ޕީސީބީގެ ބޯޑަށް 3 މެމްބަރުން އައްޔަންކުރައްވައިފި

ސަރުކާރުގެ ކުންފުނިތަކަށް ޑިރެކްޓަރުން އައްޔަންކޮށް އެތަންތަން މޮނިޓަރކޮށް ބަލަހައްޓާ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، 3 މެމްބަރަކު އައްޔަންކުރައްވައިފިއެވެ.

އެ ބޯޑަށް އަލަށް އައްޔަންކުރެއްވި 3 މެމްބަރުންނަކީ އެކައުންޓިންގ އެންޑް ފައިނޭންސްގެ ދާއިރާއިން، ދަފްތަރު. ނަންބަރު ރސ 4652. އަޙްމަދު މުޝްތާޤު،
ބޭންކިންގގެ ދާއިރާއިން، ވ. ބްލޫއޯޝަން، ލީނާ ޢަބްދުލްޖަލީލް އަދި ބިޒްނަސް އެޑްމިނިސްޓްރޭޝަންގެ ދާއިރާއިން، ،ރަންކޮކާގެ، ށ.ކޮމަންޑޫ، އަލްއުސްތާޛު މޫސާ ފަތުޙީ އާދަމް އެވެ. މޫސާ ފަތުޙީ އާދަމް ހުންނެވީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާ ސްޓޭޓް މިނިސްޓަރުގެ މަޤާމުގައެވެ.

ޕީސީބީގެ ބޯޑަށް މެމްބަރުން އައްޔަންކުރުމާއި ވަކިކުރުމުގެ ބާރު ލިބެނީ ރައީސުލްޖުމްހޫރިއްޔާއަށެވެ. އެހެންނަމަވެސް ބޯޑަށް އައްޔަންކުރާ މެމްބަރުންނަށް ރުހުން ދިނުމަށް މަޖިލީހަށް ފޮނުވަންޖެހެއެވެ.

7 މެމްބަރުން ހިމެނޭ ޕީސީބީގެ ބޯޑުގައި މިހާރު ތިއްބެވީ 4 މެމްބަރުންނެވެ. އެބޯޑުގެ ރައީސް ހިމެނޭހެން 3 މެމްބަރުންގެ ދައުރުވަނީ މިދިޔަ ސެޕްޓަމެބަރުމަހުގެ 18 ވަނަދުވަހު ހަމަވެފައެވެ. އެދުވަހުން ފެށިގެން އެ މަޤާމުތަކަށް އައު މެމްބަރުން އައްޔަންކުރައްވާފައި ނުވާތީ ބޯޑުގެ ބައްދަލުވުންތައް ބޭއްވޭ ވަރަށް އެތަނުގައި މެމްބަރުންނެތި އޮތީ ހުސްކަމެއްގެ ތެރޭގައެވެ. ޕީސީބީ ހިންގެވުމާއި މިހާރު ހަވާލުވެ ހުންނަވާނީ އެ ބޯޑުގެ ނައިބު ރައީސް މުހައްމަދު ފިރާޝްއެވެ.