ޙަމަލާ ހުއްޓުވާ ޤަރާރު އެމެރިކާއިން ވީޓޯ ކުރުމުން ރާއްޖޭގެ ކަންބޮޑުވުން

އޮކްޓޫބަރު ހަތް ވަނަ ދުވަހުން ފެށިގެން ޔަހޫދީ ފައުޖުތަކުން ފަލަސްޠީނުގެ ޣައްޒާގައި ހިންގަމުންދާ ޢުދުވާނީ ޙަމަލާތައް މިހާރުން މިހާރަށް ހުއްޓާލުމަށް އދގެ ސަލާމަތީ މަޖިލީހަށް ހުށަހެޅި ޤަރާރު އެމެރިކާއިން ވީޓޯ ކުރުމުން ރާއްޖެއިން ކަންބޮޑުވުން ފާޅުކޮސްފިއެވެ.

ރާއްޖެއިން މި ކަންބޮޑުވުން ފާޅުކުރެއްވީ، އެމެރިކާއިން ރާއްޖެއަށް ކަނޑައަޅާފައިވާ ސަފީރު އެޗްއީ ހޫގޯ ޔޮންއާއެކު ރާއްޖޭގެ ޚާރިޖީ ވަޒީރު މޫސާ ޒަމީރު ބޭއްވެވި ބައްދަލުކުރެއްވުމުގައެވެ.

ސަފީރާ ބައްދަލުކުރައްވާ ދެއްކެވި ވާހަކަފުޅުގައި ޚާރިޖީ ވަޒީރު މޫސާ ޒަމީރު ވަނީ ފަލަސްޠީނުގެ މައްސަލައާމެދު ގޮތެއް ނިންމުމުގައި އދ.ގެ ސަލާމަތީ މަޖިލީހުން ނުކުޅެދިފައިވާކަމާމެދު ކަންބޮޑުވުން ފާޅުކުރައްވާފައެވެ. ވަޒީރު ވަނީ ހަނގުރާމަ ހުއްޓާލައި ޣައްޒާއަށް އިންސާނީ އެހީ ފޯރުކޮށްދެވޭނެ ދޮރުތައް ހުޅުވާލުމަށް ގޮވާލެއްވިކަމަށްވެސް ވަޒީރު ވިދާޅުވިއެވެ.

މި ބައްދަލުކުރެއްވުމުގައި ދިފާޢީ ދާއިރާ، ވިޔަފާރި، އަދި ރައްޔިތުންނާ ދެމެދު އޮންނަ ގުޅުން ހިމެނޭ ގޮތަށް އެކި ދާއިރާތަކުން އެއްބާރުލުން ދިނުމަށް މަޝްވަރާކުރެއްވިކަމަށްވެސް ޚަރިޖީ ވަޒީރު މޫސާ ޒަމީރު ވިދާޅުވިއެވެ.

I had a productive meeting with US Ambassador H.E. Hugo Yon where we discussed 🇲🇻-🇺🇲 cooperation in different areas including defence, trade, and people-to-people ties.

I also expressed concerns regarding the recent UN Security Council vote on Gaza, and reiterated our call for… pic.twitter.com/Q4fFgTMuyo

— Moosa Zameer (@MoosaZameer) December 11, 2023

ޔަހޫދީ ފައުޖުތަކުން ފަލަސްޠީނުގެ ޣައްޒާގައި ހިންގަމުންދާ ޢުދުވާނީ ޙަމަލާތައް މިހާރުން މިހާރަށް ހުއްޓާލުމަށް ގޮވާލާ ރަބި އެކުވެރި އިމާރާތް (ޔޫއޭއީ)ން އިސްވެ އދގެ ސަލާމަތީ މަޖިލީހަށް ހުށަހެޅި ޤަރާރަށް 13 ޤައުމަކުން ވަނީ ތާޢީދުކޮށްފައެވެ. އެ ޤަރާރާ ދެކޮޅަށް ވޯޓުދިނީ އެމެރިކާއެވެ.

ވީޓޯ ކުރުމުގެ ބާރު ލިބިފައިވާ ސަލާމަތީ ކައުންސިލްގެ ދާއިމީ ފަސް މެންބަރު ޤައުމުތަކުގެ ތެރެއިން އެއް މެންބަރު ޤައުމު ކަމަށްވާ އެމެރިކާއިން ވަނީ ޙަމަލާތައް ހުއްޓާލުމަށް ދެކޮޅު ކަމަށް ތަކުރާރުކޮށް ބުނެފައެވެ.

އެމެރިކާއިން ވާގިވެރިވެގެން އޮކްޓޫބަރު ހަތް ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގައި ހިންގަމުންދާ ޢުދުވާނީ ޙަމަލާތަކުގައި މިހާތަނަށް 17،500 އަށްވުރެ ގިނަ މީހުން ވަނީ ޝަހީދުކޮށްލާފައެވެ.