އިންކަމް ޓެކްސް އުވާލައި ވެލްތު ޓެކްސް ތަޢާރަފްކުރާނަން: ޒަމީލް

އިންކަމް ޓެކްސް އުވާލައި ވެލްތު ޓެކުހެއް ތަޢާރަފްކުރެއްވުމަށް، ރިޔާސީ އިންތިޚާބުގައި އަމިއްލަ ގޮތުން ވާދަކުރައްވާ ކެންޑިޑޭޓް ޙަސަން ޒަމީލްގެ މެނިފެސްޓޯގައި ހިމަނުއްވައިފިއެވެ.

ޒަމީލް ވަނީ އެމަނިކުފާނުގެ މެނިފސްޓޯ ސޯޝަލް މީޑިއާގައި ޢާންމުކުރައްވާފައެވެ. އެގޮތުން ޒަމީލްގެ މެނިފެސްޓޯގައި މާލީ ސިޔާސަތުގެ ދަށުން ވަނީ، މުދަލު ޒަކާތް ޤާނޫނަކުން ލާޒިމްކުރުމާއެކު، ވެލްތު ޓެކުހުގެ ނިޒާމެއް ޤާއިމްކުރުމަށް ކަނޑައަޅާފައެވެ. އަދި މިހާރު ނަގަމުން އަންނަ އިންކަމް ޓެކްސް އުވާލުމަށްވެސް ޒަމީލް ވަނީ ނިންމަވާފައެވެ.

ޒަމީލްގެ މާލީ ސިޔާސަތުގެ ދަށުން ޖީއެސްޓީ އަދި އިމްޕޯޓް ޑިއުޓީ މުރާޖައާކޮށް އިޞްލާހުކުރުމަށްވެސް ވަނީ ނިންމަވާފައެވެ. އަދި މާލެ ސަރަހައްދުގެ ބްރިޖު ނުވަތަ ބުރިޖުތަކުން ޓޯލެއް ނެގުމަށާއި، އަތްތެރި މަސައްކަތުގެ ފަންނު އާލާކޮށް ދިރުވައި، އޮތެންޓިކް އުފެއްދުންތައް ފަތުރުވެރިންނަށް ފޯރުކޮށްދެވޭނެ މަގުތައް ހޯދައި އެކްސްޕޯޓް ކުރެވޭނެ ބާޒާރުތައްވެސް ހޯދައިދިނުން ހިމެނެއެވެ.

ޒަމީލްގެ ސިޔާސަތުގެ ތެރޭގައި ފަތުރުވެރިކަމުގެ އިތުރުން ރާއްޖޭގައި އިޤްތިޞާދީ ގޮތުން ކުރެވޭ މަސްވެރިކަމާއި ދަނޑުވެރިކަމުން އުފެއްދޭ ތަކެތި މުޖުތަމަޢުއަށް ފަސޭހަކަމާއެކު ފޯރުކޮށްދެވޭނެ ނިޒާމެއް ޤާއިމްކުރުން ހިމެނެއެވެ. އަދި އެތަކެތި އެކި ގޮތްގޮތުގައި ދިގުމުއްދަތަކަށް ރައްކާކުރެވޭނެ ގޮތަށް ބަދަލުކުރާނެ ނުވަތަ ޕްރޮސެސްކުރާނެ ކާރުޚާނާތައް ޤާއިމްކޮށް އެތަކެތި އެކްސްޕޯޓް ކުރެވޭނެ ބާޒާރުތައް ހޯދައިދޭނެކަމަށްވެސް ޒަމީލްގެ މެނިފެސްޓޯގައި ބަޔާންކުރައްވާފައިވެއެވެ.

މީގެ އިތުރުން އެއްގަމާއި ކަނޑުގެ ޕަބްލިކް ޓްރާނަސްޕޯޓް ނިޒާމު ފުރިހަމަކޮށް، މާލެއާއި މާލެއާ ގުޅިފައިވާ އަދި ގުޅުވާލެވޭ ރަށްތަކުގެ މަގުމަތީގެ ޓްރެފިކް މަދުކުރުމަށްވެސް ނިންމާފައިވެއެވެ. އަދި މުވާސަލާތުގެ ނިޒާމު އަދާހަމަކޮށް ހެޔޮ އަގެއްގައި އެ ޚިދުމަތް ރައްޔިތުންނަށް ފޯރުކޮށްދިނުމަށްވެސް ޒަމީލްގެ ވަޢުދެއް ގޮތުގައި ވަނީ މެނިފެސްޓޯގައި ހިމަނުއްވާފައެވެ.