ޗައިނާ، ކެމްބޯޑިއާ އަދި ޖީ.ސީ.ޓީ.ޕީގެ އިސް ބޭފުޅުންނާ ނާއިބު ރައީސް ބައްދަލުކުރައްވާ މަޝްވަރާކުރައްވައިފި

ގްލޯބަލް ކައުންސިލް ފޮރ ޓޮލަރެންސް އެންޑް ޕީސް (ޖީ.ސީ.ޓީ.ޕީ)ގެ ރައީސް، އަޙްމަދު ބިން މުޙައްމަދު އަލް ޖަރުވާން، ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފްގެ އަރިހަށް އިޙްތިރާމްގެ ޒިޔާރަތެއް ކުރައްވައިފިއެވެ. މިބައްދަލުކުރެއްވުން އޮތީ ރައީސުލްޖުމްހޫރިއްޔާގެ އޮފީހުގައެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބާއި ޖީ.ސީ.ޓީ.ޕީ.ގެ ރައީސް ދެއްކެވި ވާހަކަފުޅުގައި ޒުވާނުންނަށް އިތުރު ފުރުސަތުތައް ހޯދައިދިނުމާއި އެކި ދާއިރާތަކުން ކުރިއަރައިދިއުމަށް އެހީތެރިވުމުގެ މައްޗަށް އަލިއަޅުވާލެއްވިއެވެ. ޖީ.ސީ.ޓީ.ޕީ.ގެ ރައީސްގެ ވާހަކަފުޅުގައި އެ ކައުންސިލްގެ މައިގަނޑު ތަސައްވުރަކީ ތަޢުލީމާއި، މީޑިއާއާއި، މަޝްވަރާއާއި، އެއްބާރުލުން ދިނުން ފަދަ ތަފާތު އެކި ވަސީލަތްތައް މެދުވެރިކޮށް ކެތްތެރިކަމާއި ޞުލްޙަވެރިކަމުގެ ސަޤާފަތެއް ފެތުރުންކަމުގައި ވިދާޅުވިއެވެ.

ޖީ.ސީ.ޓީ.ޕީ.ގެ ރައީސްގެ ވާހަކަފުޅުގައި، އެ ކައުންސިލްގެ ފަރާތުން ހިންގާ ބައެއް ހަރަކާތްތަކުގެ ތެރޭގައި ސްކޮލަރޝިޕްތަކާއި ތަޢުލީމީ އެކި ކޯސްކޯހުގެ އިތުރުން ތަމްރީނު ޕްރޮގްރާމްތަކަށް ފުރުސަތު ފަހިކޮށްދިނުން ހިމެނޭކަން ފާހަގަ ކުރެއްވިއެވެ. މި ބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބު ވަނީ މިފަދަ ފުރުސަތުތަކުގެ ބޭނުން އަދުގެ ޒުވާނުންނަށް އޮތް މިންވަރު ހާމަކޮށްދެއްވައި، މިފަދަ ފުރުސަތުތަކުގެ ސަބަބުން ކުރިމަގުގެ ލީޑަރުން ބިނާކުރުމަށް މަގުފަހިވެގެންދާނެ ކަމުގައި ވިދާޅުވެފައެވެ.

މި ބައްދަލުވުން ނިންމަވާލައްވަމުން ދެ ބޭފުޅުންވެސް އެކުގައި މަސައްކަތް ކުރުމުގެ ޝައުގުވެރިކަން ފާޅުކޮށްފައިވެއެވެ.

ރައީސުލްޖުމްހޫރިއްޔާގެ ނައިބު ވަނީ ކެމްބޯޑިޔާގެ ޕާރލިމަންޓްގެ މެންބަރ، ކޮމިޝަން އޮފް ފޮރިން އެފެއާޒް، އިންޓަރނޭޝަނަލް ކޯޕަރޭޝަން، އިންފޮމޭޝަން އެންޑް މިޑިޔާ އޮފް ދަ ނޭޝަނަލް އެސެމްބްލީ އޮފް ދަ ކިންގްޑަމް އޮފް ކެމްބޯޑިޔާ ގެ ޗެއަރމަން، އަދި އިންޓަރނޭޝަނަލް ޕާރލިމަންޓް ފޮރ ޓޮލަރަންސް އެންޑް ޕީސް (އައި.ޕީ.ޓީ.ޕީ.)ގެ ރައީސް، ސުއާސް ޔާރާ އާވެސް ބައްދަލުކުރައްވާފައެވެ.

އައި.ޕީ.ޓީ.ޕީ. ގެ ރައީސް ސުއާސް ޔާރާ ވަނީ ރައީސުލްޖުމްހޫރިއްޔާގެ ނައިބު މަގާމާ ހަވާލުވެވަޑައިގެންނެވުމާ ގުޅިގެން އެމަނިކުފާނަށް މަރުޙަބާ ވިދާޅުވެފައެވެ. އަދި ރައީސުލްޖުމްހޫރިއްޔާގެ ނައިބު ވަނީ ސުއާސް ޔާރާ ރާއްޖެއަށް ޒިޔާރަތްކުރެއްވި ކަމަށްޓަކައި ޝުކުރު އަދާކުރައްވާފައެވެ.

މި ބައްދަލުކުރެއްވުމުގައި ދެ ބޭފުޅުން ވަނީ ދިވެހިރާއްޖެއާއި ކެމްބޯޑިއާއާ ދެޤައުމުގެ ގުޅުމާއި އަދި ބައިނަލްއަޤްވާމީ އެކި މައްސަލަތަކާ ގުޅޭގޮތުން ވާހަކަ ދައްކަވާފައެވެ. އެގޮތުން ޔުނިވަރސަލް ޕީސް ޗާޓަރ ބަލައިގަތުމުގެ މުހިންމުކަމާއި، އަދި ދުނިޔޭގެ ޞުލްހަޔާއި އަމަންއަމާންކަމަށް ގުޅިގެން މަސައްކަތް ކުރުމުގެ މުހިންމުކަން ދެ ބޭފުޅުންގެ ވާހަކަފުޅުގައިވެސް ފާހަގަ ކުރެއްވިއެވެ. ހަމަ އެހެންމެ، އިންޓަރނޭޝަނަލް ޕާރލިމަންޓް ފޮރ ޓޮލަރަންސް އެންޑް ޕީސްގެ ރައީސް ވަނީ ޞުލްހަޔާ އަމަންއަމާންކަމުގެ މަގަށް މަސައްކަތްކުރުމާއި އެކަންކަން ކުރިއެރުވުމުގައި ރާއްޖޭގެ ބައިވެރިވުން ލިބުމުގެ މުހިންމުކަން ފާހަގަކުރައްވައި އެކަމަށް ހިތްވަރުދެއްވާފައެވެ.

މިބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބާއި އައި.ޕީ.ޓީ.ޕީ. ގެ ރައީސް ވަނީ، ފަތުވެރިކަމުގެ ދާއިރާއާއި، ކާނާގެ ރައްކާތެރިކަން ކަށަވަރުކުރުމާއި، ސަގާފަތާގުޅޭ ކަންކަމުގައި ގުޅުންބަދަހިކުރުމާއި، ދިވެހިރާއްޖެއާއި ކެމްބޯޑިއާއާ ދެޤައުމުގެ ދެމެދު ސީދާ ވައިގެ ދަތުރުފަތުރު ފެށުމުގެ މުހިންމުކަން ފަދަ ކަންކަމާ ގުޅޭގޮތުންވެސް މަޝްވަރާކުރައްވާފައެވެ.

މީގެ އިތުރުން ޗައިނާގެ ރައީސްގެ ޚާއްޞަ މަންދޫބެއްގެ ހައިސިއްޔަތުން، ޕީޕަލްސް ރިޕަބްލިކް އޮފް ޗައިނާގެ ސްޓޭޓް ކައުންސިލަރ ޝެން ޔިކިންއާވެސް ރައީސުލްޖުމްހޫރިއްޔާގެ ނައިބު ބައްދަލުކުރައްވާފައިވެއެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބު ވަނީ، ރައީސުލްޖުމްހޫރިއްޔާގެ ހުވައި ކުރެއްވުމުގެ ރަސްމިއްޔާތުގައި ބައިވެރިވެވަޑައިތުމަށް ޗައިނާގެ ވަފްދު ރާއްޖެ ވަޑައިގަތްކަމަށްޓަކައި އެބޭފުޅުންނަށް ހޫނު މަރުޙަބާއެއް ދަންނަވާ ޝުކުރު އަދާކުރައްވާފައެވެ. އަދި، އެމަނިކުފާނު ވިދާޅުވި ގޮތުގައި މިކަމުން އެކަނިވެސް ދެ ޤައުމުގެ ދޭތެރޭގައިވާ ގާތް ގުޅުން ރަމްޒުކޮށްދެއެވެ.

ސްޓޭޓް ކައުންސިލަރ ޝެން ޔިކިން ދެއްކެވި ވާހަކަފުޅުގައި، ޗައިނާގެ ރައީސްގެ ޚާއްޞަ މަންދޫބެއްގެ ހައިސިއްޔަތުން ހުވައި ކުރުމުގެ ރަސްމިއްޔާތުގައި ބައިވެރިވުމަކީ ލިބިވަޑައިގެންނެވި ވަރަށް ބޮޑު އުފަލެއް ކަމުގައި ވިދާޅުވެ، ރައީސުލްޖުމްހޫރިއްޔާގެ ނައިބު މަގާމާ ޙަވާލުވެވަޑައިގަތުމުން މަރުޙަބާ ދެންނެވިއެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބާއި ޗައިނާގެ ރައީސްގެ ޚާއްޞަ މަންދޫބު ވަނީ، ދެ ޤައުމުގެ ދެމެދުގައިވާ ގުޅުމަކީ އިތުބާރާއި، އިޙްތިރާމާއި، ޚިޔާލު އެއްގޮތްވާ ކަންކަމުގެ މައްޗަށް ބިނާވެފައިވާ ގުޅުމެއްކަން ފާހަގަކުރައްވާފައެވެ. އަދި ދެބޭފުޅުން ވަނީ ދެ ޤައުމުގެ ދެމެދުގައި އިތުރަށް ގުޅުން ބަދަހިކުރެވޭނެ ދާއިރާތަކާ ގުޅޭ ގޮތުން އމަޝްވަރާކުރައްވާފައެވެ. މިގޮތުން، އިޤްތިޞާދީ ރޮނގުންނާއި، މާލީ ރޮނގުންނާއި، ދޭދޭ ޤައުމުގެ ރައްޔިތުންގެ މެދުގައިވާ ގުޅުންތައް ބަދަހިކުރުމާ ގުޅޭގޮތުން ދެ ބޭފުޅުން މަޝްވަރާކުރެއްވިއެވެ.

މި ބައްދަލުކުރެއްވުން ނިންމަވާލައްވަމުން ރައީސުލްޖުމްހޫރިއްޔާގެ ނައިބާއި، ޗައިނާގެ ރައީސްގެ ޚާއްޞަ މަންދޫބު ވަނީ ދެ ޤައުމުގެ ގުޅުން އިތުރަށް ބަދަހިކުރުމަށް އުންމީދުކުރައްވާކަމުގައި ވިދާޅުވެފައެވެ.