ޑިމޮކްރެޓްސް އިންތިޚާބުގެ ބައެއް ވޯޓު ފޮށިތަކުގެ ނަތީޖާ ބާޠިލްކޮށްފި

މިދިޔަ ހޮނިހިރު ދުވަހު ބޭއްވި ދަ ޑިމޮކްރެޓްސްގެ އެތެރޭގެ އިންތިޚާބުގެ، ބައެއް ވޯޓުފޮށިތަކަށް އިތުރަށް ވޯޓުލާފައިވާތީ އެވޯޓު ފޮށިތަކުގެ ނަތީޖާ ބާޠިލުކޮށްފިއެވެ.

ޑިމޮކްރެޓްސްގެ އިންތިޚާބާއި ގުޅޭގޮތުން މީޑިއާއަށް މަޢުލޫމާތު ދެއްވަމުން އެޕާޓީގެ ޕާލިމަންޓްރީ ގްރޫޕްގެ ލީޑަރު ޢަލީ ޢާޒިމް ވިދާޅުވީ، ބާޠިލްކުރުމަށް ނިންމާފައިވަނީ އެޕާޓީގެ ޔަންގް ޑިމޮކްރެޓްސް ލީޑަރާއި، ޑެޕިއުޓީ ލީޑަރު ހޮވުމަށް ބައެއް ދާއިރާތަކުގައި ނެގި ވޯޓުގެ ނަތީޖާކަމަށެވެ. އެގޮތުން 13 ރަށެއްގައި ބެހެއްޓި ބައެއް ވޯޓު ފޮށީގެ ނަތީޖާ ބާޠިލްކޮށްފައިވާކަމަށް ޢާޒިމް ވިދާޅުވިއެވެ.

ޑިމޮކްރެޓްސްއިން ވަނީ ނަތީޖާ ބާޠިލުކުރި ފޮށިތަކުގެ ވޯޓު އަލުން ލުމަށްވެސް ނިންމާފައެވެ. ޢާޒިމް ވިދާޅުވީ ބައެއް ވޯޓު ފޮށިތަކުގައި އެފަދަ މައްސަލަތަކެއް ހުރީ އިންތިޚާބު އިންތިޒާމްކުރުމުގައި ހުރި ބައެއް މައްސަލަތަކުގެ ސަބަބުންކަމަށެވެ. ޢާޒިމް ވަނީ ނަތީޖާ ބާޠިލްކުރި ފޮށިތަކުގެ އަލުން އިންތިޚާބު ބާއްވާނެ ތާރީޚެއް ފަހުން އިިއުލާންކުރައްވާނެކަމަށް ވިދާޅުވެފައެވެ.

ޑިމޮކްރެޓްސްއިން ކުރިން ޢާންމުކުރި ނަތީޖާއިން ދެއްކި ގޮތުގައި ޑިމޮކްރެޓްސްގެ ރައީސްކަމަށް ބޭފުޅަކު އިންތިޚާބުކުރުމަށް 3 ހާހަށްވުރެ ގިނަ މީހުން ވޯޓުލާފައިވެއެވެ. އެ ޕާޓިގެ ރައީސްކަމަށް ވާދަކުރެއްވީ ހަސަން ލަތީފާއި ޙުސައިން ޢަމްރުއެވެ. ޙަސަން ލަޠީފަށް 1704 ވޯޓު ލިބިވަޑައިގެންނެވިއެވެ. އަދި ހުސައިން އަމްރުއަށް 1300 ވޯޓު ލިބިވަޑައިގަތެވެ.

މިއިންތިޚާބުގައި އެޕާޓީގެ 43 މަޤާމަކަށް މެންބަރުން އިންތިޚާބުކޮށްފައިވެއެވެ.