އެމްޑީޕީގެ އިޤްތިޞާދީ ބޮޑު ބަދަލު: މާލީ ދާއިރާ ރީފޯމްކޮށް، އިސްލާމިކް ފައިނޭންސްގެ ހަބަކަށް ރާއްޖެހެދުން

ރާއްޖޭގެ މާލީ ދާއިރާ ރީފޯމްކޮށް، އިސްލާމިކް ފައިނޭންސްގެ ސަރަޙައްދީ މައި މަރުކަޒަކަށް ރާއްޖެ ހެދުމުގެ އަމާޒާއެކު އެމް.ޑީ.ޕީއާއި ގުޅިފައިވާ ޕާޓީތަކުގެ މެނިފެސްޓޯ 2023 ގައި ހިމެނޭ އެންމެފަހު ސިޔާސަތު "އިޤްތިޞާދީ ބޮޑު ބަދަލު" އިޢުލާންކޮށްފިއެވެ.

"އިޤްތިޞާދީ ބޮޑު ބަދަލު" ސިޔާސަތު އިޢުލާންކޮށްފައިވަނީ އެމްޑީޕީއާއި ގުޅިފައިވާ ސިޔާސީ ޕާޓީތަކުން "ޒަމާނަކުން އައި ޒަމާނެކޭ" މި ނަމުގައި މިރޭ ސޯޝަލް ސެންޓަރުގައި ބޭއްވި ކެމްޕޭން ޖަލްސާގެ ތެރެއިންނެވެ.

މިއާއެކު އެމް.ޑީ.ޕީއާއި ގުޅިފައިވާ ސިޔާސީ ޕާޓީތަކުން ކުރިއަށްއޮތް ރިޔާސީ އިންތިޚާބަށް ހުށަހަޅާ މެނިފެސްޓޯ 2023 ގައި ހިމެނޭ މައި 5 ސިޔާސަތާއި، އެކަންކަމުގެ ދަށުން އިސްކަންދޭނެ މުހިންމު ކަންކަން މިވަނީ ހާމަކޮށް ނިމިފައެވެ.

އެންމެފަހުން އިޢުލާންކުރި "އިޤްތިޞާދީ ބޮޑު ބަދަލު" ސިޔާސަތު ބަހާލާފައިވަނީ މައިގަނޑު 4 ބަޔަކަށެވެ. އޭގެ ތެރޭގައި ބާރުވެރި އިޤްތިޞާދު، އިޤްތިޞާދީ ހަރަކާތްތަކުގައި އެންމެންގެ ބައިވެރިވުން، އެކާވީސް ވަނަ ގަރުނަށް މާލީ ދާއިރާ އަދި ވިލުންތެރި އިޤްތިޞާދު ހިމެނެއެވެ.

މި ސިޔާސަތުތަކުގެ ދަށުން އިސްކަންދީފައިވާ ބައެއް މުހިންމު ކަންކަމުގެ ތެރޭގައި ރާއްޖޭގައި އިސްލާމިކް ފައިނޭންސް އިތުރަށް ފުޅާކުރުމަށް ޤައުމީ މާސްޓަރ ޕްލޭނެއް އެކުލަވާލައި، ރާއްޖެއަކީ އިސްލާމިކް ފައިނޭންޝަލް ހަބަކަށް ހެދުމަށް އިސްލާމިކް ފައިނޭންސަށް ޚާއްސަ ރީޖަނަލް ފައިނޭންޝަލް ސެންޓަރެއް ޤާއިމުކުރުން ހިމެނެއެވެ. އަދި ރާއްޖޭގެ ފައިނޭންޝަލް ސެކްޓަރ ކުރިއެރުވުމަށްޓަކައި ކުރާ މަސައްކަތްތަކުގައި އިސްލާމިކް ފައިނޭންސަށް އިސްކަންދީ، ބޭންކިންގ، އިންޝޫރަންސް، އަދި ޕެންޝަން ފަންޑް ފަދަ ދާއިރާތަކަށް ކޮންވެންޝަނަލް ފައިނޭންސަށްވުރެ ފަހިކޮށް ފަސޭހައިން އިސްލާމިކް ފައިނޭންސަށް އެކްސެސް ލިބޭނެ މާލީ ނިޒާމެއް ޤާއިމުކުރުންވެސް ހިމެނެއެވެ.

ހަމައެހެންމެ ދިވެހި މާލީ ދާއިރާގެ ރެގިއުލޭޓަރީ އޮނިގަނޑު އެއްކޮށް އޯވަހޯލް ކުރުމުގެ ގޮތުން، ޒަމާނާ އެއްގޮތަށް ބައިނަލްއަގްވާމީ މުއާހަދާތަކުން ޖާގަދޭ ގޮތަށް އެ މައްސަލަތަކަށް ހައްލު ހޯދުމަށް ރެގިއުލޭޓަރީ ރިފޯމް އޮޑިޓެއް ހަދައި، މޯލްޑިވްސް މަނިޓަރީ އޮތޯރިޓީގެ ގާނޫނު، ބޭންކިންގ ގާނޫނު، ސެކިއުރިޓީޒް ގާނޫނު، އަދި އެހެނިހެން ގާނޫނާއި ގަވާއިދުތަކަކީ ޒަމާނީ ފައިނޭންޝަލް ސެކްޓަރ އަދި ކެޕިޓަލް މާކެޓަކަށް އެކަށޭނެ ރެގިއުލޭޓަރީ އޮނިގަނޑެއްކަން ޔަޤީންކުރުމަށް މެނިފެސްޓޯގައި ހިމަނާފައިވެއެވެ.

މީގެ އިތުރުން ކުދި ވިޔަފާރިތަކާއި، ފަތުރުވެރިކަމާއި މަސްވެރިކަމާއި ދަނޑުވެރިކަމުގެ އިތުރުން ދަތުރުފަތުރާއި ޑިޖިޓަލް ޓެކްނޮލޮޖީގެ ދާއިރާއިން ކޮށްދޭނެ މުހިންމު ކަންކަން އެމްޑީޕީއާއި ގުޅިފައިވާ ސިޔާސީ ޕާޓީތަކުގެ މެނިފެސްޓޯގައި ހިމަނާފައިވެއެވެ.

އެގޮތުން ދުނިޔޭގެ ފެންވަރުގެ ބްރޭންޑަކަށް ރާއްޖޭގެ މަސްވެރިކަމުގެ ސިނާޢަތް ހެދުމާއި، ކުދި ވިޔަފާރިތަކަށް އިތުރަށް މާލީ އެހީތެރިކަމާއި ރައްކާތެރިކަން ފޯރުކޮށްދީ، ފަހި މާހައުލެއް ގާއިމުކޮށްދިނުމަށްޓަކައި ރެގިއުލޭޓަރީ ނިޒާމު އިތުރަށް ހަރުދަނާކުރުން ހިމެނެއެވެ. އަދި ކުދި ދަނޑުވެރިންނަށް ބޭނުންވާ މައިކްރޯފައިނޭންސިންގ ސްކީމްތައް ތައާރަފްކޮށް، ދަނޑުވެރިންނަށް ބޭނުންވާ ބިން ހޯދައިދިނުމަށް އިސްކަންދިނުމާއި، ދިވެހިރާއްޖެ ފަޚުރުވެރިވާނެފަދަ ދުނިޔޭގެ ފެންވަރުގެ ދިވެހި ހޮސްޕިޓެލިޓީ މެނޭޖްމަންޓް ބްރޭންޑްތަކެއް އުފެއްދުމަށް ބޭނުންވާ ފަންނީ އަދި މާލީ އެހީތެރިކަން ފޯރުކޮށްދިނުމަށްވެސް މެނިފެސްޓޯގައި އެކަށައަޅާފައިވެއެވެ.