ނައީމާގެ މަރުގެ މައްސަލާގައި 3 މީހަކަށް ދައުވާކޮށްފި

ނ. މަނަދޫގައި މަރާލާފައި އޮތްވާ ފެނުނު ނައީމާ މޫސާގެ މަރުގެ މައްސަލާގައި 3 މީހެއްގެ މައްޗަށް ދައުވާކުރުމަށް ފުލުހުން ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.

މަނަދޫ އަންނާރުމާގެ އުމުރުން 62 އަހަރުގެ ނާއިމާ މޫސާއަށް ތޫނު އެއްޗަކުން ހަމަލާދީ މަރާލާފައި އޮއްވާ ފެނުނީ އޭޕްރިލްމަހުގެ 7 ވަނަދުވަހުއެވެ. އެ މައްސަލާގައި ތިން މީހަކު ހައްޔަރުކުރިއިރު އެ އެންމެނަކީވެސް އެރަށް ނިސްބަތްވާ މީހުންނެވެ.

ދައުވާކުރަން ފޮނުވި މީހުން

- މަނަދޫ ވިނަރެސް ޙުސައިން ފަވާޒު (21 އަހަރު )
- މަނަދޫ ފެހިވިލާގޭ އަހުޒަމް އަބްދުއްޝަކޫރު (23 އަހަރު )
- މަނަދޫ ފިނުފެންމާގެ އަބްދުލްވާހިދު ( 21 އަހަރު )

ޕީޖީ އޮފީހުން ވިދާޅުވީ ނައިމާގެ މަރާ ގުޅިގެން ދައުވާކުރަން ފޮނުވާފައިވާ 3 މީހުންގެ މައްސަލަ މި ހަފްތާގެ ތެރޭގައި ކޯޓަށް ފޮނުވުމުގެ މަސައްކަތް ކުރަމުން އަންނަކަމަށެވެ.

ނަޢީމާ މޫސާ މަރާލުމަށް ބޭނުންކުރިކަމަށް ބެލެވޭ 2 ހަތިޔާރަކާއި އެކަމުގައި ބައިވެރިވި މީހުން ލައިގެން ތިބި އަންނައުނު ފުލުހުން ވަނީ ހޯދާފައެވެ. އެތަކެތި ފުލުހުން ހޯދާފައިވަނީ ވަޅުގަނޑެއް ކޮނެ އަޅާ އަންދާލުމަށްފަހު ފަސްއަޅާ ފޮރުވާފައިވަނިކޮށް ކަމަށް ފުލުހުން ވަނީ ވިދާޅުވެފައެވެ.