ފުލުހުން ހިންގި 2 އޮޕަރޭޝަނެއްގައި ކޯޓު އަމުރެއްގެ ދަށުން މާލޭގެ 2 ގެއެއް ބަލައިފާސްކޮށް، ބަނގުރާކަމަށް ޝައްކުކުރެވޭ އެއްޗެއްހުރި ހަންތަކަކާއެކު 4 މީހަކު ފުލުހުންގެ ބެލުމުގެ ދަށަށް ގެނެސްފިއެވެ.
މި އޮޕަރޭޝަނުގައި ފުލުހުންގެ ބެލުމުގެ ދަށަށް ގެނެސްފައިވަނީ 24 އަހަރުގެ މީހަކާއި 27 އަހަރުގެ މީހަކާއި 28 އަހަރުގެ މީހެއްގެ އިތުރުން 26 އަހަރުގެ އަންހެނެއް ކަމަށް ފުލުހުން މަޢުލޫމާތުދެއްވައެވެ. މި 4 މީހުންގެ ތެރެއިން އަންހެން މީހާއަކީ ސްރީލަންކާ ރައްޔިތެކެވެ. އަދި 3 ފިރިހެނުންނަކީ ބަންގްލަދޭޝް ރައްޔިތުންނެވެ. މަސްތުވާތަކެތީގެ ވިޔަފާރުކުރާކަމަށް ފުލުހުންނަށް ލިބުނު މަޢުލޫމާތަކާއި ގުޅިގެން ހިންގި އޮޕަރޭޝަނުގައި މި މީހުން ފުލުހުންގެ ބެލުމުގެ ދަށަށް ގެނެސްފައިވަނީ މިހިނގާ މާރޗު މަހުގެ 11 ވަނަ ދުވަހުގެ ރެއެވެ.
މި އޮޕަރޭޝަނުގައި މި 2 ގެ ބަލައިފާސްކުރިއިރު ބަނގުރާކަމަށް ޝައްކުކުރެވޭ އެއްޗެއްހުރި 20 ލީޓަރުގެ 17 ހަމާއި 1.5 އެމްއެލްގެ ފުޅިއަކާއި 500 އެމްއެލްގެ ފުޅިއަކާއި 5 ލީޓަރުގެ ދެ ފުޅީގެ އިތުރުން ބަނގުރާކަމަށް ޝައްކުކުރެވޭ އެއްޗެއްހުރި 2 ބާލިދީއަކާއި ބާސްކެޓަކާއި ޓައްޕެއް ފެނިފައިވާ ކަމަށް ފުލުހުން މަޢުލޫމާތުދެއްވައެވެ. މީގެއިތުރުންވެސް ބަނގުރާ ކެއްކުމަށް ބޭނުންކުރާ ބައެއް ތަކެތިވެސް ފެނިފައިވާ ކަމަށް ފުލުހުން ވިދާޅުވެއެވެ.
ފުލުހުންގެ ބެލުމުގެ ދަށަށް ގެނެސްފައިވާ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން އެމީހުންގެ ބަންދަށް 15 ދުވަހުގެ މުއްދަތެއްދީ، މިނިސްޓްރީ އޮފް ހޯމް އެފެއަރޒުން ކަނޑައަޅާ ތަނެއްގައި ބަންދުގައި ބަހައްޓުމަށް ކްރިމިނަލް ކޯޓުން ނިންމަވާފައިވާ ކަމަށް ފުލުހުން މައުލޫމާތުދެއްވައެވެ.