10،000 ހަމަވެ ފައިސާ ލިބެނީ 6 ޕާޓީއަކަށް، އެ ލިސްޓަށް ޕީއެންސީވެސް އަރައިފި

ދައުލަތުގެ ބަޖެޓުން ފައިސާ ލިބޭ ޢަދަދަށް މެންބަރުން ހަމަވަނީ 6 ސިޔާސީ ޕާޓީއެއްގައިކަމަށް އިލެކްޝަންސް ކޮމިޝަނުން ކަނޑައަޅައިފިއެވެ.

އިލެކްޝަންސް ކޮމިޝަނުގެ ނައިބު ރައީސް އިސްމާޢީލް ޙަބީބު ވިދާޅުވީ އަންނަ އަހަރުގެ ދައުލަތުގެ ބަޖެޓް ފާސްކުރި ދުވަހާ ހަމަޔަށް ދިހަހާސް މެންބަރުން ހަމަވަނީ 6 ސިޔާސީ ޕާޓީއެއްގައިކަމަށެވެ. އަންނަ އަހަރަށް ލަފާކުރާ ދައުލަތުގެ ބަޖެޓު ފާސްކުރީ އިއްޔެއެވެ.

ސިޔާސީ ޕާޓީތަކުގެ ޤާނޫނުގައިވާ ގޮތުން ސިޔާސީ ޕާޓީތަކުގެ ތެރެއިން ދައުލަތުގެ ބަޖެޓުގެ 0.01 އިންސައްތަ ފައިސާ ސިޔާސީ ޕާޓީތަކަށް ދޫކުރަންޖެހެއެވެ. މިއަދަދަށް ފައިސާ ދޫކުރާނީ ސިޔާސީ ޕާޓީތަކުގެ ތެރެއިން 10،000 މެމްބަރުން ހަމަވާ ޕާޓީތަކަށެވެ. އަދި ޕާޓީތަކަށް ފައިސާ ދޫކުރުމުގައި އިލެކްޝަނުން ބަލާފައިވަނީ ބަޖެޓް ފާސްކުރިއިރު 10،000 މެމްބަރުން ހަމަވާ ޕާޓީތަކަށެވެ.

2024 ވަނައަހަރުގެ ދައުލަތުގެ ބަޖެޓް ފާސްކުރި ދުވަހާ ހަމަޔަށް ދިހަހާސް މެންބަރުން ހަމަވަނީ 6 ސިޔާސީ ޕާޓީއެއްގައި.
އެއީ، އެމްޑީޕީ، ޕީޕީއެމް، ޖުމްހޫރީ ޕާޓީ، ޢަދާލަތު ޕާޓީ، އެމްޑީއޭ އަދި ކޮންގްރެސް ޕާޓީ. @ElectionsMv @mvpeoplesmajlis @presidencymv @MoFmv @MDPSecretariat…

— Ismail Habeeb (@IsmailHabeeb) December 14, 2023

ދައުލަތުގެ ބަޖެޓުން ފައިސާ ލިބޭ ސިޔާސީ ޕާޓީތައް

- އެމްޑީޕީ
- ޕީޕީއެމް
- ޖުމްހޫރީ ޕާޓީ
- ޢަދާލަތު ޕާޓީ
- އެމްޑީއޭ
- ކޮންގްރެސް ޕާޓީ

ފައިސާ ލިބޭ ލިސްޓުގައި އަލަށް ހިމެނުނު ޕާޓީއަކީ ކޮންގްރެސް ޕާޓީ ނުވަތަ ޕީއެންސީއެވެ.
ވެރިކަންކުރާ ޕާޓީ، ޕީއެންސީގައި މިއަހަރުގެ ފެބުރުވަރީ 21ގެ ނިޔަލަށް ތިބީ 3159 މެންބަރުންނެވެ. ނަމަވެސް ރިޔާސީ އިންތިޚާބު ކާމިޔާބުކުރެވުމާއި ގުޅިގެން އެޕާޓީއަށް މެންބަރުން އިތުރުކުރުމަށް އިސްކަންދެއްވައިގެން ޚާއްޞަ މަސައްކަތްތަކެއް ކުރެއްވިއެވެ.

ޕީއެންސީން ބުނެފައިވަނީ އެ ޕާޓީގެ ޢަމާޒަކީ މިއަހަރު ނިމުމުގެކުރިން ތިރީސް ހާސް މެންބަރުން ހަމަކުރުންކަމަށެވެ.

އިލެކްޝަންސް ކޮމިޝަނުގެ ދަފްތަރުގައި 10 ސިޔާސީ ޕާޓީއެއް އެބައޮތެވެ. ދިހަ ހާސް މެންބަރުން ހަމަނުވަނީ ދަ ޑިމޮކްރެޓްސްއާއި، އެމްއާރުއެމްގެ އިތުރުން އެމްއެންޕީއާއި، މޯލްޑިވްސް ތާރޑްވޭ ޑިމޮކްރެޓްސް، އެމް.ޓީ.ޑީއެވެ.