޭޔަރުގެ ގޮނޑި ހުސްވީ އެ މަޤާމުގައި ހުންނެވި، މިހާރުގެ ރައީސުލްޖުމްހޫރިއްޔާ ޑރ. މުޢިއްޒު، ރައީސްކަމަށް އިންތިޚާބުވުމާއިއެކު، މޭޔަރުކަމުން އިސްތިއުފާދެއްވުމާއި ގުޅިގެންނެވެ. ސިޓީ ކައުންސިލްގެ 3 ގޮނޑި ހުސްވެފައިވަނީ އެ މަޤާމުގައި ތިއްބެވި މެންބަރުން، ސަރުކާރުގެ މަޤާމުތަކަށް އައްޔަން ކުރެއްވުމާއިއެކު، މެންބަރުކަމުން އިސްތިއުފާދެއްވުމާއި ގުޅިގެންނެވެ.