ޕީއެސްއެމްގެ ތާރީޚުގައި ފުރަތަމަ އަންހެން މެނޭޖިންގ ޑިރެކްޓަރަކަށް ޒީނާ!

ޕަބްލިކް ސަރވިސް މީޑިއާ، ޕީއެސްއެމްގެ މެނޭޖިން ޑިރެކްޓަރުގެ މަޤާމަށް ގދ.ގައްދޫ އަތިރީގެ، ޒީނާ ޒާހިރު، ޕްރައިބަޓައިޒޭޝަން އެންޑް ކޯޕްރަޓައިޒޭޝަން ބޯޑުން މިއަދު އައްޔަންކުރައްވައިފިއެވެ. މިއީ ޕީއެސްއެމްގެ މެނޭޖިންގ ޑިރެކްޓަރުކަމުގެ މަޤާމަށް އަންހެން ބޭފުޅަކު އައްޔަނުކުރެއްވި ފުރަތަމަ ފަހަރެވެ.

ޕީއެސްއެމްގެ މެނޭޖިންގ ޑިރެކްޓަރުކަމަށް އައްޔަންކުރެއްވި ޒީނާ ޒާހިރަކީ މީޑިއާ ދާއިރާގެ ގިނަ ތަޖުރިބާތަކެއް ލިބިވަޑައިގެންހުނެވި ބޭފުޅެކެވެ.

Congratulations to Ms. @ZeenaZahir, our new Managing Director! pic.twitter.com/NYdX8RYx8j

— Public Service Media (@psm_mkt) November 28, 2023

ޒީނާ ޒާހިރު މީޑިއާގެ ދާއިރާއާއި ގުޅިވަޑައިގަތީ 2006 ވަނަ އަހަރުއެވެ. ސީނިއަރ ރިޕޯޓަރެއްގެ ގޮތުގައި "މިއަދު ޑެއިލީ"ގައި މަސައްކަތްކުރެއްވުމަށް ފަހު، ބްރޯޑްކާސްޓިންގ ދާއިރާގައި ވީޑިއޯ ޖަރނަލިސްޓް/ޕްރެޒެންޓަރެއްގެ ގޮތުގައި 2007 ވަނަ އަހަރުގެ ޑިސެމްބަރުން ފެށިގެން ތިންއަހަރަށްވުރެ ގިނަ ދުވަހު ޒީނާ ވަނީ ވީޓީވީގައި މަސައްކަތްކުރައްވާފައެވެ.

ޒީނާ ނޫސްވެރިއެއްގެ ގޮތުގައި މަސައްކަތްކުރެއްވި ޚާއްޞަ ދާއިރާތަކުގެ ތެރޭގައި، މަޖިލީހުގެ ޚަބަރުތަކާއި، ސިޔާސީ މަޞްރަޙް ޚަބަރުތަކާއި، އެދާއިރާގެ ދިރާސާތަކުގެ އިތުރުން، ޚަބަރާއި ކަރަންޓް އެފެއަރސް ޕްރޮގްރާމްތައް އުފައްދައި ހުށަހަޅައިދިނުން ހިމެނެއެވެ.

ޒީނާ ވަނީ، މީޑިއާއިގެ ދާއިރާއިން ރާއްޖެއާއި ރާއްޖެއިން ބޭރުން ގިނަ ތަމްރީންތަކެއް ފުރިހަމަކުރައްވާފައެވެ. ޒީނާ މަތީ ތަޢުލީމު ޙާސިލްކުރެއްވީ މާކެޓިން މެނޭޖްމަންޓާއި އިދާރީ މަސައްކަތްތަކާއި ގުޅޭ ދާއިރާތަކުންނެވެ. އެގޮތުން 2014ވަނަ އަހަރު، ޑިޕްލޮމާ އިން މާކެޓިން މެނޭޖްމަންޓް (އޭބީއީ ލެވަލް 5)، 2017ވަނަ އަހަރު ޑިޕްލޮމާ އިން މާކެޓިން މެނޭޖްމަންޓް (އޭބީއީ ލެވަލް 6) އަދި 2020ވަނަ އަހަރު އެވިޑް ކޮލެޖުން މާސްޓަރސް އޮފް ބިޒްނަސް އެޑްމިނިސްޓްރޭޝަން ޙާސިލްކުރައްވާފައިވެއެވެ.

ޒީނާ ޒާހިރުވަނީ "ސައުތް އޭޝިއަން ވިމެންސް މީޑިއާ ކޯ" ގެ ނާއިބު ރައީސާކަމާއި، ދިވެހި ރައްޔިތުންގެ ޕާޓީ (ޑީ.އާރު.ޕީ)ގެ ކައުންސިލް މެންބަރުކަމާއި، ސްޕޯކްސްޕާސަންގެ މަޤާމުވެސް އަދާކުރައްވާފައެވެ. އަދި މޯލްޑިވްސް ޕޯޓްސް ލިމިޓެޑްގެ އެސިސްޓެންޓް މެނޭޖަރ ގެ މަޤާމްގެ އިތުރަށް މޯލްޑިވްސް ބްރޯޑްކާސްޓިންގ ކޮމިޝަންގެ މެންބަރުކަމުގެ މަޤާމު 4 އަހަރާއި 7 މަސްދުވަހު އަދާކުރައްވާފައިވެއެވެ. ބްރޯޑްކާސްޓިންގ ކޮމިޝަންގެ މެންބަރުކަމުގެ މަޤާމަކީ، ރައީސުލްޖުމްހޫރިއްޔާ އައްޔަންކުރައްވާ މަޤާމެކެވެ.

ޒީނާއަކީ، ޑޮކިއުމަންޓްރީ ހެއްދެވުމާއި، ފޮތް ލިޔުއްވުމުގައިވެސް ފާހަގަކޮށްލެވޭ ބޭފުޅެކެވެ. ޒީނާގެ އަމިއްލަ "ޒީޓައިމްސް" ނަމުގައި މުޖުތަމަޢުގެ އެކި މައްސަލަތަކާއި އެހީތެރިކަން ބޭނުންވާ ފަރާތްތަކަށް އެހީވުމާއި، ޤައުމީ އެކި ކަންކަމުގެ މަޢޫލުމާތުތަކަށް ޚާއްޞަ އޮންލައިނެއް ރަޖިސްޓަރކޮށް އަންނަނީ ހިންގަވަމުނެވެ.

"ޒީޓައިމްސް"ގެ މަޤުޞަދަކީ ބޮޑެތި ބަލިތައް ތަހައްމަލުކުރަމުންދާ މީހުންގެ ވާހަކަ ހިމަނާ އެހީތެރިވުމާއި، ރާއްޖޭގައި ފާހަގަކޮށްލެވޭ މަސައްކަތްތައް ކުރާ މީހުން މަޢުލޫމާތު އާއްމު ރައްޔިތުންނަށް ހަމައަށް ގެނެސްދިނުމެވެ. ވޭތުވެދިޔަ 2 އަހަރު ޒީޓައިމްސްގައި 1300 ލިޔުން ޝާއިޢުކޮށްފައިވާއިރު މީގެތެރެއިން 500 ލިޔުން ލިޔެފައިވަނީ ޒީނާ އަމިއްލަފުޅައްކަން ފާހަގަކޮށްލެވެއެވެ.

އިޖުތިމާޢީ ގޮތުން ބާރުވެރި މުޖުތަމަޢުއެއް ބިނާކުރުމަށް އަންހެނުން ކުރާ މަސައްކަތް ފާހަގަކުރައްވާ، މިނިސްޓްރީ އޮފް ޖެންޑަރ ފެމިލީ އެންޑް ސޯޝަލް ޕްރޮޓެކްޝަން އެޖެންސީން ދެމުންއަންނަ "ރެހެންދި އެވޯޑް"ވެސް ޒީނާ ޒާހިރަށް ވަނީ ލިބިވަޑައިގެންފައެވެ.