ޚާރިޖީ ސިޔާސަތު ބައްޓަންކުރެއްވީ ރާއްޖޭގެ މަޞްލަޙަތު ރައްކާތެރިކޮށް ޙިމާޔަތްކުރުމަށް: ރައީސް

މިދިޔަ ފަސް އަހަރު ތެރޭގައި ޚާރިޖީ ސިޔާސަތު ބައްޓަންކޮށްފައި އޮތީ ރާއްޖޭގެ އެންމެ މަތީ މަޞްލަޙަތު ރައްކާތެރިކޮށް ޙިމާޔަތްކުރުމުގެ މައްޗަށް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ޚާރިޖީ ޚިދުމަތުގެ އެންމެ މަތިވެރި ޝަރަފް އެރުވުމަށް މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ.

ޚާރިޖީ ދާއިރާގައި ދިގު މުއްދަތަކަށް ޚިދުމަތްކުރުމުގެ ޝަރަފަކީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުގެ އިސްނެންގެވުމަށް އަރުވަން ފެއްޓެވި ޝަރަފެކެވެ. މިޝަރަފު ޙާސިލްކުރެއްވި މިނިސްޓަރ އޮފް ސްޓޭޓް ފޮރ ފޮރިން އެފެއާޒް ކަމުގެ މަޤާމުގައި ހުންނެވި ގަލޮޅު އުތުރުގޭ އަޙްމަދު ޚަލީލަށާއި، ފޮރިން ސެކްރެޓެރީ ކަމުގެ މަޤާމުގައި ހުންނެވި ހެންވޭރު ސީވީޑް އަޙްމަދު ލަޠީފަށް އެމަނިކުފާނުވަނީ މަރުހަބާ ވިދާޅުވެ އެބޭފުޅުންގެ ޚިދުމަތަށް ޝުކުރު އަދާކުރައްވާފައެވެ.

މިރަސްމިއްޔާތުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި ވިދާޅުވީ، މިސަރުކާރު އައިއިރު، ބައިނަލްއަޤުވާމީ މައިދާނުގައި ރާއްޖެ އޮތީ ވަރަށް ބޮޑަށް އެކަހެރިވެފައި ކަމަށާއި، ބައިނަލްއަޤުވާމީ ޖަމާޢަތްތަކާ ދެމެދު އޮންނަ ގުޅުން އޮތީ ވަރަށް ބޮޑަށް ހީނަރުވެފައި ކަމަށެވެ. އަދި ބައެއް އިސްލާމީ ޤައުމުތަކާއި ރާއްޖެއާ ދެމެދު ގުޅުން ކެނޑިފައި އޭރު އޮތުމަކީ، ދިވެހިންނަށް ލިބުނު ވަރަށް ބޮޑު ދެރައެއް އަދި ނިކަމެތިކަމެއްކަން އެމަނިކުފާނު ފާހަގަކުރެއްވިއެވެ.

އަދި އަލުން ގުޅުން ޤާއިމުކޮށް، ބައިނަލްއަޤުވާމީ މުޖްތަމަޢުގައި ދިވެހިރާއްޖެއަށް އަލުން އަނބުރާ އިތުބާރާއި ޔަޤީންކަން ހޯއްދެވުމަށް މިނިސްޓަރ އޮފް ފޮރިން އެފެއަރޒްގެ ޢަބްދުﷲ ޝާހިދު ކުރެއްވި މަސައްކަތްތައް ފާހަގަކުރައްވައި، އެމަނިކުފާނަށް ރައީސުލްޖުމްހޫރިއްޔާ ޝުކުރު އަދާކުރެއްވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި، ދިވެހި ޚާރިޖީ ޚިދުމަތުގެ ދާއިރާއަށް މިސަރުކާރުން މުހިއްމު ބަދަލެއް ގެނެސްފައިވާކަން ފާހަގަކުރެއްވިއެވެ. އެގޮތުން 2022ވަނަ އަހަރު، ޤާނޫނަކުން ބާރު ލިބިދޭ ޚިދުމަތެއްގެ ގޮތުގައި ދިވެހި ފޮރިން ސަރވިސް އުފެދިގެންދިއުމަކީ، އެއިރެއްގައި އޮންނަ ސަރުކާރަކުން ކަނޑައަޅާ ޚާރިޖީ ސިޔާސަތުތައް ދަމަހައްޓައި ނެގެހެއްޓުމުގައި، އެންމެ ފުރިހަމަ މާނައިގައި ރައީސުލްޖުމްހޫރިއްޔާއަށާއި ސަރުކާރަށް އެހީތެރިވެދިނުމަށް އެކުލަވާލެވުނު މުހިންމު ސިޔާސަތެއްކަން ފާހަގަކުރެއްވިއެވެ.

"ފޮރިން ސަރވިސް ޤާނޫނާއެކު، މިމަސައްކަތް ޕްރޮފެޝަނަލް ދާއިރާއެއްގެ ގޮތުގައި ބައްޓަންކުރެވިއްޖެ. މިއީ ވަރަށް މުހިންމު މަޤްޞަދެއްގައި ގެނައި ސިޔާސަތެއް. އެއިރެއްގައި އޮންނަ ސަރުކާރެއްގެ ސިޔާސަތު ނެގެހެއްޓުމަށް މަގުފަހިވެއްޖެ." ރައީސް ވިދާޅުވިއެވެ.

މީގެ އިތުރުން ރައީސުލްޖުމްހޫރިއްޔާގެ ވާހަކަފުޅުގައި، ކޯވިޑް-19ގެ ވަބާ މުޅި ދުނިޔޭގައި ފެތުރި، ހުރިހާ ޤައުމުތަކެއް ފުރަބަންދުގެ ޙާލަތުގައި އޮތް އިރު، ޚާރިޖީ ޚިދުމަތުގައި ތިއްބެވި ބޭފުޅުން ކުރެއްވި ބުރަ މަސައްކަތް ޚާއްޞަ ގޮތެއްގައި ފާހަގަކުރެއްވިއެވެ.

"ބޭރުގެ މިޝަންތަކުގައި ދިވެހިންގެ ހާލު ބަލާ، އެހީވުމާއި، ކިޔަވަން ތިބި ކުދިން ރާއްޖެ ގެނައުމާއި އަދި ބޭސްފަރުވާގެ ސާމާނާއި އެހީ ހޯދުމަށް ބޮޑެތި ބުރަ މަސައްކަތެއް ކުރެއްވި." ރައީސް ވިދާޅުވިއެވެ.

ޚާރިޖީ މަސައްކަތްޕުޅު ވަރުގަދަކުރައްވަން ކުރެއްވި މަސައްކަތުގެ ސަބަބުން ދުނިޔޭގެ 192 ގައުމުގެ ތެރެއިން 185 ގައުމާއިއެކު ރާއްޖެއިން މިހާރު ވަނީ ޑިޕްލޮމެޓިކް ގުޅުން ޤާއިމުކޮށްފައެވެ.

ރައީސުލްޖުމްހޫރިއްޔާގެ ވާހަކަފުޅު ނިންމަވާލައްވަމުން، ރާއްޖޭގެ ޚާރިޖީ ދާއިރާ އިތުރަށް ތަރައްޤީވެ، ބައިނަލްއަޤުވާމީ މަސްރަޙުގައި ދިވެހި ދިދަ މިހާރަށް ވުރެ ވެސް އުހުގައި ވިހުރެމުން ދިއުމަށް އުއްމީދުކުރައްވާކަމަށް ވިދާޅުވިއެވެ.