ނުރައްކާތެރި ކުށްވެރިން ހިމެނޭހެން 400އަށްވުރެ ޤައިދީން ކުރީ ސަރުކާރުން މިނިވަންކުރި

ކުޑަކުދިންނާ ބެހުމާއި، މާރާމާރީއާއި އެނޫންވެސް ނުރައްކާތެރި އެކި ކުށްތަކުގައި ޖަލަށް ލާފައިވާ 400އަށްވުރެ ގިނަ ޤައިދީން ނިމިދިޔަ ސަރުކާރުން މިއަހަރުގެ ތެރޭގައި މިނިވަންކޮށްފައިވާކަން ހާމަވެއްޖެއެވެ.

ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ޕީއެސްއެމް ނިއުސްއާ ހިއްސާކުރި މަޢުލޫމާތުތަކުން ދައްކާގޮތުގައި ކްލެމެންސީ އާއި ޕެރޯލްގެ ދަށުން މިއަހަރުގެ ޖެނުއަރީ މަހުގެ ފުރަތަމަ ދުވަހުން ފެށިގެން ނޮވެންބަރުމަހުގެ16 ވަނަ ދުވަހާއި ހަމައަށް ޙުކުމަށް ނުވަތަ ބަންދަށް ލުއިދީގެން 434 މީހަކު ޖަލުން ވަނީ ދޫކޮށްލާފައެވެ. މީގެ ތެރެއިން 289 މީހުންނަށް ރައީސުލްޖުމްހޫރިއްޔާ މަޢާފުދީފައިވާކަމަށް އެ މަޢުލޫމާތުތަކުން އެނގެއެވެ.

މަޢާފުދީގެން ދޫކޮށްލާފައިވާ މީހުންގެ ތެރޭގައި ޖިންސީ ކުށެއްކޮށްގެން ބަންދުކުރި 3 މީހަކާއި، މަސްތުވާތަކެތީގެ މުޢާމަލާތެއް ހިންގުމުގެ ސަބަބުން ބަންދުކުރި 248 މީހަކާއި، ވަޔަލެންސް ކްރައިމެއް ނުވަތަ ނުރައްކާތެރި ކުށެއް ހިންގުމުގެ ސަބަބުން ޙުކުމެއް ތަންފީޛު ކުރަމުންދާ 16 މީހެއްގެ އިތުރުން، މުދަލާއި ފައިނެންޝިއަލް ދާއިރާ އާއި ގުޅޭ ކުށެއްކޮށްގެން 21 މީހެއް އަދި ދޮގު މަޢުލޫމާތު ދިނުމުން ބަންދު ކުރި އެއް މީހަކު ހިމެނެއެވެ.

ހަމައެއާއެކު، ޕްރޯލްގެ ދަށުން 53 މީހަކު ދޫކޮށްލާފައިވާ ކަމަށްވެސް ތަފާސްހިސާބުތަކުން ދައްކައެވެ. އެގޮތުން، ޖިންސީ ކުށަކަށް އަރައިގަތުމުގެ ސަބަބުން ބަންދުކުރި 2 މީހަކާއި، މަސްތުވާތަކެތީގެ މުޢާމަލާތެއް ހިންގުމުގެ ސަބަބުން ބަންދުކުރި، 46 މީހެއްގެ އިތުރުން ވަޔަލެންސް ކްރައިމެއް ހިންގުމުގެ ސަބަބުން ބަންދުކުރި 3 މީހަކު އަދި މުދަލާއި ފައިނެންޝިއަލްގެ ދާއިރާއިން ކުށެއްކޮށްގެން ބަންދުކުރި 2 މީހަކު ހިމެނެއެވެ.

ހަމައެހެންމެ، މިއަހަރުގެ ޖެނުއަރީން ނޮވެންބަރުގެ ނިޔަލަށް 91 މީހަކު ގޭ ބަންދަށްވެސް ބަދަލުކޮށްފައިވެއެވެ. އެގޮތުން، ޖިންސީ ކުށެއްގެ ސަބަބުން ބަންދުކުރި 22 މީހަކާއި، މަސްތުވާތަކެތީގެ މުޢާމަލާތެއް ހިންގުމުގެ ސަބަބުން ބަންދުކުރި 36 މީހެއްގެ އިތުރުން، ވަޔަލެންސް ކްރައިމެއް ހިންގުމުގެ ސަބަބުން ބަންދުކުރި 7 މީހަކު އަދި މުދަލާއި ފައިނެންޝިއަލްގެ ދާއިރާއިން ކުށެއްކޮށްގެން ބަންދުކުރި 19 މީހަކު ވަނީ ގެއަށް ބަދަލުކޮށްދީފައެވެ. މީގެ އިތުރަށްވެސް، އެހެނިހެން ދާއިރާއަކުން ކުށެއްކޮށްގެން ބަންދުކުރި 7 މީހަކު ވަނީ ގޭ ބަންދަށް ބަދަލުކޮށްފައެވެ.

ތަފާސްހިސާބުން ދައްކާ ގޮތުގައި ޙުކުމް ތަންފީޛުކޮށް ނިމި، 220 މީހަކު ދޫކޮށްލާފައިވާއިރު، ނޭޝަނަލް ޑްރަގް އެޖެންސީގެ ފަރުވާއަށް 9 މީހަކު، ދޫކޮށްލާފާއިވެއެވެ. އަދި ބޭސްފަރުވާއަށް 4 މީހަކު ވަނީ ރާއްޖެއިން ބޭރަށް ފޮނުވާފައެވެ. ހަމައެހެންމެ، 151 މީހަކު ވަނީ ކޯޓުން ބަންދު ޢުމުރު ނުވަތަ ޙުކުމް ބާޠިލްކުރުމުގެ ސަބަބުން ދޫކޮށްލާފައެވެ.

މަޢާފުދިނުމާއި އަދަބު ލުއިކޮށްދިނުމުގެ ޤާނޫނުގައި ބަޔަންކުރަނީ، ރައީސުލްޖުމްހޫރިއްޔާ ކަނޑައަޅާ ޝަރުޠަކާއެކު، ކުށް މަޢާފުކޮށްދިނުމުގެ ނުވަތަ އަދަބު ލުއިކޮށްދިނުމުގެ އިޚްތިޔާރު ރައީސުލްޖުމްހޫރިއްޔާއަށް ލިބިގެންވާކަމަށެވެ.

މިދިޔަ ސަރުކާރު ނިމެން ކައިރިވެފައިވަނިކޮށް އެމްއެމްޕީއާރްސީގެ ޚިޔާނާތުގެ މައްސަލައިގައި ކުށް ސާބިތުވެ ޖަލަށް ހުކުމްކޮށްފައިވާ ކުރީގެ ނައިބު ރައީސް އަހުމަދު ޢަދީބާއި އެމްއެމްޕީއާރްސީގެ ކުރީގެ މެނޭޖިންގ ޑިރެކްޓަރ ޢަބްދުﷲ ޒިޔަތަށް އޭރުގެ ރައީސުލްޖުމްހޫރިއްޔާ ވަނީ މަޢާފްދެއްވައި މިނިވަންކޮށްދެއްވާފައެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ދަޢުރު ނިމެން ތިން ދުވަހަށްވެފައިވަނިކޮށް، އެމަނިކުފާނަށް ލިބިވަޑައިގަންނަވާ ބާރުގެ ދަށުން އަދީބާއި ޒިޔަތަށް އަދަބު މަޢާފްކޮށްދެއްވަން ނިންމެވި ސަބަބެއް ސާފެއް ނުވެއެވެ.